Ishitushizya 12 - ULufingwi uLupwa

Umwantanda ni iyoha

¹ Pisinda, nkalola ishilolesyo ishipiti ku mwanya: Umwantanda we ázwaye izuvha, nu mwezi wáamile pa vinama vwakwe, havhili pi itwe lyakwe ázwaye ishipambwi isha kukonzezya isha nzota 12.

² Umwantanda uyo áamile pa vhumwamu, ahakuutaga, ahavhavhwaga uvhuvhaavi uvhwa kupaapa.

³ Havhili nkalola ishilolesyo ishamwavho ku mwanya: Páamile iyoha ipiti ishemamu. Iyoha ilyo lyámile na matwe 7 ni mpembe 10, havhili mu matwe gaakwe mwámile ivipambwi 7 ivwa vhumwene.

⁴ Ulusinda lwakwe luhakwesa ishigavho shooka pa vigavho vitatu ivwa nzota izya kumwanya, nu kuzigwisya pa nsi. Iyoha ilyo lihimiilila pilongolela ilya mwantanda ula we akwanza kupaapa, kuuti inga lwe apaapa, liimulye umwana waakwe.

⁵ Pe umwantanda ula ahapaapa umwana umwanaavuli, we alivhakonzya avhantu avha mu nsi zyonti ku ndiisa iya shijela. Umwana waakwe ahanyatulwa kusogola kwa Mulungu, na ku shitengo shaakwe isha vhumwene.

⁶ Umwantanda ula ahashimbiilila kwi ilaala kwe uMulungu ámusenganiziinye, kuuti amusunje kunuukwo ku havhaliilizyo aha nsiku 1,260.

⁷ Pe kuhavha uvhulugu ku mwanya. UMikayeeli na vhahavhizya vhaakwe vhahalwa ni iyoha liila, lyope lihalwa navho pooka na vhahavhizya vhaakwe.

⁸ Ileelo iyoha ilyo na vhahavhizya vhaakwe vháposiitwe, havhili pa vhuyo vhwavho patálolesile ku mwanya.

⁹ UMikayeeli na vhahavhizya vhaakwe vhahalisumbila pa nsi iyoha ilyo pooka na vhahavhizya vhaakwe. Iyoha ilyo ye njoha iya hali, ye wu Mukwalanzi nu Seetano, we akuyihopela insi yonti.

¹⁰ Pe nkiivwa izwi ipiti kufuma ku mwanya likuti, “Ishi, uMulungu wiitu avhaposile avhantu vhaakwe! Ishi alolesya amaha gaakwe nu kukonzya fwe wu mwene! Havhili uChilisiti waakwe alolesya amaha gaakwe! Yeenya, uMikayeeli na vhahavhizya vhaakwe vhamusumbiiye pansi umulonjeelezi uwa vhamwitu, uweene we akuvhalonjeelela kwa Mulungu wiitu, uvhusiku nu musanya.

¹¹ Vhoope vhamupoosite ku mavhanda aga Hagonzi aha MWENE uMulungu, na kwi izwi lye vháhomesheziizye. Ivho vhe vhatahavhumwamihaga uvhulanzi vhwavho, havhili vhatahogopaga kufwa.

¹² Ishi pe seshelaaji, imwe mwe mwanya, na mwe mukutendama muumwo! Yasheela insi nu sumbi! Mwe pe uMukwalanzi ayiisile kuli imwe nu mulaha umupiti nkaani, amanyile kuuti ali na havhaliilizyo hansi vhweleele.”

¹³ Pe iyoha ilyo lwe lyalola kuuti vhalisumba pa nsi, lihamulandata umwantanda we ámupaafile umwana umwanaavuli.

¹⁴ Ileelo umwantanda ula ahapeelwa ivwapa vivhili ivwa ipuula ipiti, inga abulushe, asogole kwi ilaala pe uMulungu ámusenganiziinye. Ipo uMulungu akumusunga ku maaha gatatu ni shigavho shooka pa vigavho vivhili ivwa mwaha, ukutali ni iyoha ilyo.

¹⁵ Iyoha lihaswila aminzi inza ijenje kufuma mwi ilomu lyakwe, mwisinda ilya mwantanda uyo, inga ijenje ilyo limwisye.

¹⁶ Ileelo insi yihamwavwa umwantanda, yihaasama ilomu lyakwe, yihalimila ijenje liila lye lyáfumile mwi ilomu ilya iyoha ilyo.

¹⁷ Pe iyoha lihamuviitilwa nkaani umwantanda ula, liheepa nu kusogola kulwa uvhulugu na vhaana vhe vhásyaye avha mwantanda ula. Avhaana ivho vhe vhala vhe vhakuzilema indajizyo izya Mulungu nu kufumwa uvhwahoome uvhwa Yeesu Chilisiti.

¹⁸ Lyope lihimiilila pa lusenga ulwa sumbi.