Ishitushizya 14 - ULufingwi uLupwa

AHagonzi aha MWENE uMulungu na vhantu 144,000

¹ Pe nkalola aHagonzi aha MWENE uMulungu himiliiye pi igamba uSayuuni, pooka na vhantu 144,000. Avhantu ivho pa vweni vwavho, lyásimviilwe izina ilya Hagonzi aha MWENE uMulungu ni izina ilya Taata waakwe.

² Nkiivwa izwi kufuma ku mwanya, fwe lizwi lya minzi aminji, havhili lye likujilima inza imvula. Izwi ilyo lye nályivuuye lyámile ngati lizwi ilya ipango.

³ Vhahimbaga ulwimbo ulupwa pilongolela ilya shitengo isha vhumwene na pilongolela ilya vipelwa vine na pilongolela ilya vhasongo. Ileelo naawumo we ávhweziizye kusambiilila ulwimbo luula, nkandi vhaala 144,000, vhe vhápokwilwe mu nsi.

⁴ Ivho vhe vhatáyihandamiinie na vhantanda, mwe pe vhafinjile. Ivha vhe vhakuhalandata aHagonzi aha MWENE uMulungu kwonti kwe hakusogola. Ivha havhakazile kufuma mu vhantu, havhili vhe vhatanzi kwa MWENE uMulungu na ku Hagonzi haakwe.

⁵ Vhatálolesile kuluma ilenga naalumo, mwe pe vhatáali nu vhunanzi.

Avhahavhizya vhatatu

⁶ Nkalola uhavhizya uwamwavho akubuluha pahati pamwanya, áamile ni Izwi iLyinza ilya shiima. Ahavhalumbiilila vhe vhakutendama pa nsi, insi zyonti ni nkolo zyonti ni njango zyonti ni mpuga zyonti.

⁷ Ahayanga kwi izwi ipiti ahati, “Mumunyilaje uMulungu nu kumutiima, mwe pe ahavhaliilizyo aha vhulonzi vhwakwe haafiha. Mumupuutaje uweene we ahapela ku mwanya na pa nsi nu sumbi ni viduda ivwa minzi.”

⁸ Uhavhizya uwamwavho uwa vhuvhili ahalandata, ahati, “Aguuye! UBabeeli aguuye, inkaaya yiila ye mpiti! Yeenya, avhamwensiizye avhantu avha mu nsi zyonti idivaayi inkali ye vhwe vhulugusu vhwakwe.”

⁹ Uhavhizya uwamwavho uwa vhutatu ahalandata. Ahayanga kwi izwi ipiti kuuti, “Umuntu wonti we alishipuuta ishihanu ishitanzi ni shiholanyo shaakwe, nu kuposheela ishimanyilo pa sheeni shaakwe, poosye ku nyoovhe yaakwe,

¹⁰ uweene alimwela idivaayi inkali ye vhuhalazu uvhwa Mulungu. Idivaayi iyo, vhasuusile ishisita kusangaanya na minzi, mu lupindi ulwa mulaha waakwe. Woope uMulungu alimuyimvwa ku mwoto na ku mbaluuti pilongolela ilya vhahavhizya avhafinjile, na pilongolela ilya Hagonzi aha MWENE uMulungu.

¹¹ Ilyosi ilya mwoto we wulivhoosha liliizuvha ku mwanya shiima shiima. Vhatalituuzya uvhusiku, poosye umusanya, ivho vhe vhakushipuuta ishihanu isho ni shiholanyo shaakwe na vhe vhakushiposheela ishimanyilo isha izina lyakwe.”

¹² Kuli izyo, pe yikwanzilwa avhafinjile, avhantu vhaala vhe vhakuzilandata indajizyo izya Mulungu nu kumwitiha uYeesu, vhavhe nu vhujimbiilizu.

¹³ Pe nkiivwa izwi kufuma ku mwanya, lihati, “Simba! Vhalosiitwe avhantu vhaala vhe kwandila isaala izi vhakufwa she vhamwitisile uMwene uYeesu.” Woope uMupepo uMufinjile akuti, “Mwe muumwo! Vhalituuzya amayimba gaavho, mwe pe imbombo zyavho inyinza zilimanyiha.”

Kuvuna ivwa mu nsi

¹⁴ Pe nkeenya, páamile ivhingo izelu. Pa mwanya pi ivhingo ilyo páamile we áali ngati Mwana wa Aadamu. Ázwaye ishipambwi isha kukonzezya isha sahaabu pi itwe nu kulema ishikwakwa ishihozu ku nyoovhe yaakwe.

¹⁵ Uhavhizya uwamwavho ahafuma mu Nyumba iMfinjile, ahamuvhuuzya kwi izwi ipiti ula we átendiime pi ivhingo, ahati, “Luvhiilo, nyatuula ishikwakwa shaaho usogole uvunile, mwe pe ahavhaliilizyo aha kuvuna hafisile, iviyavho pa nsi vweleeye.”

¹⁶ Pe woope we átendiime pi ivhingo ahagwisya ishikwakwa shaakwe pa nsi nu kuyivuna insi.

¹⁷ Uhavhizya uwamwavho ahafuma mu Nyumba iMfinjile ku mwanya, woope havhili áali ni shikwakwa ishihozu.

¹⁸ Uhavhizya uwamwavho, we mwimiilizi uwa mwoto uwa pa shifinjilo, ahafuma pa shifinjilo. Ahamuvhuuzya kwi izwi ipiti uhavhizya ula we áamile ni shikwakwa ishihozu ahati, “Nyatuula ishikwakwa shaaho ishihozu. Upambule ivipambulo ivwa mampensya, mwe pe amampensya aga vipambulo ivwo gatonile.”

¹⁹ Pe uhavhizya ula ahagwisya ishikwakwa shaakwe pa nsi, ahapambula amampensya ge gali mu nsi. Pe ahagavhiiha mu shiliilo ishipiti isha kusuusila amampensya, ishiliilo isha vhuhalazu uvhwa Mulungu.

²⁰ Vhahagasuusila amampensya mu shiliilo isho she sháamile kunzi ku nkaaya. Pe amavhanda gahafuma mu shiliilo isho, uvhwivhizu vhwakwe vhwáfishiiye imiita yooka ni shigavho shooka pa vigavho vivhili ivwa miita, nu vhutali vhwakwe ikilomiita 300.