Ishitushizya 11 - ULufingwi uLupwa

Avhahoome vhavhili

¹ Nkapeelwa ilanzi lye lyáli fwe luliisa ulwa kupimila, pe uMulungu ahambuuzya ahati, “Sogoola uyipime iNyumba yaane iMfinjile ni shifinjilo shaakwe, uvhavhaazye niivho vhe vhakupuuta muumwo.

² Ileelo uluvhungaano ulwa kunzi ululeshe ishisita kulupima, mwe pe ulwenelwo vhapeliilwe vhe vhatakumwitiha uMulungu. Vhoope vhaliyihanyanjila iNkaaya iMfinjile ameezi 42.

³ Niine, ndiivhapa amaha avhahoome vhaane vhavhili, vhoope vhaliifumwa uvhukuvhwi insiku 1,260, she vhazwaye amenda aga magunila kulolesya uvhuswimiilizu.”

⁴ Avhahoome ivho, makwi aga mazayituuni gavhili ni visajishilo ivwa nyaale vivhili vwe vili pilongolela ilya Mulungu, uMWENE uwa nsi zyonti.

⁵ Inga umuntu wonti akwanza kuvhananga, umwoto wukufuma mu malomu gaavho nu kuvhalovwa avhalugu vhaavho. Vhwevhulo, vwe umuntu wonti we aliyanza kuvhananga, aliifwa.

⁶ Ivha vhali na maha aga kudindila kumwanya, kuuti imvula yitahatoonye ku nsiku zyonti zye vhakufumwa uvhukuvhwi vhwavho. Havhili vhali na maha aga kugagalulanya aminzi gonti gavhe mavhanda nu kuleeta imfwa izya mavhiila mu mavhiila mu nsi yonti inza vwe vhasungwa.

⁷ Lwe vhaamala kufumwa uvhwahoome vhwavho, ishihanu she shikufuma kwi ilivha ilya ku vhuzimu shiliilwa navho, shoope shilivhapoota nu kuvhagoga.

⁸ Ivwala vwavho viliivha mwi idala ipiti ilya nkaaya yiila impiti, ye ku miivhi yikwitwa iSodooma poosye iMiisili. Panaapo pe vhámuhomeleeye uMwene waavho uYeesu Chilisiti pa shihovhenkanyo.

⁹ Avhantu avha mpuga zyonti na vha nkolo zyonti na vha njango zyonti na vha nsi zyonti, vhalivilola ivwala vwavho ku nsiku zitatu ni shigavho shooka pa vigavho vivhili ivwa isiku, te vhahavheele kuvisyila.

¹⁰ Avhantu vhonti vhe vhakutendama pa nsi, vhaliseshela nu kudovhela nu kufumwizanya ivipeelwa ku mfwa izya vhahoome ivho vhavhili. Vhalivhomba isho, mwe pe avhakuvhwi ivho vhávhayimvwizye vhe vhakutendama pa nsi ipa.

¹¹ Ileelo lwe ahavhaliilizyo aha nsiku zitatu ni shigavho shooka pa vigavho vivhili ivwa isiku hatuuha, umwuyu uwa vhupuuma we wukufuma kwa Mulungu wuhavhinjila, vhoope vhahimiilila. Avhantu vhahoogopa nkaani lwe vhavhalola vhakuzyuha.

¹² Pe avhakuvhwi vhavhili vhaala vhahiivwa izwi ipiti kufuma ku mwanya likuvhavhuuzya kuuti, “Zuvhi uku!” Vhoope vhahazuvha ku mwanya mwi ivhingo, she avhalugu vhaavho vhakuvheenya.

¹³ Ahavhaliilizyo hanaaho kuhavha ishisumbi ishipiti, ishigavho shooka pa vigavho 10 ivwa nkaaya shihabongonkana. Avhantu 7,000 vhahafwa ku shisumbi isho, vhe vhasyaye vhahoogopa nkaani, vhahamushindiha uMulungu uwa ku mwanya.

¹⁴ Imfwa iya vhuvhili yatuuha, imfwa iya vhutatu yipalamiiye kwinza.

Isaji ilya 7

¹⁵ Pe uhavhizya uwa 7 ahahoma isaji lyakwe, nkiivwa amazwi amapiti ku mwanya, gahati, “Uvhumwene uvhwa pa nsi vhwavha vhumwene uvhwa MWENE wiitu uMulungu havhili vhwa Chilisiti waakwe, woope uMWENE alikonzya shiima shiima.”

¹⁶ Vhoope avhasongo 24 vhe vhakutendama mu vitengo vwavho ivwa vhumwene pilongolela ilya Mulungu vhahakupama, vhahamupuuta uMulungu.

¹⁷ Vhahati, “Tukukusalifwa iwe, MWENE Mulungu uwa Maha Gonti, we uliipo na we wáliipo, mwe pe ulolesiizye amaha gaaho amasisya nu kutaliha kukonzya.

¹⁸ Avhantu avha kunzi vhávisiitwe, ileelo umulaha wuhakulema. Ahavhaliilizyo hahafiha aha kuvhalonga vhe vháfuuye, na ha kuuvhapa ivipeelwa avhavhomvi vhaaho avhakuvhwi na vhafinjile na vhe vhakulinyila izina lyaho, avhapiti na vhansi. Havhili ahavhaliilizyo hahafiha aha kuvhananganya ivho vhe vhakunanganya insi.”

¹⁹ Pe iNyumba iMfinjile iya Mulungu ye yili ku mwanya yihiiguha. Imbogooso iya Mulungu iya lufingwi yihaloleha mu Nyumba iyo. Kuhavha ulumesyo, izwi lye likujilima, ishisumbi ni mvula impiti iya mavhwe.