2 VaKolinti 6 - ULufingwi uLupwa

¹ Ishi, mwe pe tukuvhomba imbombo pooka nu Mulungu, tukuvhalambiilizya kuuti uvhwila uvhwa Mulungu vhwe muposheleeye, mutahaaleshe vhuteeje vhweleele.

² Yeenya, uMulungu akuyanga akuti, “Ahavhaliilizyo he hakwanzilwa, nákwivuuye, isiku ilya vhuposhi, nákwavwizye.” Ishi tejeelezyi, ahavhaliilizyo he hakwanzilwa he hano, ni isiku ilya vhuposhi lye lino!

Uvhujimbiilizu mu mbombo iya Mwene uYeesu

³ Ishi tutakuvhomba lyonti lye likuvhapunuzya avhanji, inga uvhuvhomvi vhwitu vhutahinze vhuyangwe havhiivhi.

⁴ Ileelo mu zyonti tukulolesya kuuti twe vhavhomvi avha Mulungu. Tukulolesya ilyo kwi idala ilya kujimbiilila nkaani mu mayimba na mu ntamwo na mu ngomu.

⁵ Ahavhaliilizyo hamo tukuhomwa nu kukungwa mu jeela nu kuvhuushilwa ni mpuga iya vhantu. Havhili tukuvhomba imbombo ingomu, tutakusupiila utulo, tukulinda ni nzala nu kukaatila.

⁶ Havhili tukulolesya kuuti twe vhavhomvi avha Mulungu ku mooyo giitu amazelu na ku vhumanyi na ku vhujimbiilizu na ku vhutesi na kwi idala ilya kulongolwa nu Mupepo uMufinjile na ku shikunzi she shitali ni shifumbo.

⁷ Havhili tukulolesya kwi idala ilya kulumbiilila izwi ilya nalyoli, tukuvhomba izyo zyonti ku maha aga Mulungu. Uvhugolosu she shilwilo shiitu, uluvhazu ulwa kundiilo nu lwa kumongo.

⁸ Iswe tuyifumwizye kuvhomba imbombo iya Mulungu, avhantu vhatushindishe, poosye vhatusuufwe, vhatutiime, poosye vhatuyanje havhiivhi. Tukuloleha twe vha ilenga, fwandi tukuyanga izya nalyoli.

⁹ Tukuloleha tutamanyisile, fwandi tumanyisile nkaani, tukuloleha tufuuye, fwandi twe vhapuuma, tuhomwilwe nkaani, ileelo vhatatugozile.

¹⁰ Havhili tukuloleha ngati tuswimiliilwe, ileelo ahavhaliilizyo honti tuli nu luseshelo, tukuloleha twe vhapiina, ileelo tuvhapiiye avhinji uvhudumbwe, tukuloleha tuli nyoovhe zyeka, ileelo tuli ni vintu vwonti.

¹¹ Imwe Vhakolinto, tuyanzile niimwe ishisita kuzyiha naashimo, havhili tuyanzile ku shikunzi ishipiti.

¹² Iswe tutalesile kuvhakunda imwe, nkandi imwe mwe mulesile kutukunda iswe.

¹³ Ishi nkuyanga niimwe inza vwe nkuyanga na vhaana vhaane, muvhe ni shikunzi ishipiti, inza vwe tuli iswe.

Uvhuliilani na vhe te vhiitisi

¹⁴ Mutavhanje nu vhuliilani na vhe te vhiitisi. Vhuli, uvhugolosu nu vhutalamalandu vingavha nu vhuliilani? Poosye uvhuzelu ni shiisi vingavha pooka?

¹⁵ Havhili uChilisiti nu Seetano vhangavha nu lwivwano? Poosye umwitisi na we te mwitisi, vhangavha nu vhuliilani?

¹⁶ INyumba iMfinjile iya Mulungu yingavha nu vhuliilani ni viholanyo ivwa vhalungu? Iswe twe Nyumba iMfinjile iya Mulungu uMulanzi! Izi zili inza uMulungu wuuyo vwe áyanzile átili, “Nditendama pahati yaavho nu kujenda pooka navho. Ndiivha ne Mulungu waavho, vhoope vhaliivha vhantu vhaane.”

¹⁷ Ishi uMWENE uMulungu akuti, “Mwepe pahati yaavho, muyilehaanye navho. Mutalemaje ishintu ishihandamanu, niine pe kwe mbaposheele.”

¹⁸ Havhili uMWENE uMulungu uwa Maha Gonti akuyanga akuti, “Kwe mbe ne Taata wiinyu, niimwe kwe muvhe mwe vhaana vhaane avhanaavuli na vhalindu.”