Filemoni 1 - ULufingwi uLupwa

Umulaamu

¹ Ukalaata uno nsimvile neene ne Paavhuli, ne nkunziilwe kuzya kulumbiilila izwi ilya Chilisiti uYeesu. Ine nu wamwitu uTiimoti, tukukusimbila iwe Filimooni, we muvhomvi uwamwitu unkundwa.

² Havhili tukuvhasimbila na vhantu avha mu shivhanza vhe vhakuvhungaana mu nyumba yaaho, inkaani uwamwitu umwantanda uAafiya, nu Alikiipo, umusikaali uwamwitu mu mbombo iya Mulungu.

³ UTaata wiitu uMulungu nu Mwene uYeesu Chilisiti, vhavhafwilaje uvhwila nu kuuvhapa uvhutehamu.

UPaavhuli akumulaavhila uFilimooni

⁴ Amanda gonti lwe nkumulaavha uMulungu, nkukukumbuha iwe nu kumusalifwa ku zyaho.

⁵ Nkuvhomba vhwevhulo, mwe pe nkwivwa inongwa izya lwitiho lwaho kwa Mwene uYeesu ni shikunzi shaaho ku vhafinjile vhonti.

⁶ Nkumulaavha uMulungu kuuti uvhuliilani vhwaho pooka niiswe, vhukwavwaje kuzimanya inongwa zyonti inyinza zye tuzyazile mwa Chilisiti.

⁷ Wamwitu, ishikunzi shaaho isho shimpiiye uluseshelo nkaani nu kungomwa umwoyo, mwe pe usansamusiizye amooyo aga vhafinjile.

UPaavhuli akumulaavha uFilimooni kuuti amuswile uOniseemu

⁸ Poosye she indi na maha mwa Chilisiti kukulajizya ku vhudandamazu ziila zye ukwanzilwa kuvhomba, ntakuvhomba vhwevhulo.

⁹ Kuyanga kwane kuvhe kwi idala ilya kukulambiilizya ku shikunzi. Ine ne Paavhuli ne mugoosi, ne nkunziilwe mu jeela kuzya Chilisiti uYeesu,

¹⁰ nkukulambiilizya kuzya mwana waane uOniseemu. Ahavhaliilizyo he nkunziilwe ipa na manyoloolo, avha mwana waane mu lwitiho.

¹¹ Ahavhaliilizyo he aakuvhembelusile, ataamile muntu we aahondeeye ku kwaho, ileelo ishi avha muntu we ahondeeye ku kwaho na kuli ine vhweleele.

¹² Ishi nkumugalusya ku kwaho, uno imukunzite ku mwoyo waane wonti.

¹³ Naasungwilwe kuuti asyale ipa niine, inga anavwaje ziila zye waamile unavwaje, ahavhaliilizyo he nkunziilwe kuzya Izwi iLyinza.

¹⁴ Ileelo litaliipo naalimo lye ingalivhomba ishisita iwe kunitishila, inga inyinza zye ukumbombela zivhe kwe ku lusungwo lwaho weneewe, zitahaavhe kwi idala ilya kukuvijiilizya.

¹⁵ Pamo uOniseemu aayeefile kuli iwe ukwo ku havhaliilizyo hansi, inga utendame pooka nawo shiima.

¹⁶ Te avhe muzya waaho vhweleele, nkandi kwe avhe wamwitu unkundwa mwa Yeesu Chilisiti. Ine imunkunzite nkaani, niiwe umukunde nkaani, inza umunine waaho, havhili inza uwamwitu mwa Mwene uYeesu.

¹⁷ Ishi inga ukuyilola kuuti uli pooka niine, umuposheele ahinza, inza vwe ungamposheela ine neneene.

¹⁸ Inga kuli limo lye ananzile kuli iwe, poosye inga ali nu mulandu wumo kuli iwe, ine kwe nkulipe.

¹⁹ Ine ne Paavhuli nkusimba izi neneene ni nyoovhe yaane, kuuti ine kwe nkulipe. Pooka niizyo, yitahondeeye kuuti nkukumbusye, iwe umanyile kuuti uli nu mulandu kuli ine uwa vhulanzi vhwaho.

²⁰ Ishi wamwitu, umbombele ili kuzya Mwene wiitu uYeesu, havhili usansamusye umwoyo waane mwa Chilisiti.

²¹ Nkukusimbila ukalaata uno, mwe pe imanyile kuuti kwe uzishindishe ziila zye nakulaavha. Havhili imanyile kuuti kwe uvhombe kuluusya niizyo.

²² Pooka niizyo, nkukulaavha unsenganizanye apa vhukaato, mwe pe nkusuuvhila kuuti ku mpuuto zyinyu, uMulungu kwe atusatule mu jeela, pe ininze kuli imwe kuvhavuula.

Amazwi aga kulagana

²³ Uwamwitu uEpaafula we mukungwa pooka niine kuzya kulumbiilila izwi ilya Chilisiti uYeesu, akukulamuha.

²⁴ Vhoope avhavhomvi avhamwitu avha ipa, uMaaliko nu Alisitaaliko nu Deema nu Luuka vhakukulamuha.

²⁵ UMwene uYeesu Chilisiti avhafwilaje uvhwila.