2 Timoti 2 - ULufingwi uLupwa

Kujimbiilila mu mbombo iya Mulungu

¹ Ishi we mwana waane, uvhe na maha kwi idala ilya vhwila vhwe tukuvhwaga mwa Chilisiti uYeesu.

² Amazwi ge nkagayangaga pilongolela ilya vhahoome avhinji, niiwe wágivuuye. Amazwi igo uvhasambiilizye avhantu avhatungamu vhe vhangavhasambiilizya na vhanji.

³ Ujimbililaje mu mayimba pooka niine, inza umusikaali umwinza uwa Chilisiti uYeesu.

⁴ Ataliipo umusikaali we akuvha mu mbombo, havhili akuyinjizya mu zinji zye te zya vhusikaali. Nalyoli akwanzilwa kumuhondezya usongo waakwe.

⁵ Havhili, umuntu we akutumvanya mu lutumvanyo ulwa luvhilo, inga atakulandata indajizyo zye zivhisiilwe, poosye inga apoota, atangapeelwa ishipambwi isha vhupooti.

⁶ Woope umulimi we akulima ku mute, akwanzilwa kuuti avhanje wa kwanda kutomola ivwa mu magunda.

⁷ Izyo zye nkukuvhuuzya, uzilemaje nkaani, mwe pe uMwene uYeesu kwe aakupe injeele izya kuzimanya zyonti.

⁸ Umukumbuhaje uYeesu Chilisiti we ázyusile, uwa mu luho ulwa mwene Daavhudi, inza vwe likuyanga Izwi iLyinza lye nkulumbiilila.

⁹ Izwi ilyo lye likumbiiha kuuti njimbaje nu kukungwa na manyoloolo ngati ne muvhomba mbiivhi. Ileelo izwi ilya Mulungu litakukungwa!

¹⁰ Ishi nkujimbiilila ku zyonti, inga vhoope vhe vhasavhuliilwe nu Mulungu, vhavhwaje uvhuposhi vhwe vhuli mwa Chilisiti uYeesu nu vhushindamu vhwakwe uvhwa shiima.

¹¹ Kuli izwi ilya nalyoli lye likuti, “Inga twafwa pooka nu Chilisiti, tulitendama pooka nawo.

¹² Inga tukujimbiilila, tulikonzya pooka nawo. Ileelo inga twamuhaana, pe woope alituhaana.

¹³ Inga poosye te swe vhatungamu, uweene ali she mutungamu kuli iswe, atangayihaana.”

Umuvhomvi umwinza

¹⁴ Uvhakumbusyaje avhantu izyo nu kuvhasoha pilongolela ilya Mulungu, inga vhaleshe kudalinkana ku mazwi ge gatakwanzilwa. Amadali igo gatali nu vhwinza naavhumo, gakuvhananganya vhweleele vhe vhakutejeelezya.

¹⁵ Uyifumwaje ku mute kuyilolesya kuuti we muvhomvi we uyitishiliilwe nu Mulungu. Usambilizyaje izwi ilya nalyoli vwe uMulungu akwanza, nu kuvha we muvhomvi we atakulola insoni.

¹⁶ Utantamaje ku mazwi aga kuyitumvwa ge gatakufuma kwa Mulungu, mwe pe gakuvhatwala avhantu ukutali nkaani nu Mulungu.

¹⁷ Insambiilizyo zyavho zikuvha ngati nkonko. Muli ivho aliipo uHimenaayo nu Fileeto.

¹⁸ Ivho vhapuvile nkaani, vhavhulesile uvhwanalyoli. Vhakusambiilizya kuuti kuzyuha ukwa vhafwe kuhatuuha. Kuli izyo, vhakunanganya ulwitiho ulwa vhanji.

¹⁹ Ileelo ulwalo ulwa Mulungu ulwa lwitiho lwe lugomu lwimiliiye, havhili lusimviilwe uvhwanalyoli vhwe vhukuti, “UMWENE uMulungu avhamanyile avhantu vhaakwe.” “Umuntu wonti we akuyanga kuuti muntu wa MWENE, akwanzilwa azileshe imbiivhi.”

²⁰ Mu nyumba impiti muli iviliilo ivwa mavhiila mu mavhiila. Vimo vwa sahaabu, ivwamwavho vwa mpiiya, havhili vimo vwa makwi ni vwamwavho vwa ivhumba. Vimo vwa kuvhombela imbombo iya mushinzi, ivwamwavho vwa kuvhombela imbombo ye te ya mushinzi.

²¹ Vhwevhulo, inga umuntu akuyizelufwa mu vhutalamalandu uvhwo vhwonti, kwe avhe shiliilo she uwa nyumba kwe ashivhombele mu mbombo izya mushinzi. Kwe avhe asavhuliilwe nu Mwene uYeesu, havhili kwe avhe nu vhwinza ku kwakwe uvhwa kuvhomba imbombo zyonti inyinza zye zikwanzilwa.

²² Uzishimbilaje impapilo imbiivhi izya vhujaaha. Ulandataje uvhugolosu nu lwitiho ni shikunzi nu vhutehamu. Umulaavhaje uMwene uYeesu pooka na vhaala vhe vhakumulaavha ku mwoyo umuzelu.

²³ Uyefwaje mu madali ge gatakwanzilwa na ga vhwalangani, mwe pe umanyile kuuti igo ge gakuleeta ivho ku vhantu.

²⁴ Umuvhomvi uwa Mwene uYeesu atakwanzilwa kuvha muntu wa ivho, nkandi kuvha mutonsu ku vhantu vhonti. Havhili akwanzilwa amanye kusambiilizya izwi ilya Mulungu nu kuvha mujimbiilizu.

²⁵ Inga avhantu vhakudalinkana nawo, avhasohaje ku vhutonsu. Lumo uMulungu angaavhapa kuvhuleha uvhutalamalandu vhwavho vhwonti, nu kuvhumanya uvhwanalyoli.

²⁶ Ipo pe uvhumanyi vhwavho vhukuvhagalushila havhili, vhakupulumuha mwi ilivha ilya Mukwalanzi, we avhalemile, inga vhavhombaje zye akwanza wuuyo.