2 VaKolinti 9 - ULufingwi uLupwa

Ulwavwo ku vhafinjile avha ku Yelusaleemu

¹ Ishi ntakwanza kuvhasimbila nkaani izya mbombo yiinyu iya kuvhaavwa avhafinjile avha ku Yelusaleemu,

² mwe pe imanyile umwoyo wiinyu uwa kuvhaavwa avhanji. Niine nkuyitumvwa ku zyinyu ku vhantu avha ku Makedooniya kuuti, “Ishivhanza isha mu shigavho isha nsi isha Akaaya, shaamile nu mwoyo uwa kufumwa kufuma umwaha we waatuusile.” Umwoyo wiinyu uwa vhutesi uwo, wuvhavhiisile avhantu avhinji pahati yaavho kuvha nu mute kufumwa.

³ Ishi mbasonteleziizye avhamwitu ivho, inga muvhombe inza vwe naavhatiimile ku vhantu avha ku Makedooniya. Muvhombe vhwevhulo, inga ziila zye twaavhavhuziizye avheene ku zyinyu, zitahaloleshe kuuti twavhatiimaga vhweleele.

⁴ Yeenya, inga ninza ukwo pooka na vhantu avha ku Makedooniya nu kwaga mutayisengiinye, ipo lwe mwampezya insoni kuzya lusuuvhilo lwitu kuli imwe. Havhili niimwe lwe mwavha ni nsoni zye zitakuyanjiha.

⁵ Ishi, naalola hinza kuvhalambiilizya avhamwitu ivha kuuti vhalongolele ukwo, inga vhasengaanye ivipeelwa vwe mwaafinzile kufumwa. Ipo lwe mwafumwa ku mwoyo wonti, te kuuti wumo avhavijiilizya.

Kufumwa impuutile ku mwoyo wonti

⁶ Mukumbushe kuuti, “Umuntu we akuvhwala ivinsi, akuvuna ivinsi, woope we akuvhwala ivwinji, akuvuna ivwinji.”

⁷ Avhantu vhonti vhafumwaje inza vwe vhakwanza mu mooyo gaavho, vhatafumwaje ku vhuswimiilizu, poosye kwi idala ilya kuvhavijiilizya, mwe pe uMulungu akumukunda umuntu we akufumwa ku mwoyo wonti.

⁸ Pe uMulungu kwe avhalootaje mu nyinji, inga ahavhaliilizyo honti muvhanje ni vintu vwonti vwe mukwanza, inga muvhanje mwe vhantu avha kuvhomba inyinza inyinji izya kuvhaavwa avhanji.

⁹ Zikuvha inza vwe yisimviilwe mu Vhusimbe uVhufinjile kuuti, “Afumwizye ku mwoyo wonti, kuuvhapa avhapiina, uvhugolosu vhwakwe vhwa shiima.”

¹⁰ UMulungu we akuumupa umuntu imbeyu iya kuvhwala ni ikaati ilya kulya, kwe aavhape imbeyu iya kuvhwala nu kuvhonjezezya. Kwe kuuti kwe aavhape nu kuvhonjezezya umwoyo uwa vhutesi.

¹¹ Uweene akuuvhapa uvhudumbwe mu zyonti, inga muvhanje mwe vhatesi shiima. Kwi idala ilyo, avhantu kwe vhamusalifwaje uMulungu, lwe iswe tukuuvhapa ivintu ivwo vwe vwafuma kuli imwe.

¹² Yeenya, imbombo ino ye mukuvhomba, te kuuti yikwavwa avhafinjile vhe vhasovheliilwe vhweleele, yikuvhavhiiha na vhantu avhinji vhamusalifwaje nkaani uMulungu.

¹³ Imbombo iyo yikulolesya kuuti mwe vhavhomvi avhinza avha Mulungu. Avhantu vhakumutiima uMulungu kuzya mushinzi wiinyu uwa kwitiha Izwi iLyinza ilya Chilisiti. Havhili vhakumutiima, lwe vhakulola uvhutesi vhwinyu ku kwavho na ku vhantu avhanji vhonti.

¹⁴ Pe kwe vhavhalavhilaje kwa Mulungu ku mwoyo wonti, kuzya vhwila vhwe uMulungu avhapiiye ku vhwinji.

¹⁵ Tumusalifwaje uMulungu kuzya shikunjilwa ishipiti isha kusukumizya, she atupiiye.