Filipi 3 - ULufingwi uLupwa

Kuhondela ukwa nalyoli

¹ Pe ishi, vhamwitu, seshelaaji mwa Mwene uYeesu. Ine ntakuviitwa kuvhuyiila havhili kuvhasimbila zye návhasimbiiye, mwe pe zyenezyo zikuvhavhiiha kuuti mutahateezye ulwitiho.

² Muvhe minso ni mbwa izyo, zye vhantu vhaala vhe vhakuvhomba imbiivhi, ivho vhe vhakuhomeelezya izya kutahiili.

³ Iswe twe tutahiliilwe ku wanalyoli, mwe pe tukumupuuta uMulungu kwi idala ilya Mupepo waakwe. Tukuyitumvwizya uChilisiti uYeesu, havhili tutakusuuvhila kutahiililwa.

⁴ Ine neneene ingasuuvhila imbombo izya muvhili. Inga aliipo we akusiivha kuuti, ali na zimo zye zikumuvhiiha kusuuvhila izya muvhili, ine ne zipoosite.

⁵ Zipoosite, mwe pe lwe napaapwa nátahiliilwe isiku ilya 8. Havhili ne wa mu luho ulwa Benjamiini, mu nsi iya Isilayeeli. Havhili ne Muhebuuli uwa nalyoli, názilemile nkaani indajizyo izya Moose, mwe pe náamile ne Mufalisaayi.

⁶ Lwe náshiili kupinduha, náali nu mute nkaani kushiyimvwa ishivhanza. Inga vhugolosu vhwe vhukufumiilana nu kuzilandata indajizyo izya Moose, ntáamile nu vhunanzi.

⁷ Ileelo zyonti zye nkazilolaga kuuti lilonka kuli ine, ishi nkuzilola kuuti vhuluuzwe vhweleele kuzya Chilisiti.

⁸ Havhili te ziniizyo vhweleele, nkandi ni zyamwavho zyonti, nkuzilola kuuti she shooka nu vhuluuzwe, kuzya vhwinza vhwe vhutali ni shipimilo uvhwa kumumanya nkaani uMwene waane uChilisiti uYeesu. Uweene ku zyakwe mposheleeye uvhuluuzwe uvhwa izyo zyonti. Havhili nkuzilola inza amavi, inga imwaje uChilisiti

⁹ nu kuvha pooka nawo. Ntakusuuvhila havhili indajizyo, inga mbaazilwe kuuti ne mugolosu kuli izyo. Kuvhaazilwa kwane kuuti ne mugolosu, kuvhe kwi idala ilya kumwitiha uChilisiti. Kuvhaazilwa ukwo, kwe kukufuma kwa Mulungu, havhili kukuvha kwi idala ilya lwitiho.

¹⁰ Nkwanza kumumanya uChilisiti, na maha aga kuzyuha kwakwe. Havhili imbe na mayimba inza uweene, inga nkolane nawo poosye kufwa kwakwe.

¹¹ Nkwanza kwi idala lyonti isiku ilya kumpeleela uMulungu ahanzyusye.

Kudaga inga kufishila uvhulunjisu

¹² Ntakuti nzifishiiye zyonti izyo, havhili ntakuti ne mulunjisu ku zyonti. Ileelo nkujendeelela kudaga, inga mfishile zyonti. UChilisiti uYeesu ansavhuuye, inga mfishile izyo zyonti.

¹³ Mwe vhamwitu, ntakuvhaazya kuuti nzifishiiye izyo. Ileelo nkuvhomba lyoka vhweleele, nkuziluvwa izya mwisinda zyonti, nkulinga kuzifishila izya mwilongolela.

¹⁴ Ishi nkujendeelela kudaga, inga mposheele ishipeelwa. Ishipeelwa isho, lwito ulupiti lwe uMulungu anitiiye mwa Chilisiti uYeesu.

¹⁵ Ishi iswe twe tusimfile mu lwitiho, tusiivhaje ziniizyo. Poosye inga mukusiivha izinji ku nongwa yonti, yoope iyo uMulungu alivhalolesezya apazelu.

¹⁶ Ileelo she shikwanzilwa, tujendeelele kulandata zyonti ziila zye tufishiiye.

Avhalugu avha shihovhenkanyo isha Chilisiti

¹⁷ Mwe vhamwitu, mulandataje ishiholanyo shaane. Muvhenyaaje vhaala vhe vhakulandata ishiholanyo she twávhapiiye imwe.

¹⁸ Imbavhuuzizye inongwa izi ulwinji. Ishi havhili nkuvhuyiila kuvhavhuuzya ku mansozi, kuuti avhantu avhinji vhakulandila ngati vhalugu avha shihovhenkanyo isha Chilisiti.

¹⁹ Vhalisilila kulovha. Avhalugu ivho, impapilo zyavho we wu mulungu waavho. Vhakuyitumvwa ku nongwa zye zingavhasuupizya, havhili vhakusiivha izya mu nsi umu.

²⁰ Ileelo iswe ku kwitu kwe ku mwanya. Pe kufuma ukwo tukumuguliilila ku mwoyo uMuposhi wiitu, uMwene uYeesu Chilisiti.

²¹ Uweene aligalulanya amavhili giitu ge gayeyevhaaye, inga gaholane nu muvhili waakwe uwa vhushindamu. Alivhomba isho ku maha gaakwe aga kukonzya ivintu vwonti.