Ishitushizya 19 - ULufingwi uLupwa

Ishikulukuulu isha winga ku mwanya

¹ Lwe zyatuuha izyo nkiivwa amazwi ngati mazwi aga ivhungaana ipiti ilya vhantu ku mwanya gakuti, “Haleluuya! Uvhuposhi nu vhushindamu na maha vikufuma kwa Mulungu wiitu.

² Mwe pe uvhulonzi vhwakwe vhwa nalyoli, havhili vhwa muumwo. Amulonzile umalaaya umupiti, ula we áyipuvwizye insi ku vhulugusu vhwakwe. Amulanduziizye kuzya kwita amavhanda aga vhavhomvi vhaakwe!”

³ Havhili vhahayanga vhahati, “Haleluuya! Ilyosi ilya mwoto we wukuyinanganya inkaaya iyo, liliizuvha ku mwanya shiima shiima!”

⁴ Avhasongo 24 vhahakupama pansi pooka ni vipelwa vine, vhahamupuuta uMulungu, uweene we ali pa shitengo isha vhumwene, vhahati, “Amina! Haleluuya!”

⁵ Pe izwi lihafuma ku shitengo isha vhumwene lihati, “Mumutiime uMulungu wiitu, mwe vhavhomvi vhwakwe vhonti, mwenti mwe mukumunyila, mwe vhapiti na mwe vhansi.”

⁶ Pe nkiivwa izwi ngati lizwi lya ivhungaana ipiti ilya vhantu, havhili ngati lya minzi aminji ge gakwiha ku maha, havhili ngati lya kujilima ukupiti lihati, “Haleluuya! Mwe pe uMWENE wiitu uMulungu uwa Maha Gonti akonzya!

⁷ Tuseshelaje nu kudovhela nu kumushindiha, mwe pe ahavhaliilizyo aha winga uwa Hagonzi aha MWENE uMulungu hafisile, havhili we akwimalwa ayisengiinye.

⁸ Apeliilwe kuzwalila umwenda umwinza umuzelu, we wuzelufile havhili we wukunyengʼenyela.” (Umwenda umwinza umuzelu uwo, mbombo ingolosu izya vhafinjile.)

⁹ Pe uhavhizya ahambuuzya ahati, “Simba izi: Vhalosiitwe vhaala vhe vhavhalanjiiye ku shikulukuulu isha winga uwa Hagonzi aha MWENE uMulungu!” Havhili ahambuuzya, ahati, “Igo mazwi aga nalyoli aga Mulungu.”

¹⁰ Pe nkakupama pilongolela ilya vinama vwakwe kuuti imupuute. Ileelo uweene ahambuuzya, ahati, “Leha! Ine ne muvhomvi vhweleele inza iwe na vhamwinyu, swenti tukufumwa uvhwahoome uvhwa Yeesu. Mupuute uMulungu! Nkuyanga vhwevhulo, mwe pe vhe vhakufumwa uvhwahoome uvhwa Yeesu, vhe vhali nu Mupepo uMufinjile. Woope we akuvhaavwa kufumwa uvhukuvhwi.”

We alimbiiye imfwalaasi inzelu

¹¹ Pisinda, nkalola ku mwanya kwigusile, ukwo nkalola imfwalaasi inzelu, na we akuyilimbila vhahatinji, “UMutungamu” nu “Wa Nalyoli.” Uyo akulongaga nu kulwa ku vhugolosu.

¹² Aminso gaakwe gáali ngati mwilo wa mwoto, havhili ázwaye ivipambwi ivwinji kwi itwe. Ásimviilwe izina lye umuntu nuumo atálimanyile, nkandi wuuyo weeka.

¹³ Ázwaye umwenda we vhátontesile mu mavhanda. Izina lyakwe uyo wu “Izwi ilya Mulungu.”

¹⁴ Impuga izya vhasikaali avha ku mwanya vhahamulandataga uku, vhalimbiiye imfwalaasi inzelu havhili vhazwaye amenda aminza amazelu ge vhazelufwizye.

¹⁵ Ipanga ihozu likufumaga mwi ilomu lyakwe na kwi ipanga ilyo alivhapoota avhantu avha mu nsi zyonti. “Uweene we alivhakonzya ku ndiisa iya shijela” nu kusuusa idivaayi inkali mu shiliilo isha kusuusila amampensya. Ishiliilo isho sha vhuhalazu uvhupiti uvhwa Mulungu uweene uwa Maha Gonti.

¹⁶ Pa mwenda waakwe na pa shizima shaakwe asimviilwe izina ilya kuuti, “umupiti wa vhapiti nu mwene wa vhamwene.”

¹⁷ Nkamulola uhavhizya wooka ayimiliiye pi izuvha pamwanya. Ahavhilishila nu kuzivhuuzya inyunyi zyonti zye zihabuluhaga mu mwanya kuuti, “Nzaaji! Vhungaani pooka ku shikulukuulu ishipiti isha Mulungu.

¹⁸ Nzaaji! Mulye amavhili aga vhamwene na ga vhapiti vha vhasikaali na vhantu avha maha na ga mfwalaasi na vhe vhakuzilimbila. Nzaaji! Mulye amavhili aga vhantu vhonti, vhe vhazya na vhe te vhazya na vhapiti na vhansi.”

¹⁹ Nkalola ishihanu shiila ishitanzi pooka na vhamwene avha nsi zyonti ni mpuga izya vhasikaali vhaavho vhavhungiine pooka. Vhávhungiine inga vhalwe nuula we átendiime pa mfwalaasi, pooka ni mpuga iya vhasikaali vhaakwe.

²⁰ Ileelo we átendiime pa mfwalaasi ahashigoma ishihanu isho pooka nu mukuvhwi waakwe uwa ilenga, we ahavhombaga ivilolesyo pa luvhambo lwakwe. Ku vilolesyo vwakwe ivwo, ávhahopenkiinye vhaala vhe vháamile ni vimanyilo ivwa shihanu isho, na vhe vhahashipuutaga ishiholanyo shaakwe. Ishihanu isho pooka nu mukuvhwi uyo vhahasumbwa vhonti vhavhili, she vhapuuma mwa sumbi we akwaha umwoto uwa mbaluuti.

²¹ Umuntu uyo we átendiime pamwanya pa mfwalaasi, ahavhagoga avhasikaali vhaavho kwi ipanga lye lihafumaga mwi ilomu lyakwe. Inyunyi zyonti zihalya inyama zyavho nu kwikuta.