2 VaKolinti 7 - ULufingwi uLupwa

¹ Ishi vhankundwa, mwe pe uMulungu afinzile kuutupa izyo zyonti, tuyizelufwe mu zyonti zye zikutuvhiiha kuvha twe vhahandamanu amavhili na mooyo giitu. Tuvhanje twe vhafinjile kwi idala ilya kumunyila uMulungu.

Uluseshelo ulwa Paavhuli

² Mutuposheele mu mooyo giinyu, mwe pe ataliipo we tumunanjiiye, havhili ataliipo we tumuvwalaziizye mu zimo, poosye we tumuhopenkiinye.

³ Ntakuyanga amazwi iga, inga mbalonje. Inza vwe naayanzile ku vhwandilo, iswe tuvhakunzite nkaani mu mooyo giitu, havhili tuli pooka niimwe, yivhe mwe mu vhulanzi uvhu, poosye mu vhufwe.

⁴ Lwe nkuyanga niimwe indi nu vhudandamazu, havhili nkuyitumvwa nkaani ku zyinyu. Imwe mwansuvhaalizya nkaani ine. Pooka nu kuuti niishi tuli mu mayimba aminji, mumbiisile kuvha nu luseshelo ulupiti.

⁵ Lwe twafiha ku Makedooniya twaaposiitwe kutuuzya, mwe pe twaamile na mayimba imbazu zyonti, kunzi kwaamile uvhulugu, muhati mu mooyo giitu mwaamile ilyoga.

⁶ Ileelo uMulungu we akuvhasuvhaalizya avhantu vhe vhavunzisile amooyo, aatusuvhaliziizye kwi idala ilya kwinza uTiiti.

⁷ Te kuuti aatusuvhaliziizye kwi idala ilya kwinza uTiiti vhweleele, nkandi na kwi idala lye mwaamusuvhaliziizye uweene. Aatuvhuziizye na vwe musamvile kundola ine na vwe mwaamile nu vhuswimiilizu na vwe mwaamile nu mute uwa kunaavwa ine. Izyo zikumbiiha kuvha nu luseshelo nkaani.

⁸ Pooka nu kuuti ukalaata we naavhasimbiiye aavhapiiye uvhuswimiilizu, ntakuyikwinkwina. Poosye inga naayikwinkwinile hansi ulwa kwanda, ukalaata uyo aavhapiiye uvhuswimiilizu ahavhaliilizyo hansi vhweleele.

⁹ Ishi indi nu luseshelo, te kuuti indi nu luseshelo, mwe pe mwaamile nu vhuswimiilizu. Ndaali! Indi nu luseshelo, mwe pe uvhuswimiilizu vhwinyu vhuvhavhiisile kuuti mutonte uvhutalamalandu vhwinyu. Uvhuswimiilizu vhwinyu vhwaamile mu lukasamo ulwa Mulungu, mwe pe tutavhavhiisile kuuti muteezye shimo ku ziila zye twaavhasimbiiye.

¹⁰ Uvhuswimiilizu vhwe vhukwinza ku lukasamo ulwa Mulungu vhukumupela umuntu kutonta uvhutalamalandu. Kutonta ukwo, kukumupela umuntu kuuti avhwaje uvhuposhi. Uvhuswimiilizu inza uvhwo te vhwa kuyikwinkwina. Ileelo uvhuswimiilizu vhwe vhukwinza kufumiilana ni zya mu nsi, vhukuleeta uvhufwe.

¹¹ Yeenya, uvhuswimiilizu vhwe vhukwinza ku lukasamo ulwa Mulungu, vhuvhaleteeye imwe ilonka ipiti. Vhuvhavhiisile kuvha nu mute nkaani kuvhomba ingolosu, nu kuyiyanjila kuuti zye mukuvhomba zya nalyoli, nu kuziviitilwa imbiivhi, nu kumunyila uMulungu, nu kusamba kundola, nu kulola kuuti we ananzile aposheleeye amalipilo gaakwe. Muli izyo zyonti mukulolesya kuuti mutali nu vhunanzi kuli ili.

¹² Kuli izyo, poosye inga naavhasimbiiye ukalaata ula, ntaasimvile kuzya muntu we amunanjiiye uwamwavho, poosye we avhombeliilwe havhiivhi. Ileelo nanzaga mumanye mweneemwe pilongolela ilya Mulungu vwe mwaamile nu mute kuyifumwa, ku zyitu iswe.

¹³ Kuli izyo, mwatusuvhaalizya. Pooka niilyo, twaamile nu luseshelo ulupiti lwe uTiiti atuvhuuzya vwe mwaamupiiye uluseshelo mu mwoyo waakwe.

¹⁴ Ine naavhatiimile nkaani imwe pilongolela lyakwe, niimwe mutaampeziizye insoni. Zyonti zye twavhavhuzyaga zyaamile zya nalyoli. Vwe zili, na zye twaavhatiimile imwe kwa Tiiti, zyope zyaloleha kuuti zya nalyoli.

¹⁵ Ishikunzi isha Tiiti kuli imwe shikwonjela, lwe akukumbuha umushinzi wiinyu mwenti na vwe mwaamuposheleeye ahinza, havhili kwi idala ilya kunyila.

¹⁶ Naseshela nkaani ku zyinyu, mwe pe ishi nkwanzilwa kuvhasuuvhila nziila.