2 VaKolinti 5 - ULufingwi uLupwa

¹ Tumanyile kuuti lwe tuli pa nsi ipa amavhili giitu liheema ilya havhaliilizyo hansi vhweleele. Ileelo lwe lyananjiha, uMulungu aliitupa uvhuyo ku mwanya uvhwa shiima, vhwe vhutali inza inyumba ye yizengwilwe na vhantu.

² Lwe tuli mu nsi umu, mu mooyo giitu tukuvhuvhula. Kuli izyo, tukusungwa mu mwoyo nkaani kusogola mu vhuyo vhwitu uvhwa ku mwanya, ukwo uMulungu alituzwalizya amavhili amapwa.

³ Nalyoli, lwe uMulungu atuzwalizya, te tuhaloleshe ishitali.

⁴ Lwe tushiili tuli na mavhili iga ge liheema ilya havhaliilizyo hansi, tukuvhuvhula mu mooyo giitu kuzya muligo umumwamu. Te kuuti tukwanza kuzuula umuvhili uno we wukufwa, tukwanza kutuzwalizya umuvhili we wutakufwa, inga umuvhili uno we wukufwa wumilwe na we wutakufwa.

⁵ UMulungu we atusenganiziinye izyo, havhili atupiiye uMupepo waakwe, inga tumanye kuuti nalyoli vwe ziliivha.

⁶ Kuli izyo, insiku zyonti tuli nu lusuuvhilo, poosye she tumanyile kuuti lwe tuli mu muvhili uno, tuli ukutali nu Mwene.

⁷ Yeenya, tukulandila kwi idala ilya lwitiho, tutakulandila kwi idala ilya vintu vwe vikuloleha.

⁸ Nalyoli tutali na maganigani, havhili tukulola kwashi tuwuleshe umuvhili uno, nu kusogola kutendama pooka nu Mwene uYeesu.

⁹ Kuli izyo, insiivho zyitu kwe kumuhondezya uMwene, inga tuli mu muvhili uno, poosye inga tutali mu muvhili uno.

¹⁰ Nkuyanga vhwevhulo, mwe pe iswe swenti tuliyimiilila pilongolela ilya Chilisiti, nu kulongwa. Avhantu vhonti vhaliposheela amalipilo aga mbombo zye vhakuvhomba mu nsi umu, zivhe nyinza, poosye zivhe mbiivhi.

Imbombo iya kukundanya

¹¹ Ishi, mwe pe tumanyile kuuti avhantu vhakwanzilwa kumunyila uMwene uYeesu, tukuvha nu mute uwa kuvhalambiilizya avhantu kuuti vhamwitihaje. UMulungu atumanyile ahinza vwe tuli, niine nkusuuvhila kuuti niimwe mutumanyile ahinza mu mooyo giinyu.

¹² Tutakwanza kuyihomeshezya inyinza havhili kuli imwe, nkandi kuvhavhuuzya vwe mukwanzilwa kuyitumvwa ku zyitu, inga muvhanje na mazwi aga kuvhaamula vhe vhakuyitumvwa ku haloleshele aha vhantu, vhakuleha izya mu mwoyo.

¹³ Inga tukuloleha twe vhashipena, tuli isho kuzya kumushindiha uMulungu, ileelo inga tukuloleha tuli ni njeele, tuli isho kuzya kuvhaavwa imwe.

¹⁴ Ishikunzi isha Chilisiti shikutulongola iswe, mwe pe tumanyile kuuti umuntu wooka áfuuye kuzya vhantu vhonti, kuli izyo, avhantu vhonti vháfuuye.

¹⁵ Umuntu uyo áfuuye kuzya vhantu vhonti, inga avhantu vhatalandilaje ku lukasamo lwavho, nkandi ku lwa ula we áfuuye nu kuzyuha ku zyavho.

¹⁶ Ishi, kufuma ahavhaliilizyo iha, tutakumumanya umuntu ku njeele izya vhantu. Poosye she ahavhaliilizyo hamo twámumanyile uChilisiti ku njeele izya vhantu, ileelo ishi tutamumanyile inza isho.

¹⁷ Kuli izyo, umuntu wonti we akumwitiha uChilisiti, akuvha shipelwa ishipwa, izya hali zikutuuha, uvhuntu vhwakwe vhukuvha vhupwa!

¹⁸ Ileelo izi zyonti zikufuma kwa Mulungu we ámusonteleziizye uChilisiti kuuti atukundanye iswe nu weene. Niiswe atupiiye imbombo iya kuvhalolesya avhantu idala ilya kukundana nu weene.

¹⁹ Kwe kuuti kutuushila kwa Chilisiti, uMulungu ahavhakundanyaaga avhantu nu weene, ishisita kuvhaazya uvhutalamalandu vhwaho. Havhili uMulungu atupiiye imbombo iya kuvhavhuuzya avhantu inongwa izya lukundanyo ulwo.

²⁰ Ishi, uChilisiti atusonteleziizye kuvhomba imbombo yaakwe, nu kutuushila kuli iswe, uMulungu akuvhalambiilizya kukundana nu weene. Ye nongwa tukuvhalaavha mwa Chilisiti kuuti mukundane nu weene.

²¹ UMulungu ámuvhiisile uChilisiti we atali nu vhutalamalandu kuvha nu vhutalamalandu ku zyitu, inga kwi idala ilya Chilisiti tuvhe nu vhuliilani nu Mulungu mu vhugolosu vhwakwe.