2 VaKolinti 11 - ULufingwi uLupwa

UPaavhuli na vhatumwa avha ilenga

¹ Poosye inga nkuyanga ngati ne mupukupuuku, nkulaavha muntejeelezye.

² Ine indi nu vhuzuvha niimwe vhwe vhukufuma kwa Mulungu. Nkuyanga vhwevhulo, mwe pe muli inza umulindu uwa mwoyo umuzelu we atamumanyile naalumo umwanaavuli, we námuzinjiiye kwimalwa nu mwanaavuli wooka vhweleele, we wu Chilisiti.

³ Ileelo ishi nkwogopa kuuti inza uEeva vwe áhopeliilwe ni njoha yiila, niimwe mutahinze muhopelwe, muvhuleshe uvhugolosu na mooyo giinyu amazelu kwa Chilisiti.

⁴ Nkuyanga vhwevhulo, mwe pe imwe mwe vhapupuusu kumuposheela umuntu we akwinza kumukumusya uYeesu uwunji we iswe tutamukumusiizye. Havhili mukumuposheela umupepo uwunji, poosye izwi ilinji lye mutaposheleeye kufuma kuli iswe.

⁵ Ine te kuuti ne munsi kuluusya ivho vhe vhakuyilola kuuti, “Vhatumwa avhapiti.”

⁶ Poosye inga nkuloleha ntakuyanga ahinza, uvhumanyi vhwane vhupiti. Tulolesiizye ilyo kuli imwe ahavhaliilizyo honti ni mbazu zyonti.

⁷ Vhuli, návhomvile uvhutalamalandu lwe ine nayiisya kwi idala ilya kulumbiilila izwi ilya Mulungu kuli imwe ishisita amalipilo, inga imwe mutiimwe?

⁸ Lwe nkuvhomba imbombo kuli imwe, nkaposheelaga ivwa kunaavwa kufuma ku vivhanza ivinji. Kufumiilana niilyo náamile ngati nkuvhafwula ivintu vwavho, inga mbaavwe imwe.

⁹ Ahavhaliilizyo he náamile pooka niimwe, lwe nasovhelwa ntámutamwizye umuntu nuumo, mwe pe avhamwitu vhe vháfumile ku Makedooniya vhámpiiye vwe nkanzaga. Kuli ilyo, náamile minso, inga ndeshe kuvhatamwa imwe poosye inga hansi, havhili kwe njendeelele kuvha minso.

¹⁰ Inza vwe uvhwanalyoli uvhwa Chilisiti vhuli muhati yaane, ataliipo umuntu nuumo mu shigavho isha nsi isha Akaaya, we angandinda kuyitumvwa kuzya kulumbiilila kuli imwe ishisita kuposheela ivwa kunaavwa kufumwa kuli imwe.

¹¹ Lwe nkuyanga vhwevhulo, te kuuti ntavhakunzite, uMulungu amanyile kuuti mbakunzite.

¹² Kwe njendeelele kuvhomba inza vwe nkuvhomba ishi, inga avhatumwa ivho vhe vhakuti vhapiti vhapootwe isha kuyitumvwa kuuti vhakuvhomba inza iswe.

¹³ Avhantu inza ivho vhatumwa avha ilenga, avheene vhavhomvi vhe vhakuhopenkanya, vhakuyivhiiha ngati vhatumwa avha Chilisiti.

¹⁴ Kuli ilyo tutakusukumila, mwe pe woope uSeetano wuuyo akuyigalulanya kuvha ngati wu havhizya uwa vhuzelu.

¹⁵ Pe tutakusukumila lwe vhoope avhavhomvi vhaakwe, vhakuyigalulanya kuvha ngati vhavhomvi avhagolosu. Uvhusililishilo vhwavho vhaliposheela zye zikulandatana ni mbombo zyavho.

UPaavhuli akuyitumvwa kuzya mayimba gaakwe

¹⁶ Nkuvhavhuuzya havhili nkuti, umuntu atahasiivhe kuuti ine ne mupukupuuku! Ileelo poosye inga mukuti ne mupukupuuku, nkuvhalaavha mutejeelezye, inga niine injitumvwe hansi.

¹⁷ Amazwi ge nkuyanga ishi aga kuyitumvwa, atandajiziizye uMwene Yeesu, nkuyanga inza umuntu umupukupuuku.

¹⁸ Mwe pe avhantu avhinji vhakuyitumvwa kuzya mbombo iya mu nsi, pe niine injitumvwe.

¹⁹ Imwe mukuyilola kuuti muli ni njeele, ye nongwa mukujimbiilila nu kuvhiitiha ku luseshelo avhantu avhapukupuuku.

²⁰ Yeenya, mukumujimbiilila nu kumwitiha poosye umuntu we akuvhavhiiha mu vhuzya nu kuvhiivhila nu kugoma ivintu vwinyu nu kuyitumvwa nu kuvhaliga nu kuvhahoma ku minso.

²¹ Nkulola insoni kuyanga kuuti pe iswe twáli twe vhayeyevhazu kuleha kuvhomba izyo. Ishi nkuyanga ngati ne mupukupuuku, inga aliipo umuntu we akwanzilwa kuyitumvwa ku zya shintu shonti, niine nkwanzilwa kuyitumvwa.

²² Inga avheene Vhahebuuli, niine ne Muhebuuli, inga avheene Vhaisilayeeli, niine ne Mwisilayeeli, inga avheene vha mu mpaapo izya Aabulahamu, niine ne wa mu mpaapo izya Aabulahamu.

²³ Ishi injanje ngati mpenile! Inga avheene vhavhomvi vha Chilisiti, ine ne muvhomvi uwa Chilisiti kuluusya avheene. Ine mbomvile imbombo ku mute kuluusya avheene, ulwinji nkunziilwe mu jeela, havhili nkomwilwe nkaani, havhili ulwinji mpulumusile kufwa.

²⁴ Náhomwilwe na Vhayuuda indiisa 39, vhámbombeeye vhwevhulo lusaano.

²⁵ Náhomwilwe na Vhaluumi lutatu, náhomwilwe na mavhwe lwoka, imeeli yinanjishiiye lutatu, havhili nátendiime mwa sumbi uvhusiku nu musanya.

²⁶ Ulwinji lwe nkushuula, nkapulumuhaga kulovha mu majenje na mu vhapumula vintu nu kuhomwa na Vhayuuda avhamwitu na vhe te Vhayuuda. Havhili nkapulumuhaga mu nkaaya na mu luugwa na mwa sumbi na mu vhe vhahayivhiihaga kuuti vhiitisi avhamwitu.

²⁷ Mbomvile imbombo ingomu nu kuyimvilwa, ulwinji nkaasite she ndamuuye, njimvile ni nzala ni shinyooto, ulwinji ntendiime ishisita kulya, nu kutendama ni mpepo ishisita amenda.

²⁸ Pooka niizyo zyonti, insiku zyonti nkusiivha izya vivhanza vwonti.

²⁹ Inga wumo muyeyevhazu, niine nkuyiivwa kuuti ne muyeyevhazu, inga wumo vhamupelela kuvhomba uvhutalamalandu, niine nkuvha nu vhuswimiilizu.

³⁰ Inga yikwanzilwa kuyitumvwa, nkuyitumvwa ku vhuyeyevhazu vhwane.

³¹ UMulungu, uTaata uwa Mwene uYeesu we akwanzilwa kushindikwa shiima, amanyile kuuti ntakuluma ilenga.

³² Lwe indi mu nkaaya iya Damaasiki, umulongozi we ahalongozyaga ishigavho isha nsi she sháamile mu vhumwene uvhwa mwene uAleeta, ávhiisile avhaguulizi mu malyango aga nkaaya iyo inga vhandeme.

³³ Ileelo avhantu vhamo vhahambiiha mu shitundu nu kuniisya kunzi kutuushila pi idiliisha lye lyáli pa lupitu ulwa nkaaya iyo, nkapulumuha kulemwa.