iMbombo izya Vhatumwa 2 - ULufingwi uLupwa

Avhantu vhakumuposheela uMupepo uMufinjile

¹ Lwe isiku ilya Pentekoositi lyafiha, avhantu vhonti vhe vhámwitisile uYeesu, vhávhungiine pooka.

² Naluvhiilo izwi lihivwiha kufuma ku mwanya. Izwi ilyo lyáli ngati nkungu impiti ye yikuvugula, lihiizula mu nyumba yonti mwe vhátendiime.

³ Vhahalola ivintu vwe vili ngati mwoto we wukulilimuha, vihatapunkana nu kumugwila wooka wooka.

⁴ Avhantu vhonti vhahiizula uMupepo uMufinjile, vhahataliha kuyanga ku njango izinji, inza vwe uMupepo uMufinjile ávhaloosite.

⁵ Mu Yelusaleemu umwo, vháliipo aVhayuuda vhe vhahamushindihaga uMulungu. Ivho vháfumile mu nsi zyonti.

⁶ Lwe vhiivwa izwi ilyo, avhantu impuga impiti vhahavhungaana pooka, vhahasukumila, mwe pe ivho vhonti vhahivwaga vhakuyanga ku njango zyavho.

⁷ Vhahahasamala nu kusukumila vhahati, “Vhuli, avhantu ivha vhe vhakuyanga isho, te vha mu Galilaaya?

⁸ Vhulivhuli iswe swenti tukwivwa zye vhakuyanga mu njango zye twápafwilwe nazyo?

⁹ Muli iswe, vhamo vhafumile mu nsi iya Vhapaliiti ni ya Vhameedi ni ya Vhayelaami ni ya Vhamesopotaamiya. Vhamo vhafumile mu shigavho isha nsi isha Yudeeya ni sha Kapadokiya ni sha Ponto ni sha Aasiya

¹⁰ ni sha Fuligiya ni sha Pamufiiliya na mu nsi iya Miisili. Vhamo vhakufuma imbazu izya nsi iya Liibiya zye zipalamiine ni nkaaya iya Kileene, avhanji vhinzile kufuma mu nkaaya iya Luumi. Muli iswe, vhaliipo aVhayuuda na vhantu avhanji vhe vhinjiiye mu shipuuto isha Vhuyuuda.

¹¹ Vhamo vhafumile mu nsi inyuumu iya pahati pa sumbi ye vhakuti iKileete, na mu shigavho isha nsi isha Alaabiya. Swenti tukwivwa vwe vhakuyanga mu njango zyitu, vhakumutiima uMulungu ku mbombo zyakwe impiti!”

¹² Avhantu vhonti vhahasukumila nkaani nu kusaaga, vhahavhuzilizanya vhahati, “Ishi she shooni?”

¹³ Ileelo vhamo munuumwo vhahataliha kuvhajevhula vhe vhámwitisile uYeesu, vhahayanga vhahati, “Ivha vhahoziilwe lipele.”

UPeeteli akuvhila

¹⁴ Pe uPeeteli ahimiilila pooka na vhatumwa avhamwavho vhaala 11, ahataliha kuvhavhilila avhantu vhaala kwi izwi ipiti kuuti, “Mwe Vhayuuda vha mu Yelusaleemu, niimwe mwe Vhayuuda avha mu nsi izinji, tejeelezyi ahinza amazwi ge nkuvhavhuuzya.

¹⁵ Avhantu ivha vhatahoziilwe inza vwe mukusiivha, mwe pe ahavhaliilizyo iha, saala taatu inzanshi!

¹⁶ Izi zye uMulungu áyanzile kutuushila kwa mukuvhwi uYooweli kuuti,

¹⁷ ‘Ku manda aga kumpeleela, ndiivhapa avhantu vhonti uMupepo waane ku vhwinji. Avhaana vhiinyu avhanaavuli na vhalindu vhalikuvhwaga uvhukuvhwi, avhaana vhiinyu avhajaaha vhalilolaga injozi izya pa minso amazelu, vhoope avhasongo vhalilootaga injozi.

¹⁸ Mu manda igo ndiyiita uMupepo waane ku vhwinji poosye ku vhavhomvi vhaane avhanaavuli na vhantanda, vhoope vhalikuvhwaga uvhukuvhwi.

¹⁹ Ndivhombaga izya kusukumizya ni vilolesyo ku mwanya na pa nsi. Ipo paliivha amavhanda nu mwoto ni lyosi ilyinji nkaani.

²⁰ Izuvha liligalunkana kuvha shiisi, nu mwezi wuliivha mushemamu inza amavhanda. Zyonti izyo zililoleha, lwe uvhushindamu uvhwa Mwene vhushiili kuloleha pi isiku liila ipiti ilya kwinza kwakwe.

²¹ Ahavhaliilizyo iho, umuntu wonti we alivhilishila kumulaavha uMwene, aliipokwa.’”

²² UPeeteli ahajendeelela kuyanga kuuti, “Mwe vhanaavuli vha mu Isilayeeli, tejeelezyi amazwi iga! UMulungu avhalolesiizye imwe kuuti akuvhomba imbombo kutuushila kwa Yeesu uwa ku Naazaleeti. Mweneemwe mumanyile ahinza kuuti kwa Yeesu wunuuyo kwe avhomvile amafindango ni zya kusukumizya ni vilolesyo kuli imwe.

²³ Inza vwe uMulungu ámanyile nu kusivhiilila kuvhomba kufuma hali, ahamuleeta uYeesu kuli imwe. Niimwe muhamugoga kwi idala ilya kuvhasonzya avhatalamalandu kuuti vhamuhomeele pa shihovhenkanyo.

²⁴ Ileelo uMulungu ahamuzyusya, ahamusatula mu mayimba aga vhufwe, mwe pe vhutáali na maha aga kumumeneelezya.

²⁵ Utaata wiitu uDaavhudi áyanzile izya Yeesu átili, ‘Nkamulolaga uMWENE uMulungu kwilongolela lyane insiku zyonti, havhili ali pooka niine ku luvhazu lwane ulwa kundiilo kunaavwa, kuli izyo, ntangoogopa.

²⁶ Umwoyo waane wuhasansamuha, pe nkadovhela ku luseshelo. Havhili umuvhili waane wuliivha nu lusuuvhilo,

²⁷ mwe pe te uhandeshe ku vhuzimu, poosye kwitishila kuuti umuvhili waane vhufishile kuvhola, ine ne Mufinjile waaho.

²⁸ Undanzile amadala aga vhulanzi. Ulimpa uluseshelo ulupiti nkaani, mwe pe indi pooka niiwe.’

²⁹ “Vhamwitu, ntangavhazyiha kuuti utaata wiitu uDaavhudi áfuuye, avhataata vhiitu vhahamusyila, imbiipa yaakwe yili panaapa kufishila ileelo.

³⁰ Ileelo uDaavhudi ámanyile kuuti uMulungu álafile ku lufingwi kuuti alimupwaniha umuntu uwa luho lwakwe mu vhumwene vhwakwe. Havhili, mwe pe áali mukuvhwi,

³¹ ávhwenyi zye zilifumila. Pe ahayanga izya kuzyuha kwa Chilisiti kuuti, uMulungu te ahamuleshe ku vhuzimu, poosye kwitishila kuuti umuvhili waakwe vhufishile kuvhola.

³² “UMulungu ahamuzyusya uYeesu uyo, swenti tuhomesheziizye inongwa izi.

³³ Lwe uMulungu amuzyusya, ahamuzuvwa nu kumuvhiiha ku luvhazu lwakwe ulwa kundiilo pa vhushindamu uvhupiti nkaani. Pe ahaposheela uMupepo uMufinjile kufuma kwa Taata, we áfinzile, ahatwitila wenewo ku vhwinji, izyo zye mukuzilola, nu kuzyivwa.

³⁴ UDaavhudi atahayitahaga wuuyo, mwe pe uweene atázuvile ku mwanya. Ileelo áyanzile átili, ‘UMWENE uMulungu ámuvhuziizye uMwene waane átili, “Tendaama ku luvhazu lwane ulwa kundiilo pa vhushindamu uvhupiti nkaani,

³⁵ kufishila pe navhavhiiha avhalugu vhaaho pansi pa vinama vwaho.”’”

³⁶ UPeeteli ahati, “Ishi, aVhaisilayeeli vhonti vhamanye kuuti uYeesu we imwe mwámugozile pa shihovhenkanyo, uMulungu amuvhiisile kuvha wu Mwene havhili wu Chilisiti.”

³⁷ AVhayuuda vhaala, lwe vhiivwa inongwa izyo zihaavhasya nkaani mu mooyo gaavho. Pe vhahavhavhuziilizya avha Peeteli pooka na vhatumwa avhamwavho vhahati, “Vhamwitu, ishi tuhonzye vhuli?”

³⁸ UPeeteli ahavhaamula ahati, “Mwenti mupindushe nu kwozelwa kwi izina ilya Yeesu Chilisiti, inga muswilwe uvhutalamalandu vhwinyu nu kuposheela ishikunjilwa, kwe kuuti uMupepo uMufinjile.

³⁹ Ulufingwi ulwo uMulungu áfinzile kuli imwe na ku vhaana vhiinyu na ku vhantu avha kutali, kwe kuuti ku vhaala vhonti vhe uMWENE uMulungu alivhiita.”

⁴⁰ UPeeteli ahajendeelela kuvhasoha nu kuvhahomeelezya avhantu vhaala ku mazwi aganji aminji, ahati, “Imwe muyiposhe, mutahinze musundwe pooka na vhantu avhavhiivhi avha havhaliilizyo iha!”

⁴¹ Avhantu avhinji vhahagiitiha amazwi gaakwe isiku liila, vhahoozelwa, vhahonjela avhantu vhe vháfishiiye 3,000 ishi.

Uvhuliilani uvhwa vhantu vhe vhámwitisile uYeesu

⁴² Avhatumwa avha Yeesu vhahasambilizyaga izwi ilya Mulungu ku vhaala vhe vhámwitisile. Vhonti vháamile nu vhuliilani, vhahamensulanaga ikaati nu kulya pooka, nu kumulaavha uMulungu pooka.

⁴³ Avhatumwa vhahavhombaga izya kusukumizya inyinji ni vilolesyo ivwinji, na vhantu vhonti vhahasukumilaga nkaani nu kumunyila uMulungu.

⁴⁴ Avhantu vhe vhámwitisile uYeesu, vhonti vháamile pooka, havhili ivintu vwavho vhahagavhanaga vhonti.

⁴⁵ Vhahakazyaga ivintu vwavho ni mpiiya zye vhaposheela, vhahazigavhanyaaga kulandatana na vwe vhásovheliilwe.

⁴⁶ Vhahavhungaanaga pa Nyumba iMfinjile insiku zyonti. Havhili vhahavhungaanaga mu nyumba zyavho kumensulana ikaati nu kulya ishaakulya shaavho pooka ku mwoyo umwinza nu luseshelo.

⁴⁷ Vhahamutiimaga uMulungu, nu kuvhahondezya avhantu vhonti. Insiku zyonti, uMwene uYeesu ahonjezyaga avhantu avhanji vhe vhahapokwaga.