2 VaKolinti 12 - ULufingwi uLupwa

Injozi iya pa minso amazelu iya Paavhuli nu vhuyeyevhazu vhwakwe

¹ Nkwanzilwa kuyitumvwa, poosye inga kuyitumvwa ukwo kutakumpa ilonka naalimo. Ishi nkwanza kuyitumvwa kuzya njozi iya pa minso amazelu ni zinji zye andolesiizye uMwene uYeesu.

² Imumanyile umuntu wooka umulandati uwa Chilisiti, we amaaha 14 ge gatuuha, ányatuliilwe kusogola ku mwanya, ahafiha ku mwanya iya vhutatu. Lwe akunyatulwa, ntámanyile kuuti pamo áali nu muvhili uno, poosye kuuti pamo atáali nu muvhili uno, ileelo uMulungu we amanyile.

³ Imanyile kuuti umuntu uyo ányatuliilwe, ileelo ntamanyile kuuti pamo ányatuliilwe nu muvhili uno, poosye kuuti pamo atáali nu muvhili uno, uMulungu we amanyile.

⁴ Imanyile kuuti ányatuliilwe kusogola ku Paladiiso. Ukwo ahiivwa amazwi aga kusukumizya nkaani ge umuntu atangayanga, havhili atakwitishilwa kugayanga.

⁵ Ishi nkuyitumvwa kuzya muntu uyo. Ine ntakuyitumvwa vwe indi, nkandi nkuyitumvwa kuzya vhuyeyevhazu vhwane.

⁶ Poosye inga nanzaga kuyitumvwa, ntaamile imbanje ne mupukupuuku, mwe pe nkuyanga izya nalyoli. Ileelo nkuyidinda, inga umuntu wonti atahandole kuuti nkondeeye nkaani kuluusya zye vhakuzilola nu kuzyivwa kufuma kuli ine.

⁷ Ileelo inga ntahayitumvwe nkaani kuzya kusukumizya inyinji zye uMwene uYeesu ándolesiizye, nápeliilwe amayimba mu muvhili waane ge gali inza ilyimvwa. Amayimba igo gáfumile kwa havhizya uwa Seetano, átumiilwe inga anjimvwe, inga ndeshe kuyitumvwa nkaani.

⁸ Nkamulambiilizya uMwene lutatu, kuuti amposhe mu mayimba igo.

⁹ Ileelo uweene ahambuuzya ahati, “Uvhwila vhwane vhukukwiliiye, mwe pe mu vhuyeyevhazu mwe amaha gaane gakuloleha.” Kuli izyo, kwe nkutiimaje ku luseshelo ulupiti kuzya vhuyeyevhazu vhwane, inga amaha aga Chilisiti gavhe pooka niine.

¹⁰ Ishi indi nu luseshelo kuzya vhuyeyevhazu nu kuligwa nu kuvha mu ntamwo nu kuvha mu mayimba nu kuyimvilwa kuzya Chilisiti, mwe pe lwe nkuvha ne muyeyevhazu, pe nkuvha na maha mwa Chilisiti.

Amaganigani aga Paavhuli ku Vhakolinto

¹¹ Nkuyanga ngati ne mupukupuuku, ileelo imwe mwamvijiilizya kuyanga vhwevhulo. Imwe mwanzilwaga kunkomeshezya inyinza, mwe pe poosye inga ntakushindikwa, ine te ne mutumwa umunsi kuvhaluusya vhaala vhe mukuti, “vhatumwa avhapiti.”

¹² Lwe náali kuli imwe náali nu vhujimbiilizu, havhili nkavhombaga amafindango ni zya kusukumizya ni vilolesyo vwe vikulolesya kuuti ine ne mutumwa.

¹³ Shitaliipo she návhomvile ku vivhanza ivinji she ntávhomvile kuli imwe. Pamo she nánanzile sha kuuti ntávhatamwizye kuuti munavwaje. Inga uvhwo vhwe vhunanzi vhwane, munswile!

¹⁴ Ishi nkuyisengaanya kwinza kuli imwe ulwa vhutatu, ileelo te ninze imbatamwe kuuti munaavwe. Ntakwanza ivintu vwinyu, nkandi nkuvhanza imwe. Nkuyanga vhwevhulo, mwe pe avhaana vhatakwanzilwa kusengula ivintu, inga vivhe vwa vhapaafi, nkandi avhapaafi vhe vhakwanzilwa kusengula ivintu, inga vivhe vwa vhaana.

¹⁵ Ine indi nu luseshelo kufumwa ivintu vwane nu kuyifumwa kuvhaavwa imwe. Ileelo ishi yikuloleha kuuti, lwe ine nkwonjezya kuvhakunda nkaani, nkulola ishikunzi shiinyu shikusheepa kuli ine.

¹⁶ Poosye inga mukwitiha kuuti ntávhatamwizye imwe kuuti munaavwe, ileelo vhamo muli imwe vhakuti, “UPaavhuli mushevu, avhalemile insiivho kwi idala ilya kuvhahopenkanya.”

¹⁷ Vhuli, návhomvile uvhuhopenkanyi, inga inyatule shonti kuli imwe kutuushila avhantu vhe návhasonteleziizye?

¹⁸ Námulambiliziizye uTiiti pooka nu wamwitu uwunji kuuti ayinze kuli imwe. Vhuli, uTiiti ányatuuye shimo kuli imwe? Nze ine nu weene tuli umwoyo wooka mu mbombo, havhili poosye ulujendo lwitu luli lwoka!

¹⁹ Pamo mukusiivha kuuti ahavhaliilizyo honti iha, tukuyiyanjila, inga mutahatulole kuuti twe vhavhiivhi. Iswe tukuyanga izi, mwe pe twe vhavhomvi avha Chilisiti, nu Mulungu amanyile. Vhankundwa vhaane, tukuvhomba izi zyonti kuvhazenga imwe mu lwitiho.

²⁰ Ishi nkwogopa kuuti lwe nkwinza kuli imwe, intahinze imbaaje muli nu lujendo lwe ntalusungwilwe. Ilyo lilimbiiha kuvhomba zye mutasungwilwe. Nkwogopa kuuti lumo ingavhaaga muli ni ivho nu mwone nu mulaha nu lupapilo ni ndigo ni iyevho nu kuyitumvwa nu vhusambusu.

²¹ Havhili nkwogopa kuuti lwe nkwinza kuli imwe, uMulungu waane kwe ambiishe kuuti ndole insoni pilongolela lyinyu. Kwe nswimiililwe kulola avhantu avhinji muli imwe vhashiili kutonta uvhutalamalandu vhwe vhávhomvile. Vhashiili vhakuvhomba uvhuvhembu nu vhulugusu ni mpapilo izyamwavho izya vhumalaaya zye vháali nazyo hali.