Filipi 4 - ULufingwi uLupwa

¹ Ishi vhamwitu mwe mbakunzite nu kuvhasamba nkaani, imwe mwe mukumbiiha kuuti mbe nu luseshelo nu kuposheela ishipambwi. Vhankundwa mukwanzilwa kusimpa mwa Mwene uYeesu.

Indajizyo izya Paavhuli

² Nkuvhalambiilizya avha Evodiya nu Sintiike, kuuti vhavhe nu lwivwano ulwa mwa Mwene.

³ Niiwe wamwitu, muvhomvi umutungamu, nkukulaavha kuuti, uvhaavwe avhamaayi ivho vhavhili. Nkulaavha vhwevhulo, mwe pe ivho tuhayimvilwaga pooka navho kuliyanjila Izwi iLyinza izya kulipoha. Twámile pooka nu Kelementi na vhavhomvi avhamwitu avhanji, vhe amazina gaavho gasimviilwe mwi ikalaata ilya vhulanzi.

⁴ Muvhe nu luseshelo ulwa mwa Mwene uYeesu insiku zyonti, havhili nkuvhavhuuzya kuuti museshelaje!

⁵ Uvhutonsu vhwinyu vhumanyishe ku vhantu vhonti. UMwene uYeesu apalamiiye.

⁶ Mutayitamwaje ku nongwa yonti, nkandi muvhanje mukupuuta nu kulaavha pooka nu kusalifwa. Zyonti zye mukwanza zimanyihaje kwa Mulungu.

⁷ Pe uvhutehamu vhwe vhukufuma kwa Mulungu vhwe vhukuluusya injeele zyonti, vhulivhuvhatila amooyo giinyu, ni nsiivho zyinyu, mwa Chilisiti uYeesu.

⁸ Mwe vhamwitu, kumaliilizya, nkuvhavhuuzya kuuti, muvhanje mukusivhiilila zyonti zye zya nalyoli, zyonti zye zya mushinzi, zyonti zye zya muumwo, zyonti zye te nkandamanu, zyonti zye zihondeeye, zyonti zye zikutiimwa ahinza. Zyonti zye ngolosu, poosye intiimo inyinza, izyo, zye muvhanje mukusivhiilila.

⁹ Muvhombaje zyonti zye mwásambiliiye nu kuziposheela kuli ine, izyo zye mwázyivuuye nu kuzilola. Muzivhombaje izyo, pe uMulungu we akuuvhapa uvhutehamu, aliivha pooka niimwe.

UPaavhuli akuvhasalifwa aVhafiilipi

¹⁰ Nkuseshela nkaani mwa Mwene uYeesu, mwe pe ku vhusililishilo mwavhuyiizya havhili kunkumbuha. Nalyoli shiima vwe muhankumbuhaga vhwevhulo, ileelo mutáamile na havhiliilizyo aha kunaavwa.

¹¹ Te kuuti nkuyanga isho, mwe pe nsovheliilwe vimo. Nalyoli ine mbeleleeye kuyaayana na viila vwe ndi navwo.

¹² Mbeleleeye kusovhelwa, havhili mbeleleeye kuvha ni vwinji. Ahavhaliilizyo honti na ku nongwa zyonti nsambiliiye kuyaayana. Nsambiliiye kwikuta nu kuvha ni nzala, havhili nsambiliiye kuvha ni vwinji nu kusovhelwa.

¹³ Nkuvhwezya kuvhomba zyonti izyo, kwi idala ilya Chilisiti we akumpa amaha.

¹⁴ Ileelo mwávhomvile ahinza kunaavwa mu malavha gaane.

¹⁵ Mwe Vhafiilipi, niimwe vhuulo, mumanyile kuuti shitaliipo ishivhanza ishinji she shihanavwaga. Kufuma ku vhwandilo uvhwa kulumbiilila Izwi iLyinza kuli imwe, lwe neepa ku shigavho shiinyu isha nsi isha Makedooniya, mweneemwe mweka mwe tuhatulanaga kuzya kufumwa nu kuposheela.

¹⁶ Poosye lwe náamile mu nkaaya iya Tesaloniiki ku Makedooniya, muhandetelaga ivwa kwavwa ulwinji.

¹⁷ Te kuuti nkunyonywa kuposheela ivipeelwa ivwamwavho, nkandi kuuti muposheele uvhuloote ku mbombo yiinyu iya kufumwa.

¹⁸ Vhamwitu, mposheleeye ivintu vwonti viila vwe mwámusonteleziizye uEpafulodiito, kuuti andeetele. Havhili andeteeye ivwinji kuluusya vwe naasovheliilwe, pe ishi indi navwo ivwinji. Ivintu ivwo, vili ngati mpuutile iya mununsi umwinza, havhili mpuutile ye yikwitishilwa nu kumuhondezya uMulungu.

¹⁹ Woope uMulungu wiitu alivhiizuzya viila vwe musovheliilwe, kulandatana nu vhudumbwe vhwakwe uvhwa kusukumizya kutuushila kwa Chilisiti uYeesu.

²⁰ Ishi uTaata wiitu uMulungu, ashindikwaje shiima shiima! Amina!

Amazwi aga kulagana

²¹ Mundamushile avhafinjile vhonti, mwa Chilisiti uYeesu. Avhamwitu vhonti vhe tuli navho pooka ipa, vhakuvhalamuha.

²² Avhafinjile vhonti vhakuvhalamuha, inkaani ivho vhe vhakuvha mu nyumba iya Kayisaali.

²³ UMwene uYeesu Chilisiti avhafwilaje uvhwila.