2 Timoti 1 - ULufingwi uLupwa

UPaavhuli akumulamuha uTiimoti

¹ Ukalaata uno nsimvile neene ne Paavhuli, ne mutumwa uwa Chilisiti uYeesu ku lukasamo ulwa Mulungu. Ansonteleziizye kuuti ndumbililaje avhantu izya lufingwi ulwa vhulanzi mwa Chilisiti uYeesu.

² Ine nkukusimbila iwe Tiimoti, mwana waane we nkukunzite. UTaata uMulungu nu Mwene wiitu uChilisiti uYeesu vhakufwilaje uvhwila nu kuukupa ulupepeelezyo nu vhutehamu.

Kumulandata uChilisiti ishisita insoni

³ Nkumusalifwa uMulungu we nkumuvhombela ku mwoyo umuzelu, inza vwe avhataata vhaane vhoope vhahavhombaga. Nkumusalifwa ku mbombo yaaho, havhili nkukukumbuha mu mpuuto zyane uvhusiku nu musanya.

⁴ Nkukumbuha amansozi gaaho lwe tuhalehaanaga. Nsamvile kukulola, inga mbe nu luseshelo.

⁵ Nkukumbuha vwe umwitisile uMulungu ishisita ishifumbo, inza vwe unyinakulu waaho uLooyisi, nu maayi waaho uEwuniike vhoope vhamwitisile. Ishi indi nu vhwanalyoli kuuti vhwevhulo, vwe niiwe uli.

⁶ Kwi izwi ilyo nkukukumbusya kuuti usonshelezyaje ishikunjilwa isho she uMulungu ákupiiye, ahavhaliilizyo he nákuvhishiiye inyoovhe.

⁷ Yeenya, uMulungu atatupiiye umwoyo uwa ilyoga, nkandi atupiiye uMupepo uwa kuutupa amaha ni shikunzi nu mwoyo uwa kuyikonzya.

⁸ Ishi utalolaje insoni kuhomeshezya izya Mwene wiitu uYeesu Chilisiti, poosye kuzya ine kukungwa kuzya mbombo iya kukumusya uvhwanalyoli vhwakwe. Ileelo ujimbililaje amayimba pooka niine kuzya Izwi iLyinza, ku maha ge uMulungu ákupiiye.

⁹ Uweene átuposile, ahatwita kuuti tuvhe twe vhantu vhaakwe avhafinjile. Uvhuposhi vhwitu uvhwo vhutakufumiilana ni mbombo zyitu, vhukufumiilana nu lukasamo ulwa Mulungu wuuyo ku vhwila vhwakwe. Uvhwila uvhwo vhwe átufwiliiye mwa Chilisiti uYeesu, lwe insi yishiili kupelwa.

¹⁰ Ishi atulolesiizye apazelu uvhwila vhwakwe uvhwa kwinza ukwa Chilisiti uYeesu uMuposhi wiitu. Uweene ávhupoosite uvhufwe kwi idala ilya Izwi iLyinza, álolesiizye vwe avhantu vhalilandila shiima.

¹¹ Kuzya Izwi iLyinza ilyo uMulungu aniisite ine kuuti mbe ne hakumusya, havhili ne mutumwa nu kuvha ne musambiilizi.

¹² Izwi ilyo lye lihambiiha kuuti amayimba iga ganaaje. Ileelo ine ntakulola insoni, mwe imumanyile ahinza ula we nkamwitiha. Havhili indi nu vhwanalyoli kuuti ali na maha kuliguulila Izwi iLyinza kufiha pi isiku ilya vhusililishilo. Izwi ilyo ampiiye, inga mbasambiilizye avhantu.

¹³ Amazwi gonti ge ugivuuye ku kwane ga nalyoli, ugaleme. Usambiilile genego, havhili shivhe shiholanyo mu lwitiho ni shikunzi she shili mwa Chilisiti uYeesu.

¹⁴ Izwi iLyinza lye uMulungu akupiiye, uligulilaje ku maha aga Mupepo uMufinjile we akutendama muhati yiitu.

¹⁵ Iwe umanyile kuuti avhamwitu avha mu nsi iya Aasiya vhandesile. Muli ivho aliipo uFugeelo nu Helimogeene.

¹⁶ Ileelo uMwene uYeesu avhafwilaje uvhwila avhantu avha mu nyumba iya Nesifoolo, mwe pe uNesifoolo ahanavwaga ulwinji mu mayimba gaane amapiti. Havhili atahalolaga insoni kuzya kuuti nkunziilwe na manyoloolo iga.

¹⁷ Lwe aafiha mu nkaaya ino iya Luumi, ákanyiiye kundondola, ahanaaga.

¹⁸ Umanyile ahinza vwe ahanavwaga mu nkaaya iya Hefeeso. UMwene uYeesu ahamufwile uvhwila pi isiku ilya kulonga insi!