Filipi 2 - ULufingwi uLupwa

Uvhwahayiisye uvhwa Chilisiti nu vhupiti vhwakwe

¹ UChilisiti akuuvhapa umwoyo, ni shikunzi shaakwe shikuvhasuvhaalizya. Muli nu vhuliilani nu Mupepo uMufinjile, havhili mukufwilana uvhwila.

² Mwe pe zyonti izyo ziliipo, ishi nkuvhalaavha kuuti muvhe ni nsiivho zyoka nu kukundana. Havhili muvhe nu mwoyo wooka ni nsiivho zyoka. Vhwevhulo, pe kwe mumbiishe kuvha nu luseshelo ulupiti.

³ Havhili mutavhombelaje ishintu shonti ku lutumvanyo, poosye kuzya kuyitumvwa, nkandi ku vhwahayiisye. Umuntu amushindihaje uwamwavho kuluusya uweene.

⁴ Mutayivhombelaje mweneemwe mweka vhweleele, muvhavhombelaje na vhamwinyu.

⁵ Muvhe ni nsiivho ziila, zye áali nazyo uChilisiti uYeesu.

⁶ Pooka nu kuuti, kufuma hali uweene álingiine nu Mulungu, atávhwenyi kuuti kuula kulingaana nu Mulungu, shintu sha kushilemeelela.

⁷ Ileelo ahalileha ilyo, ahanyatula ishiholanyo inza isha muzya, ápafwilwe inza avhantu, ahavha muntu inza avhanji.

⁸ Ahayiisya weeka, havhili ámushindisile uTaata, ahiitiha nu kufwa, poosye uvhufwe uvhwa pa shihovhenkanyo.

⁹ Pe uMulungu ahamuzuvwa nkaani, ahaamupa izina ipiti kuluusya amazina gonti.

¹⁰ Ávhomvile vhwevhulo, inga ku mushinzi uwa izina ilya Yeesu, ivipelwa vwonti ivwa ku mwanya, poosye ivwa pa nsi, poosye ivwa ku vhuzimu, visugamile pilongolela lyakwe.

¹¹ Havhili ku vhushindamu uvhwa Taata uMulungu, avhantu vhonti vhapemule kuuti, uYeesu Chilisiti wu Mwene.

Kujendeelela mu lwitiho

¹² Vhankundwa vhaane, muhamunyilaga uMulungu lwe náali pooka niimwe. Ishi mumunyilaje inza vhwevhulo, ahavhaliilizyo iha he indi ukutali, kuluusya luula lwe náali pooka niimwe. Jendelelaaji kulunjisya uvhuposhi vhwinyu, kwi lyoga nu kutetema.

¹³ Muvhombaje isho, mwe pe uMulungu wuuyo we akuvhomba imbombo muhati zyinyu, kuuti inyinza zye akwanza, zye niimwe mwanzaje nu kuzivhomba.

¹⁴ Muvhombaje inongwa zyonti ishisita kukwinkwina, ni shisita kudalinkana.

¹⁵ Muvhe mwe vhaana avha Mulungu vhe vhalunjisile, havhili vhe vhazelufile. Mutahaavhe nu lukwinkwino, poosye uvhunanzi mu vhantu avha havhaliilizyo iha aha lukaani nu vhupuvi. Mu vhantu ivho, imwe mukuloleha inza uvhuzelu mu nsi.

¹⁶ Mugalemaje amazwi aga vhulanzi. Kuli izyo, pe niine ndiyitumvwa isiku liila lye uChilisiti aligaluha, mwe pe yililoleha kuuti, umute waane ni mbombo yaane vitáali vhweleele.

¹⁷ Inga vhangangoga, kwe mbe inza impuutile iya divaayi ye yikupungulwa kwonjeelezya impuutile yiinyu. Impuutile yiinyu iyo, mbombo ye mukumuvhombela uMwene. Ileelo poosye inga nkufwa, nkuseshela nkaani, havhili nkuseshela nu kudovhela pooka niimwe.

¹⁸ Havhili niimwe mukwanzilwa kuseshela pooka niine.

Intumi iya Tiimoti nu Epafulodiito

¹⁹ Inga uMwene uYeesu asungwa, nkusuuvhila kuuti, ndimusonteelezya uTiimoti kuli imwe. Ahinze avhasuvhaalizye, havhili pisinda ansuvhaalizye niine lwe agaluha kumbuuzya inongwa zyinyu.

²⁰ Nkusuuvhila kumusonteelezya uweene, mwe pe ntali nu muntu uwamwavho inza uweene we angavhasaajila.

²¹ Avhamwavho vhonti, vhakusaajila zye zyavho, vhatakusaajila zye uYeesu Chilisiti akwanza.

²² Ileelo imwe muhomesheziizye kuuti uTiimoti akuvhomba ahinza, ávhomvile imbombo iya kulumbiilila Izwi iLyinza pooka niine inza umwana vwe akumwavwa uyise.

²³ Pe ishi, nkusuuvhila kuuti, kwe musonteelezye ku kwinyu, ahavhaliilizyo he naalola vwe izya ipa zyima.

²⁴ Poosye ine neneene, indi nu lusuuvhilo nkaani, kuuti kwe ninze shiniishi, inga uMwene asungwa.

²⁵ Ileelo ishi, nkulola suuti kuuti, yihondeeye kumutuma kuli imwe uwamwitu uEpafulodiito. Uweene muvhomvi, havhili musikaali uwamwitu we mwámusonteleziizye kunaavwa vwe nsovheliilwe.

²⁶ Niishi avhasamvile nkaani imwe mwenti. Aswimiliilwe nkaani, mwe pe imwe mwivuuye kuuti aamile muvhinu.

²⁷ Mwe muumwo, aavhinile nkaani. Paasyaye hansi kuuti afwe. Ileelo uMulungu aamufwiliiye uvhwila. Te wuuyo weeka vhweleele, nkandi pooka niine, aamfwiliiye uvhwila, inga uvhuswimiilizu vhwane, vhutahinze vhwonjele nkaani.

²⁸ Kuli izyo, nkwanza nkaani kumusonteelezya kuli imwe, pe inga mwamulola museshele, havhili vhwope uvhuswimiilizu vhwane vhwepe.

²⁹ Mumuposheele ngati wamwitu mwa Mwene ku luseshelo ulupiti. Mukwanzilwa kuvhashindiha avhantu vhe vhali inza uweene,

³⁰ mwe pe aavhiiye aafwa kuzya mbombo iya Chilisiti. Ahaazya uvhulanzi vhwakwe kuzya kunaavwa vwe naasovheliilwe, vwe imwe mutaamile munavwaje, mwe pe muli ukutali.