Ishitushizya 15 - ULufingwi uLupwa

Avhahavhizya 7 ni mfwa 7

¹ Pe nkalola ishilolesyo ishamwavho ku mwanya, ishipiti ni sha kusukumizya: Páamile avhahavhizya 7 vhe vhali ni mfwa 7 izya vhusililishilo. Ku mfwa 7 izyo, uvhuhalazu uvhwa Mulungu vhulunjisile.

² Nkalola ishintu ngati wu sumbi uwa ilooli, asangiine nu mwoto. Nkavhalola avhantu vhaala vhe vháshipoosite ishihanu shiila ni shiholanyo shaakwe ni mbaazyo iya izina lyakwe. Avhantu ivho vhímiliiye mu luvhazu ulwa sumbi uwa ilooli, vháamile na mapango ge uMulungu ávhapiiye.

³ Vhahimbaga ulwimbo ulwa Moose, umuvhomvi uwa Mulungu nu lwimbo ulwa Hagonzi aha MWENE uMulungu, vhahatinji, “MWENE Mulungu uwa Maha Gonti, imbombo zyaho mpiti, havhili zya kusukumizya nkaani! Iwe Mwene wa nsi zyonti, amadala gaaho ga muumwo, havhili ga nalyoli!

⁴ We MWENE, avhantu vhonti vhakwanzilwa kukutiima! Havhili vhonti vhakwanzilwa kukunyila! Iwe weeka we Mufinjile! Insi zyonti zilikwinzila nu kukupuuta, mwe pe imbombo zyaho ingolosu zilolesile.”

⁵ Lwe zyatuuha izyo, nkalola ku mwanya aPafinjile apa Mulungu mwi Iheema lyakwe ilya Vhwahoome pali ukwazi.

⁶ Pe avhahavhizya vhaala 7 vhe vhali ni mfwa 7 vhahafuma penepo. Avhahavhizya ivho vházwaye amenda amazelu ge gahanyengʼenyelaga na malamba aga sahaabu mu vifuvha vwavho.

⁷ Pe shooka mu viila ivipelwa vine shihaavhapa avhahavhizya ivho 7 imbiga impiti 7 izya sahaabu zye zyizuuye uvhuhalazu uvhwa Mulungu, uweene we mulanzi shiima shiima.

⁸ APafinjile apa Mulungu pízuuye ilyosi lye lyáfumiliine nu vhushindamu na maha aga Mulungu. Naawumo we ávhweziizye kwinjila aPafinjile kufishila lwe zyasila imfwa 7 izya vhahavhizya vhaala 7.