2 VaKolinti 10 - ULufingwi uLupwa

UPaavhuli akuvhaamula vhe vhakumusuufwa

¹ Ishi, ine ne Paavhuli ne nkuloleha ne mutonsu lwe indi pooka niimwe, ileelo nkuloleha ne muhali lwe indi ukutali niimwe, nkuvhalambiilizya ku vhwahayiisye na ku vhutonsu uvhwa Chilisiti,

² kuuti lwe ninza kuli imwe mutahambiishe kuvha ne muhali. Nkuyanga vhwevhulo, mwe pe ingavha ne muhali ku vhantu vhonti vhe vhakusiivha kuuti, iswe tukulandata izya mu nsi.

³ Poosye inga tukulandila mu nsi, tutakulwa uvhulugu inza avhantu avha mu nsi.

⁴ Ivilwilo vwe tukulwila uvhulugu uvhwo te vwa mu nsi, vili na maha kufuma kwa Mulungu, vikunanganya amalinga gonti aga mulugu. Tukunanganya amazwi gonti aga ilenga.

⁵ Tukunanganya amabaado ni zinji zyonti zye zikuvhadinda avhantu kuuti vhatamumanyaje uMulungu. Havhili tukuzigoma insiivho zyonti, inga zimushindihaje uChilisiti.

⁶ Pe lwe mwamushindiha uChilisiti nziila, iswe tuyisengiinye kuvhasunda vhonti vhe vhatakumushindiha.

⁷ Mwenyaaje zye zili pilongolela lyinyu. Umuntu wonti we akuyilola kuuti uweene muntu wa Chilisiti, amanye kuuti niiswe twe vhantu vha Chilisiti inza uweene.

⁸ Ntakulola insoni kuyitumvwa kuzya maha ge uMwene uYeesu atupiiye, mwe pe amaha igo gatakuvhananganya, nkandi gakuvhazenga mu lwitiho.

⁹ Lwe nkuvhasimbila ukalaata, ntakwanza kuloleha kuuti nkwanza kuvhoogofwa.

¹⁰ Nkuyanga vhwevhulo, mwe pe vhamo vhakuti, “Avhakalaata avha Paavhuli vhali na mazwi amahali, havhili vhali na mazwi amamwamu. Ileelo lwe ali pooka niiswe atakuvha na maha, havhili amazwi gaakwe gakulolesya gatali nu vhumwamu.”

¹¹ Umuntu we akuyanga vhwevhulo, amanye kuuti zye tukuvhasimbila lwe tuli ukutali, zye tukuzivhomba lwe tuli pooka niimwe.

¹² Tutakuyivhiiha inga hansi mu mpuga yooka, poosye kuyiholanya na vhantu vhe vhakuyihomeshezya vhuuvho inyinza. Avhantu vhe vhakuyitumvwa nu kuyiholanya vhuuvho, vhatashimanyile naashimo.

¹³ Ileelo iswe tutakuyitumvwa kuluusya ishipimo isha mbombo ye atupiiye uMulungu. Imbombo iyo ye yila ye tukuvhomba na kuli imwe.

¹⁴ Tutakuyitumvwa kuluusya ishipimo isha mbombo yiitu lwe tukuyanga ku maha kuli imwe, havhili iswe twáli twe vhatanzi kuvhaleetela Izwi iLyinza ilya Chilisiti.

¹⁵ Havhili tutakuyitumvwa kuzya mbombo iya vhantu avhanji. Ileelo tukusuuvhila kuuti vwe ulwitiho lwinyu lukwonjela kukula, pe imbombo yiitu pahati yiinyu yikujendeelela kwonjela.

¹⁶ Ipo pe kwe tulumbiilile Izwi iLyinza ku nsi izinji kwe Izwi ilyo litalumbiliilwe, mwe pe tutakwanza kuyitumvwa kuzya mbombo ye yikuvhombwa mu nsi nu muntu uwunji.

¹⁷ Yeenya, uVhusimbe uVhufinjile vhukuti, “Umuntu wonti we akuyitumvwa ayitumvwaje kuzya MWENE uMulungu.”

¹⁸ Umuntu wonti we akuyihomeshezya inyinza wuuyo atakwitishilwa, nkandi we uMwene uYeesu akumuhomeshezya inyinza.