Ishitushizya 1 - ULufingwi uLupwa

Amazwi aga kutalishila

¹ Ishi, shitushizya isha Yeesu Chilisiti. UMulungu ámupiiye ishenesho, inga avhalolesye avhavhomvi vhaakwe zye kuuti zivhombeshe ishisita kuhaavha. UYeesu ahamulolesya uYoohani umuvhomvi waakwe kutuushila kwa havhizya waakwe.

² Pe woope uYoohani ahahomeshezya zyonti zye ázivhwenyi, zye lizwi lya Mulungu nu vhwahoome uvhwa Yeesu Chilisiti.

³ Alosiitwe we akuvhavhaazizya imwe amazwi aga vhukuvhwi vhwe vhusimviilwe umu, havhili mulosiitwe na mwe mukugatejeelezya nu kugalema, mwe pe ahavhaliilizyo he kuuti galunjishe hapalamiiye.

Umulaamu

⁴ Ikalaata ili nsimvile ne neene ne Yoohani. Nkuvhasimbila mwe vha vivhanza 7 ivwa mu nsi iya Aasiya. Muvhanje nu vhwila nu vhutehamu vhwe vhukufuma kwa Mulungu, uweene we áliipo na we aliipo na we aliyinza. Havhili muvhanje nu vhwila nu vhutehamu vhwe vhukufuma ku Mpepo 7 zye zili pilongolela ilya shitengo shaakwe isha vhumwene,

⁵ havhili vhwe vhukufuma kwa Yeesu Chilisiti. Uweene we wu hoome uwa nalyoli, we mutanzi kuzyuha, havhili we mupiti uwa vhamwene vhonti avha mu nsi. UYeesu Chilisiti we atukunzite, havhili atusatuuye mu vhutalamalandu vhwitu, kutuushila mu mavhanda gaakwe.

⁶ Uweene we ahatwinjizya mu vhumwene vhwakwe nu kutuvhiiha tuvhe swe vhapuuti vha Mulungu, uTaata waakwe. Uvhushindamu na maha vivhe nu weene shiima shiima! Amina!

⁷ Yeenyi, akwinza na mavhingo! Avhantu vhonti vhalimulola, poosye vhe vhámulasile ni mpalala, na vhantu avha nsi zyonti vhalikuuta nu kuloosya ku zyakwe. Nalyoli! Amina.

⁸ UMWENE uMulungu akuyanga akuti, “Ine ne Aalufa havhili ne Omeega, uweene we áliipo na we aliipo na we aliyinza, havhili uweene Wa Maha Gonti.”

UYoohani akumulola uChilisiti mu njozi iya pa minso amazelu

⁹ Ine ne Yoohani, ne wamwinyu havhili ne indi pooka niimwe, kuzya kumulandata uYeesu Chilisiti mu mayimba na mu vhumwene na mu vhujimbiilizu. Nákunziilwe mu nsi inyuumu, ye vhakuti Paatimo ye yáamile pahati pa sumbi, kuzya mayimba. Amayimba igo gáfumiliine nu kulumbiilila izwi ilya Mulungu, nu kufumwa uvhwahoome uvhwa Yeesu Chilisiti.

¹⁰ UMupepo uMufinjile ánishiiye pi isiku ilya MWENE uMulungu, nkiivwa izwi ipiti ngati lya isaji mwisinda lyane.

¹¹ Izwi ilyo lihambuuzya lihati, “Izi zyonti zye ukuzilola, uzisimbe mwi ikalaata. Lwe wazisimba, ulitwale ikalaata mu vivhanza 7 ivwa mu nkaaya izya Hefeeso ni Siimina ni Pegaamo ni Tiyatiila ni Saadi ni Filadelufiya ni Lawodikiya.”

¹² Pe nkashevhela, inga imulole we akuyanga niine. Lwe nashevhela, nkalola ivisajishilo ivwa sahaabu ivwa nyaale 7.

¹³ Pahati ya visajishilo nkamulola wumo we áali ngati Mwana wa Aadamu, ázwaye inkanzu intali nu kuyipinya ilamba ilya sahaabu pa shifuvha.

¹⁴ Kwi itwe áali ni nsisi inzelu ngati masepe amazelu, havhili ngati nganda inzelu mpee. Aminso gaakwe gahamekuhaga ngati mwoto.

¹⁵ Ivinama vwakwe vihamekuhaga ngati shaaba ye vhayizelufwizye mwi isyanilo, havhili izwi lyakwe lyáli ngati minzi aminji ge gakwishila ku nsaato.

¹⁶ Woope mu nyoovhe yaakwe iya kundiilo, áamile ni nzota 7. Havhili ipanga ihozu kwonti lihafumaga mwi ilomu lyakwe. Ku minso kuhalamaga ngati lizuvha ihali nkaani.

¹⁷ Lwe namulola, nkagwila pa vinama vwakwe ngati muntu we afuuye. Ileelo ahandema ni nyoovhe yaakwe iya kundiilo ahati, “Utogopaje! Ine ne Vhwandilo havhili ne Vhusililishilo,

¹⁸ uweene we Mulanzi. Ine náfuuye, ishi yeenya, ne mupuuma shiima! Ine indi ni vwigulilo ivwa vhufwe ni vwa ku vhuzimu.

¹⁹ “Pe ishi, uzisimbe zyonti zye wazilola, kwe kuuti zye ziliipo na zye ziliyinza.

²⁰ Inzota 7 zye wazilola nzilemile ku nyoovhe yaane iya kundiilo, vhe vhahavhizya avha vivhanza viila 7. Havhili ivisajishilo ivwa sahaabu ivwa nyaale 7 vivhanza ivwo 7.”