Ishitushizya 18 - ULufingwi uLupwa

Kunanjiha ukwa nkaaya iya Babeeli

¹ Lwe zyatuuha izyo, nkamulola uhavhizya uwamwavho akwiha kufuma ku mwanya. Áamile na maha amapiti, insi yihalamilwa nu vhuzelu vhwakwe.

² Ahahoola kwi izwi ipiti ahati, “Aguuye! UBabeeli aguuye, inkaaya yiila ye mpiti! Ishi avha vhutendamo uvhwa gaseetano ni mpepo inkandamanu, havhili avha vhutendamo uvhwa nyunyi inkandamanu zyonti zye zikuviisya.

³ Nkuyanga vhwevhulo, mwe pe insi zyonti zihoziilwe ku divaayi inkali iya vhulugusu vhwakwe, vhoope avhamwene avha nsi izyo vhavhembusile nawo. Vhoope avhavhomvi avha kutaanania avha mu nsi zyonti vhadumbusile kufumiilana nu vhumalaaya vhwakwe vhwe vhupoosite nkaani.”

⁴ Nkiivwa izwi ilyamwavho kufuma ku mwanya lihati, “Yeepi ku kwakwe mwe vhantu vhaane, inga mutahinze muvhe pooka nawo mu vhutalamalandu vhwakwe, inga mutahinze musangaane mu mfwa zyakwe.

⁵ Yeenya, uvhutalamalandu vhwakwe vhupiti nkaani, havhili vhufisile ku mwanya, uMulungu akumbusile imbiivhi zyakwe.

⁶ Mumuvhombele inza vwe woope ávhomvile, mumulanduzye luvhili ku ziila zye ávhomvile. Mu lupindi lwakwe lwe ávhenjeeye, imwe mumwenjele luvhili.

⁷ Mumuyimvwe nu kumuvhavwa kufumiilana nu kuyitumvwa kwakwe, kufumiilana ni mpapilo zyakwe. Akuyitumvwa mu mwoyo waakwe kuuti, ‘Ine nkutendama pa shitengo shaane nu kukonzya fwe ne samwene. Ine te ne muziishe, havhili ntaliswimiililwa naalumo!’

⁸ Kuli izyo, alipeelwa imfwa zyakwe kwi isiku lyoka, uvhuvhinu nu vhuswimiilizu ni nzala. Havhili aliilovwa ku mwoto, mwe pe uMWENE uMulungu uweene we akumulonga ali na maha.”

⁹ Avhamwene avha mu nsi zyonti, vhe vhavhembusile nu kuvhomba uvhumalaaya nawo, vhalikuuta nu kuloosya lwe vhaalola ilyosi ilya nkaaya iyo ye yikwaha nu kunanjiha.

¹⁰ Vhaliyimiilila ukutali, mwe pe vhakwogopa amayimba gaakwe nu kuyanga kuuti, “Washeela, washeela iwe Babeeli, inkaaya ye yikumusile ni ya maha! Ku havhaliilizyo aha isaala lyoka vhweleele isunde lyaho lyakwaga.”

¹¹ Vhoope vhe vhakukazya avha mu nsi zyonti vhalikuuta nu kuloosya, mwe pe kutali umuntu naawumo we akukala ivintu vwavho.

¹² Kwe kuuti naawumo we akukala isahaabu yaavho ni mpiiya na mavhwe aga nsavho ni luulu. Havhili naawumo we akukala amenda aminza amazelu na menda aga muhoola uwa mafwomfwo ni nkusa izya haliili na menda amashemamu ni viliilo ivwa makwi aga masitilooni ni viliilo ivwa mpembe izya nzovu ni vwa makwi aga nsavho impiti ni vwa shaaba ni shijela ni malumaalu.

¹³ Havhili naawumo we akukala umudalasiini ni ntwilo izyamwavho ni vwa kusuushizya ni manemaane nu wuudi ni divaayi na mafuta nu vhusu uvhwinza ni ngana ni ngʼombe ni ngʼonzi ni mfwalaasi na mageleeti na vhantu vhe vhazya.

¹⁴ Vhe vhakukazya vhalimuvhuuzya kuuti, “Ilonka lyonti lye wányonyiilwe lyateega, uvhudumbwe nu kukumuha kwaho viteezile. Te uhavhwezye kuvwaga havhili!”

¹⁵ Vhe vhakukazya ivho, vhe vhadumbusile kufumililana ni nkaaya iyo, vhaliyimiilila apatali, mwe pe vhaliyoogopa amayimba gaakwe. Vhalikuuta nu kuloosya,

¹⁶ vhaliyanga, vhaliiti, “Yasheela! Yasheela inkaaya impiti! Yávheleleeye kuzwalila amenda aminza amazelu, aga muhoola uwa mafwomfwo na mashemamu nu kuyiyemvwa ku sahaabu na mavhwe aga nsavho ni luulu!

¹⁷ Kwi isaala lyoka vhweleele uvhudumbwe vhwakwe vhwalovha!” Havhili vhe vhakujenzya imeeli vhonti na vhe vhakushuula navho na vhonti vhe vhakuvhomba imbombo mwa sumbi, vhaliyimiilila apatali.

¹⁸ Lwe vhalilola ilyosi ilya mwoto ula we wuliyinanganyaaga, vhalihoola kwi izwi ipiti kuuti, “Kutahavha naalumo inkaaya, inza inkaaya impiti ino!”

¹⁹ Vhaliyinyampila ulusuuto mu matwe gaavho uku vhakukuuta nu kuloosya, “Yasheela! Yasheela inkaaya impiti! Nkaaya ye vhonti vhe vhali ni meeli izya mwa sumbi, vhádumbushiiye kufumiilana nu vhudumbwe vhwakwe. Ku havhaliilizyo aha isaala lyoka vhweleele yilovwizye ivintu vwonti!

²⁰ Seshelaaji imwe mwanya, kuzya vhunanjisu vhwakwe! Seshelaaji mwe vhafinjile, mwe vhatumwa na mwe vhakuvhwi! Mwe pe uMulungu ayilonga ku ziila zye yivhavhombeeye imwe!”

²¹ Havhili uhavhizya wooka we ali na maha ahavhuusya ivhwe lye liholiine nu lwala, ahalisumbila mwa sumbi nu kuuti, “Vwe uBabeeli alisumbilwa, nu kuteega nziila.

²² Amazwi aga mapango na ga kwimba, amazwi aga malonji na masaji, te gahivwishe naalumo kuli iwe. Kutaliivha we akugomba wonti, we vhalimwaga havhili kuli iwe, poosye izwi ilya lwala te lihivwishe naalumo kuli iwe.

²³ Uvhuzelu uvhwa nyaale te vhuhaloleshe havhili kuli iwe, poosye amazwi aga we akwimala na we akwimalwa, te gahivwishe naalumo kuli iwe, mwe pe avhavhomvi vhaaho avha kutaanania vháamile vhapiti mu nsi zyonti. Havhili ku vhulozi vhwaho insi zyonti zyápuvile!

²⁴ UMulungu áyisunzite inkaaya iyo, mwe pe mu kwakwe mwámile amavhanda aga vhakuvhwi na ga vhafinjile na ga vhantu vhonti, vhe avhalugu avha Mulungu vhávhagozile mu nsi.”