2 VaKolinti 8 - ULufingwi uLupwa

Umwoyo uwa vhutesi

¹ Ishi vhamwitu, tukwanza tuvhavhuuzye izya vhwila vhwe uMulungu ávipiiye ivivhanza ivwa ku Makedooniya umwoyo uwa kufumwa.

² Pooka nu kuuti avhiitisi ivho vhaamile vhapiina nkaani nu kuvha mu mayimba aga mavhiila mu mavhiila, vhaamile nu luseshelo ulupiti lwe lwaavhatwaliiye kuvha vhatesi nkaani kufumwa ivintu vwavho.

³ Nkuvhavhuuzya kuuti, vhaafumwizye ivintu ivwinji, kuluusya vwe vhali navwo. Havhili vhaafumwizye ku lukasamo lwavho,

⁴ nu kutulambiilizya kuuti, vhoope vhavhe mu mbombo iya kuvhaavwa avhafinjile avha ku Yelusaleemu.

⁵ Vhaavhomvile kuluusya vwe twaasuvhiiye. Vhaayifumwizye suuti kwa Mwene uYeesu, pe vhayifumwa na kuli iswe. Vhaavhomvile vhwevhulo inza vwe uMulungu akasiime.

⁶ Ishi twaamulambiliziizye uTiiti kuuti ayinze avhaavwe kumala imbombo iyo iya vhwila, mwe pe we áyanzite imbombo iyo kuli imwe.

⁷ Inza vwe muli nu vhudumbwe mu zyonti na mu lwitiho na mu shikunjilwa isha kulumbiilila na mu vhumanyi nu kuvha nu mute mu nyinza zyonti, pooka ni shikunzi shiinyu kuli iswe, ishi muvhanje mwe vhadumbwe na mu mbombo ino iya vhutesi ku vhanji.

⁸ Lwe nkuyanga izi te kuuti nkuvhavijiilizya, ileelo nkwanza kulola ishikunzi shiinyu inga sha nalyoli kwi idala ilya kulingaanisya nu mute uwa vhanji.

⁹ Yeenya, mumanyile vwe uMwene wiitu uYeesu Chilisiti ávhafwiliiye uvhwila. Poosye she wu dumbwe uwa vintu vwonti, áyivhiisile kuvha mupiina ku zyinyu, inga mu vhupiina vhwakwe, imwe muvhe mwe vhadumbwe.

¹⁰ Zye kwanza kuvhavhuuzya zye zino: Kuli imwe yihondeeye kumala zye mwaatalisile umwaha we waatuusile. Umwaha uwo, imwe mwaamile mwe vha kwanda kulolesya umwoyo uwa kuyifumwa ivintu ivwa kuvhaavwa avhanji nu kwanda kuvhomba vhwevhulo.

¹¹ Ishi, inza vwe mwásungwilwe nkaani kuvhomba ilyo lwe mukwanda, musungwe nu kuyimala imbombo iyo, muyifumwe kulandatana na vwe muli navwo.

¹² Inga umuntu akufumwa ku lusungwo lwakwe, uMulungu akuposheela, mwe pe uMulungu akuposheela kulandatana na vwe umuntu ali navwo, te kuuti vwe atali navwo.

¹³ Insiivho zyitu, te kuuti imwe muyimbe ku maligo aga kuvhaavwa avhanji, inga avheene vhavhe kwashi, nkandi nkwanza mulingaane.

¹⁴ Ahavhaliilizyo iha he muli ni vintu ivwinji muvhaavwe vhe vhali mu ntamwo, inga vhoope lwe vhavha ni vintu vhahavhavwaje imwe. Kuli izyo, muliivha mwalingaana,

¹⁵ inza vwe yisimviilwe mu Vhusimbe uVhufinjile kuuti, “Umuntu we ávhunganisile ivwinji, atáamile ni vwa kusyala, woope we ávhunganisile ivinsi atásovheliilwe.”

Vhakumusonteelezya uTiiti ku Kolinto

¹⁶ Nkumusalifwa uMulungu we amupiiye uTiiti umwoyo uwa mute uwa kuvhaavwa imwe, inza vwe ine indi.

¹⁷ Nkuyanga vhwevhulo, mwe pe lwe twamulaavha kuuti ayinze kuli imwe, aayiitisile. Havhili woope wuuyo ali nu lusungwo ulwa kwinza kuvhaavwa.

¹⁸ Tukumusonteelezya uTiiti, nu wamwitu wumo we ivivhanza vwonti vikumutiima ku mbombo iya kulumbiilila Izwi iLyinza.

¹⁹ Havhili ivivhanza vimusevile uwamwitu uyo, inga avhe pooka niiswe lwe tukusogola kutwala ivintu ku vhantu ivwa kuvhaavwa. Imbombo iyo, yikutwalila kumuleetela uvhushindamu uMwene uYeesu, havhili yikulolesya vwe tuli nu mute kuvhaavwa avhanji.

²⁰ Tutakwanza tukwinkwinwe nu muntu wonti ku zya vhwimiilizi uvhwa mbombo iya kutwala ivintu vwe avhantu vhafumwizye ku vhwila vhwavho.

²¹ Insiivho zyitu, tukwanza kuvhomba ahinza pilongolela ilya Mwene na pilongolela ilya vhantu.

²² Tukumusonteelezya uwamwitu uwamwavho avhe pooka na vha Tiiti. Uwamwitu uyo ulwinji tukumulola kuuti ali nu mute uwa kuvhomba imbombo. Ali nu mute nkaani kuluusya ku vhwandilo, mwe pe akuvhasuuvhila nkaani imwe.

²³ Ishi inga umuntu akwanza kumanya inongwa izya Tiiti, mumuvhuzyaje kuuti uno muvhomvi wamwitu we tuli nawo pooka mu mbombo iya kuvhaavwa imwe. Havhili inga umuntu akwanza kumanya inongwa izya vhanji ivho vhavhili, mumuvhuzyaje kuuti ivho vhiitisi vhamwitu, vhe ivivhanza vivhatumile, vhoope vhakumuleetela uvhushindamu uChilisiti.

²⁴ Ishi muvhalolesyaje avhantu ivho ishikunzi shiinyu, inga ivivhanza vimanye kuuti, zye tukuyitumvwa ku zyinyu, zya nalyoli.