2 Yohani 1 - ULufingwi uLupwa

Umulaamu

¹ Ukalaata uno nsimvile neene ne songo uwa shivhanza. Nkukusimbila iwe maayi we uMulungu akusavhuuye, pooka na vhaana vhaaho vhe mbakunzite ku mwoyo wonti. Te neene neeka ne mbakunzite, nkandi na vhanji vhonti vhe vhavhumanyile uvhwanalyoli uvhwa Izwi iLyinza, vhoope vhavhakunzite ku mwoyo wonti.

² Tuvhakunzite, mwe pe iswe niimwe tuvhumanyile uvhwanalyoli uvhwo, havhili kwe tujendeelele kuvhumanya shiima shiima.

³ UTaata uMulungu nu Mwana waakwe uYeesu Chilisiti, vhalitufwila uvhwila nkaani nu kuutupa uvhutehamu, mu vhwanalyoli, na ku shikunzi.

Uvhwanalyoli ni shikunzi

⁴ Naasesheeye nkaani, lwe niivwa kuuti avhaana vhaaho vhamo vhakulandila kulandata uvhwanalyoli, inza vwe uTaata uMulungu ahatulajizya.

⁵ Ishi iwe maayi nkundwa, nkukulaavha mu vhusimbe uvhu, kuuti ushindishe ululajizyo luula lwe lukuti tukundanaje. Ululajizyo ulwo te lupwa, lwe lweluula lwe twámile nalwo kufuma pe twánzite kumwitiha uChilisiti.

⁶ Kukundana, kwe kushindiha indajizyo izya Mulungu. Ululajizyo lwe mwálwivuuye kufuma ku vhwandilo lukuti mukundanaje.

Insoshi kuzya vhasambiilizi avha ilenga

⁷ Nkuyanga vhwevhulo, mwe pe vhe vhakuhopenkanya avhinji vhafumiiye mu nsi. Avheene vhakuyanga vhakuti uYeesu Chilisiti áyinzile pa nsi ipa, atáamile nu muvhili inza avhantu avhanji. Umuntu we akuyanga vhwevhulo, akuhopenkanya, havhili mulugu wa Chilisiti.

⁸ Muvhe minso navho, inga imbombo yiinyu yitahinze yiteeje shaaha. Havhili muvhe minso, inga muhaposheele amalipilo ge gakwanzilwa ku mbombo yiinyu.

⁹ Umuntu wonti we akupindula insambiilizyo izya Chilisiti, havhili atakujendeelela kulema izyo zye vhamusambiliziizye, uyo atali nu vhuliilani nu Mulungu. Ileelo wonti we akujendeelela kulema insambiilizyo, ali nu vhuliilani nu Taata uMulungu, nu Mwana waakwe.

¹⁰ Inga umuntu akwinza kuli imwe we atakusambiilizya insambiilizyo izyo izya Chilisiti, mutamuposheelaje mu nyumba zyinyu, havhili mutamulamuhaje inza avhiitisi avhamwinyu.

¹¹ Nkuvhavhuuzya vhwevhulo, mwe pe wonti we akumulamuha, ali pooka nawo mu vhutalamalandu vhwe akuvhomba.

Amazwi aga kulagana

¹² Indi na mazwi aminji ge nanzaga kukusimbila. Ileelo ntakwanza kusimba genego ni italataasi nu wiino, nkandi nkusuuvhila kwinza kuli imwe kuvhavuula, inga tuhayanje lwe twalolana, pe tuliseshela nkaani.

¹³ Avhaana vha mwantanda uwamwinyu we asavhuliilwe, vhakukulamuha.