Ishitushizya 17 - ULufingwi uLupwa

Umalaaya umupiti ni shihanu ishishemamu

¹ Pe wooka mu vhaala avhahavhizya 7, vhe vháali ni mbiga 7 ahambuuzya ahati, “Nzaaga, niine kwe nkulanje isunde lye alipeelwa umalaaya umupiti we nkaaya ye vhayizenzile pa luvhazu pa minzi aminji.

² Avhamwene avha nsi zyonti vhavhembusile nawo na vhe vhakutendama pa nsi vhahoziilwe idivaayi inkali ye vhulugusu vhwakwe.”

³ UMupepo uMufinjile ahaniishila, pe uhavhizya ahanyatula nu kuntwala kwi ilaala. Ukwo nkamulola umwantanda alimbiiye pa shihanu she sháali nu muhoola uwa mafwomfwo. Ishihanu isho shásimviilwe mwonti amazina aga musaamu, sháamile na matwe 7 ni mpembe 10.

⁴ Umwantanda uyo ázwaye amenda ge gáali nu muhoola uwa mafwomfwo na mashemamu. Áyiyemvwizye ni sahaabu na mavhwe aga nsavho ni luulu. Ku nyoovhe yaakwe álemile ulupindi ulwa sahaabu lwe lwízuuye izya kuviisya ni zya vhuhandamanu zye zikulolesya uvhulugusu vhwakwe.

⁵ Ásimviilwe pa sheeni shaakwe izina ilya vhuzigizigi ilya kuuti, ubabeeli umupiti, umaayi uwa vhamalaaya nu wa mbombo zye zikuviisya izya mu nsi.

⁶ Nkalola umwantanda uyo ahoziilwe amavhanda aga vhafinjile avha Mulungu na mavhanda aga vhantu vhe vhahamuhomeshezyaga uYeesu. Lwe namulola, násukumiiye nkaani.

⁷ Ileelo uhavhizya ahambuuzya ahati, “Utasukumilaje! Ine kwe nkuvhuuzye izya vhuzigizigi uvhwa mwantanda uyo ni shihanu isho she shimuvhusiizye she shili na matwe 7 ni mpembe 10.

⁸ Ishihanu isho she washilola sháali shipuuma ileelo isaala izi shifuuye. Kwe shifume kwi ilivha ilya ku vhuzimu, ileelo uMulungu kwe ashilovwe. Vhe vhakutendama pa nsi vhalisukumila. Mwe muumwo, avhantu vhonti vhe amazina gaavho gatásimviilwe mwi ikalaata ilya vhulanzi, kufuma pe ulwalo ulwa nsi lwávhisiilwe, vhalisukumila. Vhalisukumila lwe vhashilola ishihanu isho she ku vhwandilo sháali shipuuma, havhili shihafwa ni saala izi shazyuha!

⁹ “Ishi vhukwanzilwa uvhushindamu uvhwa njeele! Amatwe igo 7, magamba 7 ge umwantanda uyo akugatendamila.

¹⁰ Amatwe igo havhili vhe vhamwene 7. Mu vhamwene ivho 7, vhasaano vhafuuye, wooka akujendeelela kukonzya nu wamwavho ula ashiili kutaliha. Lwe ataliha, alikonzya ku havhaliilizyo hansi.

¹¹ Ishihanu ishishemamu isho she sháali shipuuma ileelo isaala izi shifuuye wu mwene uwa 8, woope we wooka mu vhaala 7, havhili woope uMulungu alimulovwa.

¹² Impembe ziila 10 zye uzivhwenyi, vhe vhamwene vhe vhashiili kutaliha kukonzya. Ileelo vhalipeelwa amaha aga kukonzya ku havhaliilizyo aha isaala lyoka pooka ni shihanu shiila.

¹³ Insiivho izya vhamwene ivho 10 zye zyoka, vhaliishipa ishihanu shiila amaha na maha gaavho amasisya gonti.

¹⁴ Vhaliilwa uvhulugu na Hagonzi aha MWENE uMulungu, ileelo aHagonzi aha MWENE uMulungu halivhapoota, mwe pe aheene he Hapiti aha vhapiti havhili he Hamwene aha vhamwene. Aheene haliivha na vhantu vhaakwe vhe hahavhiita nu kuvhasaavhula nu kuvhavhiiha kuvha vhalandati vhaakwe avhatungamu.”

¹⁵ Uhavhizya ahambuuzya havhili ahati, “Aminzi gaala ge ugavhwenyi paala pe umalaaya umupiti atendiime, mavhungaana aga vhantu vhonti ni nsi zyonti ni njango zyonti.

¹⁶ Impembe ziila 10 zye uzivhwenyi, kwe kuuti avhamwene vhaala 10, pooka ni shihanu shiila vilimuviitilwa umalaaya uyo. Vilinyatula ivintu vwonti vwe ali navwo nu kumuleha ishitali, vhaliimulya inyama yaakwe nu kuyipemba ye yilisyala mu mwoto.

¹⁷ Ziliivha vhwevhulo, mwe pe uMulungu avhapiiye avhamwene ivho insiivho zyoka mu mooyo gaavho, kuushipa ishihanu shiila amaha gaavho aga kukonzya. Vhalivhomba vhwevhulo kufishila lwe ziila zye áyanzile uMulungu zyalunjiha.

¹⁸ Umwantanda we umuvhwenyi, ye nkaaya yiila impiti ye yikuvhakonzya avhamwene avha nsi zyonti.”