2 VaKolinti 1 - ULufingwi uLupwa

Umulaamu

¹ Ukalaata uno nsimvile neene ne Paavhuli, ne uMulungu aniisite ku lukasamo lwakwe kuuti mbe ne mutumwa uwa Chilisiti uYeesu. Ine nu wamwitu uTiimoti tukuvhalamuha imwe mwe muli mu shivhanza isha Mulungu, mwe muli mu nkaaya iya Kolinto, pooka na vhafinjile vhonti vhe vhali mu shigavho isha nsi isha Akaaya.

² UTaata wiitu uMulungu nu Mwene uYeesu Chilisiti vhavhafwilaje uvhwila nu kuuvhapa uvhutehamu.

Ulusuvhaalizyo ulwa Mulungu mu mayimba

³ Ashindikwaje uMulungu, uTaata uwa Mwene wiitu uYeesu Chilisiti, uTaata uwa vhwila, havhili we wu Mulungu we akutusuvhaalizya mu zyonti.

⁴ Uweene akutusuvhaalizya mu mayimba giitu gonti, inga niiswe tuvhasuvhalizyaje avhanji vhe vhali mu mayimba aga mavhiila mu mavhiila. Tukuvhasuvhaalizya kutuushila insuvhaalizyo ziila zye uMulungu atupiiye.

⁵ Yeenya, inza vwe amayimba ge uChilisiti áyimvile gakwonjela kuli iswe, vwe woope uMulungu akwonjezya kutusuvhaalizya kutuushila kwa Chilisiti.

⁶ Poosye inga tukuyimba, tukuyimba kuzya lusuvhaalizyo nu vhuposhi vhwinyu. Havhili, poosye inga tukusuvhalizilwa, kwe kuzya lusuvhaalizyo lwinyu lwe lukuvhavhiiha kujimbiilila mu mayimba ge niiswe tukuyimba.

⁷ Ulusuuvhilo lwitu kuli imwe lupiti, mwe pe tumanyile kuuti vwe mukuyimba inza iswe, vwe mukusuvhalizilwa inza iswe.

⁸ Vhamwitu, tukwanza mumanye vwe twáyimvile mu shigavho isha nsi isha Aasiya. Amayimba ge gátwazile gáali mapiti nkaani, gálusiizye na maha giitu, tuhasiivhaga kuuti kwe tufwe.

⁹ Nalyoli twáli ngati vhantu vhe vhalonziilwe kuvhagoga. Ilyo lyáfumiiye inga tuleshe kusuuvhila amaha giitu, nkandi uMulungu we akuvhazyusya avhafwe.

¹⁰ Uweene we átuposile mu vhufwe uvhwa kwogofwa nkaani, havhili kwe ajendeelele kutupoha. Iswe tukumusuuvhila uweene kuuti kwe avhombaje vhwevhulo ahavhaliilizyo honti,

¹¹ kwi idala ilya imwe kutwavwa kumulaavha uMulungu. Uweene akwivwa impuuto zyinyu nu kutuloota iswe. Kuli izyo, avhantu avhinji kwe vhamusalifwaje uMulungu kuzya vhwila vhwakwe kuli iswe.

UPaavhuli akwandula uvhulendo uvhwa kusogola ku Kolinto

¹² Ishi iswe tukuyitumvwa kuli ili: Tukuyilola mu mooyo giitu kuuti mu nsi umu, inkaani kuli imwe, twálandiiye ku vhugolosu, havhili na ku mwoyo umuzelu kufuma kwa Mulungu. Tutávhomvile vhwevhulo ku vhushindamu vhwitu uvhwa njeele, nkandi ku vhwila uvhwa Mulungu.

^13-14 Kuli izyo, tutakuvhasimbila amazwi amagomu, nkandi ge mungavhaazya nu kumanyinsanya ahinza. Ahavhaliilizyo iha mukumanya hansi, ileelo nkusuuvhila kuuti isiku limo, muliimanya zyonti. Pe isiku lye aligaluha uMwene wiitu uYeesu, muliyitumvwa ku zyitu, inza vwe niiswe tukuyitumvwa ku zyinyu.

¹⁵ Mwe pe imanyile kuuti muliyitumvwa ku zyitu, nanzaga kulongolela kwinza kuli imwe suuti. Kuli izyo, mwaamile muposheelaje uvhuloote luvhili kuzya ine kwinza ukwo luvhili.

¹⁶ Naasivhiliiye kwinza kuli imwe lwe nkusogola mu shigavho isha nsi isha Makedooniya, nu kugaluha havhili kuli imwe lwe naafuma ukwo, inga mumpe ivwa kunaavwa kumfisya mu shigavho isha nsi isha Yudeeya.

¹⁷ Vhuli, lwe nagalulanya insiivho izyo, mukusiivha kuuti ne muntu wa mangalungalu? Pamo mukusiivha kuuti ine nkulongolwa nu lukasamo lwane, kuuti nti, “Eena” havhili inti, “Ndaali!”

¹⁸ Ileelo ishi inza vwe uMulungu mutungamu, amazwi giitu kuli imwe gataamile ga kuuti, “Eena” havhili kuuti, “Ndaali.”

¹⁹ Nkuyanga vhwevhulo, mwe pe uYeesu Chilisiti uMwana wa Mulungu we ine nu Silwano nu Tiimoti twámukumusiizye kuli imwe, atáamile muntu wa kusangaanya amazwi kuuti, ayanje ati, “Eena” havhili ati, “Ndaali.” Uweene ahavhaliilizyo honti wu “Eena,” kwe kuuti zye akuyanga zya nalyoli.

²⁰ Zyonti zye uMulungu áfinzile kuuti aliitupa kwi idala ilya Chilisiti zya nalyoli, mwe pe iswe kutuushila kwa Chilisiti tukuti, “Amina,” kwe kuuti zya nalyoli, kuzya kumushindiha uMulungu.

²¹ UMulungu we akutugomwa iswe niimwe, havhili atusavhuuye kuuti tuvhe twe vhiitisi avha Chilisiti,

²² nu kutuvhiiha ishilemezanyo kuvha swe vhantu vhaakwe, nu kumuvhiiha mu mooyo giitu uMupepo uMufinjile, inga avhe wu hapinjiha ku zye áfinzile kuutupa.

²³ Ntiinzile havhili ku Kolinto ukwo, mwe pe ntanzaga kuvhavwalazya amooyo giinyu. Zye nkuyanga zya nalyoli, uMulungu wu hoome.

²⁴ Te kuuti iswe tukwanza kuvhavijiilizya zye mukwanzilwa kuvhomba mu lwitiho lwinyu, mwe pe imwe mugomile mu lwitiho. She shikwanzilwa kuli iswe, kwe kuvhomba imbombo pooka niimwe, inga museshele.