2 VaKolinti 4 - ULufingwi uLupwa

Amaha aga Mulungu ku viliilo ivwa ntope

¹ Ishi, mwe pe uMulungu ku vhwila vhwakwe atupiiye imbombo ino, tutakuvunziha umwoyo.

² Tuhaanile nziila kuvhomba izya kukwilu izya nsoni, poosye kuvhahopenkanya avhantu, poosye kusangaanya izwi ilya Mulungu ni ilenga. Ileelo tukuyanga uvhwanalyoli apazelu, inga avhantu vhonti vhamanyaje mu mooyo gaavho kuuti twe vha nalyoli pilongolela ilya Mulungu.

³ Ileelo inga Izwi iLyinza lye tukulumbiilila litakumanyiha, litakumanyiha ku vhe vhakuteega.

⁴ Litamanyisile kuli ivho, mwe pe uSeetano we wu mulungu uwa nsi ino, agubishiiye injeele izya vhantu vhe vhatamwitisile uChilisiti, inga vhapotwaje kuvhulola uvhuzelu uvhwa Izwi iLyinza ilya vhushindamu uvhwa Chilisiti, we shiholanyo isha Mulungu.

⁵ Nkuyanga vhwevhulo, mwe pe iswe tutakukumusya inongwa zyitu, ileelo tukukumusya kuuti uYeesu Chilisiti we wu Mwene, niiswe twe vhavhomvi vhiinyu kwi idala ilya kumuvhombela uYeesu.

⁶ UMulungu we áyanzile kuuti, “Uvhuzelu vhuhozye mu shiisi,” we akuhozya amooyo giitu, nu kutuvhiiha kumanya uvhushindamu vhwakwe vhwe vhukulama ku minso kwa Yeesu Chilisiti.

⁷ Iswe twe tuli ngati viliilo ivwa ntope, tupeliilwe uvhuzelu uvhwo, ileelo yimanyishe kuuti, amaha amapiti aga kuvhomba imbombo iyo te giitu, gakufuma kwa Mulungu.

⁸ Gakutwaga amayimba aga mavhiila mu mavhiila, ileelo tutakupootwa. Tukuvha na maganigani, ileelo tutakuvunziha umwoyo.

⁹ Avhantu vhakutuyimvwa, ileelo uMulungu atakutuleha sweka. Havhili vhakutuhomezya pansi, ileelo tutakufwa.

¹⁰ Insiku zyonti, amavhili giitu gali mu ntamwo izya kufwa inza uYeesu, inga uvhulanzi vhwakwe vhuloleshe mu mavhili giitu.

¹¹ Yeenya, iswe twe vhapuuma, ahavhaliilizyo honti tuli mu ntamwo izya kufwa kuzya Yeesu, inga uvhulanzi vhwakwe vhuloleshe mu mavhili giitu ge gakufwa.

¹² Kwe kuuti iswe tuli mu ntamwo izya kufwa, ileelo muli izyo, imwe mukuvhwaga uvhulanzi.

¹³ Mu Vhusimbe uVhufinjile gasimviilwe amazwi ge gakuti, “Námwitisile uMulungu, ye nongwa náyanzile.” Niiswe tuli nu mwoyo uwa kwitiha inza uwo, ye nongwa tukuyanga.

¹⁴ Tukuyanga izyo, mwe pe tumanyile kuuti uMulungu we ámuzyusiizye uMwene uYeesu, alituzyusya niiswe. Uweene alituvhiiha pooka niimwe, inga tuhatendame nu Yeesu.

¹⁵ Ishi amayimba gonti iga gakutwaga ku zyinyu, inga uMulungu avhafwile uvhwila nkaani avhantu avhinji, inga vhamusalifwaje nkaani uMulungu. Kulandatana niizyo, uMulungu akujendeelela kushindikwa.

Uvhushindamu uvhwa shiima

¹⁶ Pe ishi, tutakuvunziha umwoyo, poosye inga amavhili giitu gakunanjiha, muhati zyitu uMulungu akutupela kuvha twe vhapwa insiku zyonti.

¹⁷ Nkuyanga vhwevhulo, mwe pe amayimba giitu mapupuusu, havhili ga havhaliilizyo hansi vhweleele. Amayimba igo, gakutusenganizanya uvhushindamu uvhwa shiima. Uvhushindamu uvhwo, vhupiti nkaani, vhukutuvhiiha kulola kuuti amayimba igo te shintu.

¹⁸ Yeenya, ivintu vwe vikuloleha, vwa havhaliilizyo hansi vhweleele. Ileelo ivintu vwe vitakuloleha, vwa shiima, ye nongwa tukuvisaajila ivintu vwe vitakuloleha.