2 VaKolinti 2 - ULufingwi uLupwa

¹ Pe naamuuye mu mwoyo waane kuuti ntahaavhe nu vhulendo uvhwamwavho kuli imwe, inga ntahaleete uvhuswimiilizu.

² Nkuyanga vhwevhulo, mwe pe inga navhapelela imwe kuvha nu vhuswimiilizu, kwe kuuti ataliipo uwunji we angambiiha kuuti mbe nu luseshelo, nkandi mweneemwe mwe nkuvhapelela kuvha nu vhuswimiilizu!

³ Ye nongwa naavhasimbiiye ukalaata uwamwavho ula, inga lwe ninza kuli imwe, intahaapelwe kuvha nu vhuswimiilizu na vhantu vhe vhakwanzilwa kumbiiha kuvha nu luseshelo. Imanyile kuuti ine inga navha nu luseshelo, niimwe mukuvha nu luseshelo.

⁴ Naavhasimbiiye ukalaata uyo she indi nu vhuvwalale mu mwoyo na mayimba na mansozi. Insiivho zyane te kuuti nanzaga kuvhapelela uvhuswimiilizu, nkandi nanzaga mumanye vwe indi ni shikunzi kuli imwe.

Kumuswila umuntu we aleesite uvhuswimiilizu

⁵ Ishi inga umuntu wumo ampeleeye uvhuswimiilizu, atampeleeye uvhuswimiilizu neneene vhweleele, nkandi niimwe mwenti. Ileelo ilyo ntakwanza kulivhiiha kuuti livhe ntamwo nkaani.

⁶ Isunde ilyo lye limwazile umuntu uyo kufuma ku vhinji, limukwiliiye.

⁷ Ishi mukwanzilwa kumuswila nu kumusuvhaalizya umuntu uyo, inga atahinze aswimiililwe nkaani nu kuvunziha umwoyo.

⁸ Nkuvhalambiilizya kuuti mulolesye ishikunzi shiinyu ku kwakwe.

⁹ Insiivho zyane izyamwavho izya kuvhasimbila ukalaata ula, zyaamile zya kumanya inga mukunshindiha mu zyonti.

¹⁰ Inga imwe mwamuswila umuntu uyo, pe niine kuuti mbe namuswila. Nkuyanga vhwevhulo, mwe pe inga liliipo lye likwanzilwa kumuswila, ine imuswiliiye pilongolela ilya Chilisiti ku zyinyu.

¹¹ Mbomvile vhwevhulo, inga uSeetano atahinze atupoote, mwe pe tumumanyile uvhushevu vhwakwe.

UPaavhuli mu nkaaya iya Tolowa

¹² Ishi, lwe naafiha mu nkaaya iya Tolowa kulumbiilila Izwi iLyinza ilya Chilisiti, ukwo uMwene aaniguliiye idala ilya kuvhomba imbombo yaakwe.

¹³ Ileelo ntaamile nu vhutehamu mu mwoyo waane, mwe pe ukwo ntaamuvhwenyi uwamwitu uTiiti. Pe nalagana navho, nu kwanda kusogola kumulondola mu shigavho isha nsi isha Makedooniya.

Kupoota ku maha aga Chilisiti

¹⁴ Tukumusalifwa uMulungu, mwe pe mwa Chilisiti akutulongola ahavhaliilizyo honti kuvhapoota avhalugu. Havhili akutuvhiiha iswe kuuti tukumusyaje izwi ilya Chilisiti imbazu zyonti, inza umununsi umwinza vwe wukusaata kwonti.

¹⁵ Nkuyanga vhwevhulo, mwe pe iswe tuli inza umununsi umwinza we uChilisiti akufumwa pilongolela ilya Mulungu. Umununsi uwo wukuvhafishila avhantu vhonti vhe vhakupokwa na vhe vhakuteega.

¹⁶ Ku vhe vhakupokwa umununsi uwo mwinza, wukuuvhapa uvhulanzi. Ileelo ku vhe vhakuteega umununsi uwo muvhiivhi, wukuvhapelela uvhufwe. Ishi wu naanu we ahondeeye kuvhomba imbombo iyo?

¹⁷ Iswe tutali inza avhantu avhinji vhe vhalivhiisile izwi ilya Mulungu ngati shintu sha kulyajila ilonka. Ileelo ku maha aga Chilisiti, tukukumusya izwi ilyo ku vhugolosu vhwonti, nu Mulungu amanyile, mwe pe we atusonteleziizye.