iMbombo izya Vhatumwa 10 - ULufingwi uLupwa

UKolineeliyo akumwita uPeeteli

¹ Mu nkaaya iya Kayisaaliya mwámile umuntu wumo we atáamile Muyuuda, izina lyakwe vhahatinji uKolineeliyo. Áamile mupiti wa vhasikaali avha Shiluumi, ahalongozyaga avhasikaali 100, kufuma mu mpuga impiti iya vhasikaali ye vhahatinji iMpuga iya Vhaitaaliya.

² Havhili áamile muntu umugolosu, uweene pooka na vhantu vhonti avha mu nyumba yaakwe vhahamunyilaga uMulungu. Ahamulaavhaga uMulungu amanda gonti nu kuvhaavwa nkaani avhapiina.

³ Isiku limo mu havhaliilizyo aha saala 9 iya musanya ishi, uKolineeliyo ahalola injozi iya pa minso amazelu. Mu njozi iyo, uhavhizya uwa Mulungu ámulolesheeye. Uhavhizya uyo ahamuvhuuzya ahati, “We Kolineeliyo!”

⁴ UKolineeliyo ahamutontomela uhavhizya uyo kwi lyoga, ahamuvhuziilizya ahati, “We mwene, kuli shooni?” Uhavhizya ahamuvhuuzya ahati, “UMulungu ayiivwa kulaavha kwaho, havhili azyitiha impuutile zyaho zye ukuvhaavwa avhapiina. Zyonti izyo azimanyile, akuzikumbuha ku mwanya.

⁵ Pe ileelo ishi, usonteelezye avhantu ku Yaafa, vhamwite umuntu we vhakuti uSiimoni, izina ilyamwavho vhakuti uPeeteli.

⁶ Uweene mujeni uwa muntu we vhakuti uSiimoni, we akugomba amakwembe. Inyumba yaakwe yili pa luvhazu pa sumbi.”

⁷ Lwe uhavhizya aamala kumuvhuuzya uKolineeliyo, aheepa. Pe uKolineeliyo ahavhiita vhavhili mu vhavhomvi vhaakwe, pooka nu musikaali wooka mu vhatuuli vhaakwe. Woope umusikaali uyo ahamupuutaga uMulungu.

⁸ UKolineeliyo ahavhavhuuzya zyonti zye uhavhizya ámulajiziizye, ahavhasonteelezya ku Yaafa.

UPeeteli akulola injozi iya pa minso amazelu

⁹ Isiku ilya vhuvhili mu havhaliilizyo aha saala 6 umusanya ishi, avhantu vhe uKolineeliyo ávhasonteleziizye, vhahapalamila kufiha ku Yaafa. Mu havhaliilizyo hanaaho, uPeeteli woope ahazuvha pamwanya pa nyumba, inga amulaavhe uMulungu.

¹⁰ Inzala yihamuluma, ahanzaga kulya. Lwe vhali kuteleha ishaakulya, ahalola injozi iya pa minso amazelu.

¹¹ Mu njozi iyo, ahalola ku mwanya kwigusile, havhili ishintu she sháali ngati ligolole ipiti lye lilemwilwe imbazu zyonti zine, shikwiha pansi.

¹² Muhati yaakwe mwámile ivihanu ivwa nkolo zyonti. Mwámile ivihanu ivwa vinama vine na vwe vikukwesuha ni nyunyi.

¹³ Pe uPeeteli ahiivwa izwi, likumuvhuuzya kuuti, “We Peeteli, vhuuha! Vhoola ulye!”

¹⁴ UPeeteli ahalyamula ahati, “Ndaali Mwene! Ntahalya naalumo ishintu shonti she shikuhombezya!”

¹⁵ Pe izwi ilyo lihamuvhuuzya havhili uPeeteli lihati, “Ivintu vwonti vwe uMulungu avizelufwizye, iwe utatinji vikuhombezya.”

¹⁶ Izwi ilyo lihavhuyiizya lutatu lwonti, pe naluvhiilo igolole liila lihagaluha ku mwanya.

¹⁷ Lwe uPeeteli akuyivhuziilizya kuuti injozi iyo kwe kuuti vhuli, avhantu vhaala vhe uKolineeliyo ávhasonteleziizye vhahafiha ku Yaafa, vhahavhuziilizya inyumba iya Siimoni. Lwe vhapamanya, vhahimiilila pa mulyango.

¹⁸ Vhahiiguzya nu kuvhuziilizya kuuti, “Vhuli, ipa pe akudiila uSiimoni we vhakuti uPeeteli?”

¹⁹ Lwe uPeeteli akusiivha izya njozi iyo, uMupepo uMufinjile ahamuvhuuzya ahati, “Siimoni, pansi ipo pali avhantu vhatatu vhe vhakukwanza.

²⁰ Yiiha, usogole pooka navho, utahasingaane, mwe pe neene mbasonteleziizye.”

²¹ UPeeteli lwe ayiiha pansi, ahavhavhuuzya avhantu vhaala ahati, “Ine ne neene ne mukundondola. Ishi, mwinzile kuuti vhuli?”

²² Vhahamwamula vhahati, “Umupiti wumo uwa vhasikaali we izina lyakwe wu Kolineeliyo, atusonteleziizye. Uweene muntu umugolosu, havhili we akumunyila uMulungu na Vhayuuda vhonti vhakumutiima. Ishi, uhavhizya umufinjile amulajiziizye kuuti akwite, usogole mu nyumba yaakwe, inga atejeelezye amazwi ge kwe umuvhuuzye.”

²³ Pe uPeeteli ahinjila navho mu nyumba, vhahavha vhajeni vhaakwe. Lwe kwasha, uPeeteli na vhantu avha Kolineeliyo vhahasogola, avhamwavho vhamo avha ku Yaafa, vhahalandatana nawo.

UPeeteli mu nyumba iya Kolineeliyo

²⁴ Lwe kwasha havhili, vhahafiha mu Kayisaaliya. Ukwo uKolineeliyo ahavhagulililaga, ávhavhunganisile avhajenzi vhaakwe, pooka na vhamanyani vhaakwe.

²⁵ Lwe uPeeteli aafiha, uKolineeliyo ahamuposheela, ahasugamila pansi pa vinama vwakwe nu kumupuuta.

²⁶ Ileelo uPeeteli ahamuvhuusya, ahamuvhuuzya ahati, “Yimiliila! Niine ne muntu inza weneewe!”

²⁷ Pe uPeeteli ahinjila pooka nu Kolineeliyo mu nyumba she vhakuyanga, ahaaga avhantu avhinji vhavhungiine.

²⁸ UPeeteli ahavhavhuuzya ahati, “Imwe mumanyile ahinza kuuti iswe swe Vhayuuda, indajizyo zyitu zikuhaana kusangaana na vhantu vhe te Vhayuuda. Poosye kutandalilana navho, tutakwitishilwa. Ileelo uMulungu andanzile kuuti ntamuvhuzyaje umuntu wonti kuuti muhandamanu.

²⁹ Kufumililana niizyo, lwe mwaniita ninzile ishisita kusingaana. Ishi nkuvhavhuziilizya kuuti, shooni she muniisite?”

³⁰ UKolineeliyo ahamwamula ahati, “Zyatuuha insiku zitatu kufuma ahavhaliilizyo he namulaavhaga uMulungu mu nyumba yaane ino, ahavhaliilizyo inza hanaaha aha mu saala 9 iya musanya. Naluvhiilo nkalola umuntu ayimiliiye pilongolela lyane azwaye amenda ge gakunyengʼenyela.

³¹ Ahambuuzya ahati, ‘We Kolineeliyo! UMulungu ayiivwa kulaavha kwaho nu kuzyitishila impuutile zyaho zye ukuvhaavwa avhapiina.

³² Pe ishi, uvhasonteelezye avhantu vhasogole vhamwite uSiimoni we vhakuti uPeeteli. Akutendama ku Yaafa, kwa muntu we izina lyakwe vhakuti uSiimoni we akugomba amakwembe. Inyumba yaakwe yili pa luvhazu pa sumbi.’

³³ Izyo zye zimbiisile kuuti nkalambane kusonteelezya avhantu inga vhakwite, niiwe wavhomba ahinza kwinza. Ishi swenti tuli pilongolela ilya MWENE uMulungu, inga tutejeelezye amazwi gonti ge akulajiziizye kuuti utuvhuuzye.”

³⁴ Pe uPeeteli ahavhavhuuzya ahati, “Ishi pe naamanya kuuti, nalyoli uMulungu atakusavhulanya!

³⁵ Ileelo akuvhiitiha avhantu avha mu nsi zyonti, vhe vhakumunyila nu kuvhomba zye zihondeeye pilongolela lyakwe.

³⁶ Imwe mumanyile kuuti uMulungu ásonteleziizye avhantu vhaakwe kuvhalumbiilila aVhaisilayeeli Izwi iLyinza kuuti vhaliivha nu vhutehamu nu weene kwi idala ilya Yeesu Chilisiti, we wu Mwene uwa vhantu vhonti.

³⁷ Mumanyile zye zivhombesile mu nsi yonti iya Vhayuuda, kwandila ku Galilaaya, kufuma lwe ahavhaliilizyo hatuuha he uYoohani ahavhalumbililaga avhantu kuuti vhoozelwe.

³⁸ Kwe kuuti mumanyile vwe uMulungu ámusavhuuye uYeesu uwa ku Naazaleeti kwi idala ilya kuumupa uMupepo uMufinjile na maha. Ahavha pooka nawo, ahamuvhiiha kuuti avhombaje inyinza mu vhantu ponti, ahaponia vhonti vhe vhahayimvilwaga na maha aga Mukwalanzi.

³⁹ “Zyonti izyo zye uYeesu ávhomvile mu nsi iya Vhayuuda, na mu nkaaya iya Yelusaleemu, iswe swe vhahoome. Pisinda, vhahamugoga kwi idala ilya kumuhomeela pa shihovhenkanyo.

⁴⁰ Ileelo isiku ilya vhutatu, uMulungu ahamuzyusya, ahamulolesya ku vhantu.

⁴¹ Atálolesile ku vhantu vhonti, nkandi kuli iswe swe twásavhuliilwe nu Mulungu kuvha swe vhahoome. Iswe swe twáliiye nu kumwela nawo lwe azyuha.

⁴² Ahatulajizya kuuti tukumusyaje ku vhantu Izwi iLyinza, nu kufumwa uvhwahoome kuuti uweene we uMulungu amuvhiisile kuuti avhe Mulonzi uwa vhapuuma na vhafwe.

⁴³ UYeesu uyo we avhakuvhwi vhonti vháyanzile kuuti, wonti we alimwitiha, aliswilwa uvhutalamalandu vhwakwe kwi izina lyakwe.”

Vhe te Vhayuuda vhakumuposheela uMupepo uMufinjile

⁴⁴ UPeeteli lwe akuyanga amazwi igo, uMupepo uMufinjile ahavhiishila vhonti vhe vhahatejelezyaga.

⁴⁵ AVhayuuda vhe vhámwitisile uYeesu vhe vháali nu Peeteli vhahasukumila lwe vhaalola kuuti, avhantu vhe te Vhayuuda vhoope ishikunjilwa isha Mupepo uMufinjile shavhiishila.

⁴⁶ Havhili vhásukumiiye, mwe pe vhívuuye vhakuyanga ku njango injeni kumutiima uMulungu. Pe uPeeteli ahati,

⁴⁷ “Avhantu ivha vhoope vhamuposheela uMupepo uMufinjile inza vwe niiswe twámuposheleeye. Wu naanu we angahaana kuuti vhatahoozelwe na minzi?”

⁴⁸ Pe ahalajizya kuuti uKolineeliyo na vhamwavho vhoozelwe kwi izina ilya Yeesu Chilisiti. Pisinda, vhahamulaavha kuuti adiile navho ku nsiku nyinsi.