3 Yohani 1 - ULufingwi uLupwa

Umulaamu

¹ Ukalaata uno nsimvile neene ne songo uwa shivhanza. Nkukusimbila iwe Gaayo, nkundwa waane, we nkukunzite ku mwoyo wonti.

² Nkundwa waane, nkukulaavhila kuuti ujendeelele ahinza ku zyonti mu vhulanzi vhwaho. Havhili nkukulaavhila kuuti umuvhili waaho wuvhe ahinza, inza vwe umwoyo waaho wukujendeelela ahinza mu vhuliilani nu Mulungu.

³ Naasesheeye nkaani, lwe avhamwitu vhamo vhinza, nu kuyanga kuuti ukujendeelela kulema izya nalyoli, nu kulandila mu vhwanalyoli.

⁴ Shitaliipo ishintu she shikumpa uluseshelo ulupiti nkaani kuluusya isha kwivwa kuuti avhaana vhaane vhakujendeelela kulandila mu vhwanalyoli.

Uvhutungamu uvhwa Gaayo

⁵ We nkundwa, iwe we mutungamu ku ziila zye ukuvhavhombela avhamwitu, pooka nu kuuti vhajeni kuli iwe.

⁶ Vhashivhuziizye ishivhanza isha ipa izya shikunzi shaaho. Nkulaavha kuuti, ujendeelele kuvhaavwa mu vhulendo vhwavho inza vwe uMulungu akasiime.

⁷ Nkulaavha vhwevhulo, mwe pe vhahataliha kushuula kumuvhombela uMwene uYeesu, ishisita kuposheela ishintu shonti isha kuvhaavwa kufuma ku vhantu vhe vhatitisile.

⁸ Pe ishi, iswe tukwanzilwa kuuti tuvhaavwe avhantu inza ivho, inga tuvhombe pooka navho imbombo iya kusambiilizya uvhwanalyoli.

UDiyoteleefe nu Demetiiyo

⁹ Naashisimbiiye ishivhanza ukalaata, ileelo umuntu wumo we izina lyakwe vhakuti wu Diyoteleefe we akuyivhiiha kwilongolela ngati we mupiti waavho, atakwitiha zye nsimvile.

¹⁰ Kuli izyo, lwe ninza ukwo, ndizivumbula apazelu zyonti zye akuvhomba, kwe kuuti izya ilenga zye akutuyanjila. Te ziniizyo zyeka vhweleele, ileelo akuhaana nu kuvhaposheela avhamwitu vhe vhakuvhavuula ukwo. Havhili akuvhadinda nu kuvhashimbizya mu shivhanza avhanji vhe vhakwanza kuvhaposheela.

¹¹ We nkundwa waane, utavhalandataje avhanji kuvhomba uvhutalamalandu, nkandi inyinza. Wonti we akuvhomba inyinza, muntu wa Mulungu. Ileelo wonti we akuvhomba uvhutalamalandu, atamanyile kuuti uMulungu wu naanu.

¹² Avhantu vhonti vhakuhomeshezya kuuti uDemetiiyo muntu mwinza, ni mbombo zyakwe ingolosu, zikuhomeshezya kuuti muntu wa nalyoli. Poosye niiswe, tukuhomeshezya kuuti muntu mugolosu, niiwe umanyile kuuti uvhwahoome vhwitu vhwa nalyoli.

Amazwi aga kulagana

¹³ Indi na mazwi aminji ge nanzaga kukusimbila. Ileelo ntakwanza kusimba genego nu wiino ni isimbilo,

¹⁴ nkandi nkusuuvhila kukuvuula shiniishi, inga tuhayanje lwe twalolana.

¹⁵ Uvhutehamu vhuvhe pooka niiwe. Avhamanyani vhiitu avha ipa vhakukulamuha. Niiwe utulamushile avhamanyani vhiitu ukwo, wooka wooka kwi izina lyakwe.