iMbombo izya Vhatumwa 3 - ULufingwi uLupwa

UPeeteli akumuponia untendya

¹ Isiku limo ahavhaliilizyo aha kulaavha, saala 9 iya musanya, avha Peeteli nu Yoohani vhahasogolaga ku Nyumba iMfinjile.

² Ipo páamile umuntu wumo we áamile wu ntendya kufuma kupaapwa. Avhantu vhahamuvhusyaga nu kumuvhiiha pa shikwilo isha Nyumba iMfinjile insiku zyonti. Ishikwilo isho avhantu vhahatinji, iShikwilo iShinza. Vhahamuvhiihaga inga alaavhaje impiiya ku vhantu vhe vhahinjilaga mu lupitu ulwa Nyumba iMfinjile.

³ Umuntu uyo, lwe avhalola avha Peeteli nu Yoohani vhakwinjila mu Nyumba iMfinjile, ahavhalaavha vhaamupe impiiya.

⁴ Pe uPeeteli nu Yoohani vhahamutontomela, uPeeteli ahamuvhuuzya ahati, “Twenye!”

⁵ Woope umuntu uyo ahavheenya nu kusuuvhila kuuti kwe vhaamupe shimo.

⁶ Ileelo uPeeteli ahamuvhuuzya ahati, “Ine ntali ni mpiiya, ileelo lye ingavhomba, kwe nkuvhombele. Ku maha aga izina ilya Yeesu Chilisiti uwa ku Naazaleeti, yimiliila ujendaje!”

⁷ UPeeteli ahamulema umuntu uyo inyoovhe iya kundiilo nu kumwimiilisya. Panaapo vhweleele inyaayo ni vihankala ivwa mu vinama ivwa muntu ula vihagoma.

⁸ Ahimiilila naluvhiilo, ahataliha kujenda weeka. Uweene pooka nu Peeteli nu Yoohani vhahinjila mu lupitu ulwa Nyumba iMfinjile. Ahajendaga kumo akudovha nu kumutiima uMulungu.

⁹ Avhantu vhonti vhahamulola akujenda wuuyo weeka kumo akumutiima uMulungu.

¹⁰ Pe vhahamumanya kuuti, we wula we ahatendamaga nu kulaavha impiiya pa shikwilo isha Nyumba iMfinjile she vhahatinji iShikwilo iShinza. Vhonti vhahasukumila nkaani ku zye zyávhombesile ku kwakwe.

UPeeteli akulumbiilila

¹¹ Umuntu ula we vhámuponiizye, lwe akuvhalandata avha Peeteli nu Yoohani, avhantu vhonti vhahasukumilaga nkaani. Pe vhahanda kuvhashimbiilila kufishila pe vhahatinji Idala iLyilishe ilya Solomooni.

¹² UPeeteli lwe avhalola avhantu ivho, ahavhavhuuzya ahati, “Mwe vhantu vha mu Isilayeeli, shooni she mukusukumila kuli izi? Shooni she mukututontomela iswe? Mukuti umuntu uno twamuponia ku maha giitu, pamo mwe pe iswe tuli nu lujendo ulwinza pilongolela ilya Mulungu?

¹³ UMulungu uwa vhataata vhiitu, avha Aabulahamu nu Yisaaka nu Yaakobu, amushindisile umuvhomvi waakwe uYeesu, we imwe mwámulonjeleeye ku vhapiti nu kumuhaana lwe uPilaato akuti amusatule.

¹⁴ Imwe muhamuhaana uYeesu, we Mufinjile wa Mulungu havhili Mugolosu. Ileelo muhalaavha kuuti, umuntu we mugozi we asatulwe!

¹⁵ Muhamugoga uweene we áali vhwandilo uvhwa vhulanzi, ileelo uMulungu ahamuzyusya. Iswe tuhomesheziizye izyo.

¹⁶ Ishi umuntu uno we mukumulola, mumumanyile. Izina ilya Yeesu nu kulyitiha izina ilyo, vwe vwamupa amaha. Inza vwe mukumulola mwenti, aapona, mwe pe amwitiha uYeesu.

¹⁷ “Ishi vhamwitu, imanyile kuuti imwe na vhapiti vhiinyu mwávhomvile izyo, mwe pe mutámanyile.

¹⁸ Ileelo uMulungu kuli izyo zye zyávhombesile, ágalunjisiizye amazwi gaala ge áyanzile kutuushila mu vhakuvhwi vhaakwe vhonti, kuuti uChilisiti waakwe aliyimvilwa.

¹⁹ Ishi pinduushi nu kuzileha imbiivhi zyinyu, mumulandate uMulungu inga avhaswile uvhutalamalandu vhwinyu. Pe haliyinza ahavhaliilizyo he mulisankaana, mwe pe muliivha nu MWENE uMulungu.

²⁰ Havhili, alivhaleetela uChilisiti we ávhasevheeye kufuma hali, we we wu Yeesu.

²¹ UYeesu akwanzilwa kusyala ku mwanya, kufishila ahavhaliilizyo he uMulungu alivigalulanya ivintu vwonti kuvha vipwa, inza vwe uweene áyanzile kufuma hali, kutuushila ku vhakuvhwi vhaakwe avhafinjile.

²² Mwe pe umukuvhwi uMoose áyanzile átili, ‘Muli imwe, uMWENE wiinyu uMulungu alivhasevhela umukuvhwi we ali inza ine. Amazwi gonti ge umukuvhwi uyo alivhavhuuzya, muhagatejelezyaje ahinza.

²³ Umuntu wonti we alihaana kumutejeelezya umukuvhwi uyo, uMulungu alimwefwa mu vhantu vhaakwe nu kumulovwa.’

²⁴ Poosye avhakuvhwi vhonti, kwandila umukuvhwi uSaamweli na vhanji vhe vhámulandasite, vhákuvile uvhukuvhwi ku zyonti zye zikuvhombeha insiku izi.

²⁵ Izyo zye uMulungu áyanzile kutuushila ku vhakuvhwi ivho, imwe mwe mukuziposheela. Havhili zye uMulungu áfinzile na vhataata vhiinyu, imwe mwe mukuziposheela. UMulungu áfinzile nu taata wiitu uAabulahamu kuuti, ‘Avhantu avha mu nkolo zyonti mu nsi yonti vhalilootwa kutuushila mu vhazukulu vhaaho.’

²⁶ Pe lwe uMulungu amusevha umuvhomvi waakwe uYeesu, ahamusonteelezya kuli imwe suuti, inga avhaloote kwi idala ilya kuvheefwa mu mbiivhi zyinyu.”