2 Timoti 4 - ULufingwi uLupwa

¹ Nkukulajizya pilongolela ilya Mulungu na pilongolela ilya Chilisiti uYeesu we alivhalonga avhapuuma na vhafwe, lwe agaluha kukonzya uvhumwene vhwakwe.

² Uvhakumusizyaje avhantu izwi ilya Mulungu, yivhe kwe ku havhaliilizyo he hahondeeye, poosye he hatahondeeye. Havhili uvhasohaje nu kuvhapilila nu kuvhagomwa amooyo nu kuvhasambiilizya vhujimbiilizu vhwonti.

³ Yeenya, ahavhaliilizyo he hakwinza, avhantu te vhahitihaje kutejeelezya insambiilizyo izya nalyoli. Ileelo vhalisungwaga kulandata impapilo zyavho, mwe pe vhalivhavhungaaniha avhasambiilizi avhinji vhweleele, vhe vhalivhavhuzyaga amazwi aga kuvhahondezya lwe vhakutejeelezya.

⁴ Vhaliileha kutejeelezya amazwi aga nalyoli, vhalilandata ivwili ivwa ilenga.

⁵ Ileelo iwe uyikonzyaje mu zyonti. Ahavhaliilizyo aha mayimba, ujimbililaje. Uvhalumbililaje avhantu Izwi iLyinza nu kuvhomba zyonti izinji zye nyinza mu mbombo yaaho.

⁶ Nkukuvhuuzya izyo, mwe pe ine vhakwanza kungoga inza kufumwa impuutile iya divaayi kwa Mulungu, mwe pe ahavhaliilizyo haane aha kufwa hafisile.

⁷ Naalwa uvhulugu ahinza, ulutumvanyo ulwa luvhilo lwe nashimbilaga, ishi naamala, nazyimililila insambiilizyo izya lwitiho.

⁸ Ishi uMwene ambishiiye ishipambwi isha vhupooti isha vhugolosu. Uweene, uMulonzi uwa Nalyoli, alimpa shenesho isiku liila lye alivhalonga avhantu vhonti ku vhugolosu. Te neene neeka ndaali ne ndiposheela ishipambwi, nkandi na vhanji vhonti vhe vhasungwilwe nkaani kulola kugaluha kwakwe.

Amazwi aga kulagana

⁹ Tiimoti, ukanyile kwinza kuli ine naluvhiilo.

¹⁰ UDeema andesile, mwe pe akuzisungwa izya mu nsi, asogooye mu nkaaya iya Tesaloniiki. UKileesike asogooye mu shigavho isha nsi isha Galaatiya nu Tiiti asogooye mu shigavho isha nsi isha Dalimatiya.

¹¹ ULuuka weeka we asyaye pooka niine ipa. Ahavhaliilizyo he ukwinza, uyinze pooka nu Maaliko, mwe pe akwanzilwa ku mbombo yaane.

¹² Naamusonteleziizye uTikiiko mu nkaaya iya Hefeeso.

¹³ Lwe ukwinza, undeetele inkanzu yiila ye náyilesile kwa Kaalipo mu nkaaya iya Tolowa. Havhili undeetele na makalaata gaala, inkaani aga makwembe.

¹⁴ UAlekizanda ula we akusyana ishaaba, ámbombeeye havhiivhi nkaani. UMwene uYeesu alimulonga ku mbombo zyakwe zye ámbombeeye.

¹⁵ Uvhe minso nawo, mwe pe ádindanjiziizye nkaani amazwi giitu.

¹⁶ Lwe nkuyiyanjila izya kuyipoha kwi ilonjelwi ulwa kwanda, ataliipo umuntu naawumo we ánavwizye, nalyoli vhonti vhándesile. UMulungu avhaswile kuli izyo.

¹⁷ Ileelo uMwene uYeesu áamile pooka niine, ahampa amaha. Nkakumusya Izwi iLyinza mu vhantu vhe te Vhayuuda, lihavhafishila vhonti vhahiivwa. Pooka niizyo, ahampoha ku vhe vhándonjeleeye kuuti vhangoje inza kufwula ishintu mwi ilomu ilya nsama.

¹⁸ Kwe ajendeelele kumpoha mu mbiivhi zyonti zye kwe mbombelwe, inga amfisye ku mwanya ku vhumwene vhwakwe ku vhutehamu. Ashindikwaje shiima shiima! Amina.

Umulaamu ku vhiitisi avha ku Hefeeso

¹⁹ Undamushile uPuliisila nu Aakila, na vhantu avha mu nyumba iya Nesifoolo.

²⁰ UElaasito ásyaye mu nkaaya iya Kolinto. Woope uTolofiimo námulesile avhinile mu nkaaya iya Mileeto.

²¹ Ukanyile kwinza uku naluvhiilo, lwe ahavhaliilizyo aha lupepu hashiili kwanda. UEebulo nu Puude nu Liino nu Kilawudiya na vhamwitu avhanji vhonti vhakukulamuha.

²² UMwene uYeesu avhe pooka niiwe. Avhafwilaje uvhwila imwe mwenti.