Ishitushizya 2 - ULufingwi uLupwa

Ukalaata uwa Yeesu ku shivhanza isha ku Hefeeso

¹ Umuntu uyo ahajendeelela kumbuuzya kuuti, “Uhavhizya uwa shivhanza isha ku Hefeeso, musimbile uti: Iga mazwi kufuma kuli ine ne Yeesu. Ine ndemile inzota 7 ku nyoovhe yaane iya kundiilo, havhili nkujenda pahati pa visajishilo ivwa sahaabu ivwa nyaale 7:

² Imanyile imbombo yaaho nu mute waaho nu vhujimbiilizu vhwaho. Havhili imanyile kuuti utangavhajimbiilila avhatalamalandu, havhili uvhalinzile vhe vhakuyitaha kuuti vhatumwa fwandi te muumwo. Uhamanyinsanya kuuti vha ilenga.

³ Havhili uhagulililaga nu kujimbiilila kuzya izina lyane shisita kulita.

⁴ Ileelo indi ni izwi niiwe: Ushilesile ishikunzi shaaho ishitanzi.

⁵ Pe ukumbushe paala pe wáamile lwe ushiili kuteega. Upindushe, uzivhombaje imbombo intanzi. Ileelo inga utavhomba izyo, nkwinza naluvhiilo kuli iwe nu kusheefwa ishisajishilo isha nyaale pe shili.

⁶ Kuli izi nkukutiima, ukwilwa zye aVhanikolayi vhakuzivhomba, zye niine nkuzyilwa.

⁷ We ali na makutwi, atejeelezye ziila zye uMupepo uMufinjile akuvivhuuzya ivivhanza. Ula we alipoota indingo ndiimupa amantonongwa aga ikwi lye likufumwa uvhulanzi, lye lili mu shilimbika isha Mulungu.”

Ukalaata uwa Yeesu ku shivhanza isha ku Siimina

⁸ “Uhavhizya uwa shivhanza isha ku Siimina, musimbile uti: Iga mazwi kufuma kwa Yeesu, ula we Vhwandilo nu Vhusililishilo, we áfuuye havhili ahazyuha:

⁹ Ngamanyile amayimba gaaho nu vhupiina vhwaho, ileelo nalyoli we dumbwe. Mbumanyile nu musaamu waavho vhe vhakuyitaha kuuti Vhayuuda, fwandi haa, ileelo vha mwi isinagoogi ilya Seetano.

¹⁰ Utogopaje amayimba ge kwe gakwagaje! Yeenya, uMukwalanzi kwe avhakunje avhamwinyu vhamo mu jeela inga avhalinje, pe kwe muyimbe insiku 10. Uvhe we mutungamu poosye nu kufwa, pe ine ndiikupa ishipambwi she vhulanzi uvhwa shiima.

¹¹ We ali na makutwi, atejeelezye ziila zye uMupepo uMufinjile akuvivhuuzya ivivhanza. Ula we alipoota indingo te ahaafwe ku vhufwe uvhwa vhuvhili.”

Ukalaata uwa Yeesu ku shivhanza isha ku Pegaamo

¹² “Uhavhizya uwa shivhanza isha ku Pegaamo, musimbile uti: Iga mazwi kufuma kwa Yeesu, ula we ali ni ipanga lye lihozile kwonti:

¹³ Mpamanyile pe ukutendama, pe pa shinamwene isha Seetano. Niiwe ukulyitiha izina lyane havhili utahaluhaana ulwitiho lwane, poosye mu havhaliilizyo aha hoome waane umutungamu uAntipa. Uweene we avhantu vhámugozile kuli imwe paala pe uSeetano akutendama.

¹⁴ Ileelo indi na mazwi mansi niiwe: Vhamo muli imwe vhakulandata insambiilizyo izya Baalamu. Ula we ámusambiliziizye uBaalaki kuvhapuvwa aVhaisilayeeli kuuti vhalye impuutile zye vháfumwizye ku viholanyo nu kuvhembuha.

¹⁵ Vhwevhulo, muli iwe vhamo vhakuzilandata insambiilizyo izya Vhanikolayi.

¹⁶ Ishi leelo, pinduha! Inga utapinduha, nkwinza kuli iwe naluvhiilo, nu kulwa navho ni ipanga lye likufuma mwi ilomu lyane.

¹⁷ We ali na makutwi, atejeelezye ziila zye uMupepo uMufinjile akuvivhuuzya ivivhanza. Ula we alipoota indingo ndiimupa imana iya kukwilu. Havhili ndiimupa ivhwe izelu lye lisimviilwe izina ipwa. Ataliipo we alilimanya izina ilyo, nkandi we wula we akuliposheela.”

Ukalaata uwa Yeesu ku shivhanza isha ku Tiyatiila

¹⁸ “Uhavhizya uwa shivhanza isha ku Tiyatiila, musimbile uti: Iga mazwi ge nkuyanga ne Mwana wa Mulungu. Ine aminso gaane gakumekuha ngati mwoto, havhili ivinama vwane vili ngati shaaba ye vhayizelufwizye nkaani.

¹⁹ Ndumanyile ulujendo lwaho ni shikunzi shaaho nu lwitiho lwaho nu vhuvhomvi vhwaho pooka nu vhujimbiilizu vhwaho. Havhili ulujendo lwaho ulwa ishi lwinza kuluusya ulwa hali.

²⁰ Ileelo indi ni izwi niiwe: Ukumujimbiilila umwantanda ula uYezebeeli. Uweene akuyitaha kuuti mukuvhwi, ileelo te muumwo. Akuvhasambiilizya avhavhomvi vhaane nu kuvhapuvwa, kuuti vhavhembuhaje nu kulya impuutile zye vhafumwizye ku viholanyo.

²¹ Imupiiye ahavhaliilizyo aha kupinduha, ileelo atakwanza kuvhuleha uvhulugusu vhwakwe.

²² Yeenyi, ndimusumbila impungo ye alipotwaga nu kuvhuuha pa shilili! Havhili vhe vhakuvhembuha nawo ndivhayimvwa, inga vhatakupinduha ku mbombo zyavho imbiivhi zye vhavhomvile nawo.

²³ Havhili ndivhagoga avhalandati vhaakwe. Pe ivivhanza vwonti viliimanya kuuti ine ne nkwenyeelezya insiivho na mooyo. Niine ndiimupa umuntu wonti muli imwe kulandatana na zye akuzivhomba.

²⁴ Ileelo muli imwe ku Tiyatiila ukwo, kuli vhamo vhe vhatakuzilandata insambiilizyo izya Yezebeeli. Havhili vhatakusambiilila insambiilizyo izyo zye avhanji vhakuti insambiilizyo inkondezu nkaani, ileelo zya Mukwalanzi. Avhantu ivho nkuvhavhuuzya kuuti, te nkavhatwishe umuligo umumwamu havhili,

²⁵ ileelo mulemaje nkaani she muli nasho, kufishila ahavhaliilizyo he ndiyinza.

²⁶ Ula we alipoota indingo nu kulwenyeelezya ulujendo lwane kufishila kumpeleela, ‘Ndiimupa amaha ku vhantu avha nsi zyonti.

²⁷ Uweene alivhakonzya ku ndiisa iya shijela, alivhabazulanya fwe nsonta iya ivhumba.’ Umuntu wonti we alipoota, aliposheela amaha inza ine vwe mposheleeye kufuma kwa Taata.

²⁸ Ndiimupa uluzota luula lwe lukulama nkaani inzanshi.

²⁹ We ali na makutwi, atejeelezye ziila zye uMupepo uMufinjile akuvivhuuzya ivivhanza.”