2 Peteli 2 - ULufingwi uLupwa

Avhasambiilizi avha ilenga

¹ Ahavhaliilizyo aha vhakuvhwi, vháfumiiye avhakuvhwi avha ilenga mu Vhaisilayeeli. Vhwevhulo, avhasambiilizi avha ilenga vhalifumila muhati yiinyu. Avhasambiilizi ivho vhalileeta ku vhuzigizigi insambiilizyo izya ilenga nu kumuhaana uYeesu uMulongozi uMupiti we ávhatavhuuye. Kwi idala ilya nsambiilizyo zyavho, vhaliyileteelela naluvhiilo kulovha kwavho.

² Havhili avhantu avhinji vhalilandataga amadala gaavho aga vhulugusu. Kuli izyo, vhamo vhaliyanda kulisaamula idala ilya nalyoli.

³ Avhasambiilizi avha ilenga ivho, ku mpapilo zyavho vhalivhavhuzyaga ivwili ivwa ilenga, inga muvhapanje ivintu vwinyu. Ileelo kufuma hali uMulungu ayisengiinye kuvhalonga, havhili akuzilola zye vhakuvhomba. Alivhalovwa naluvhiilo!

⁴ UMulungu atávhafwiliiye uvhwila, avhahavhizya vhe vhávhomvile uvhutalamalandu, ávhasumvile mu shiisi, mwe vhakunziilwe na manyoloolo. Mu shiisi umwo vhakuguliilila isiku ilya kulongwa.

⁵ Havhili ahavhaliilizyo aha Noowa uMulungu atávhafwiliiye uvhwila avhantu vhe vhatahamushindihaga, ávhalovwizye vhonti na mahavha aminji, ileelo ámuposile uNoowa pooka na vhantu avhanji 7. Lwe zyonti izyo zishiili kuvhombeha, uNoowa ahavhakumusizyaga avhantu kuuti vhavhombaje zye zikwanzilwa pilongolela ilya Mulungu.

⁶ Havhili uMulungu ávhalonzile avhantu avha mu nkaaya iya Sodooma ni ya Gomoola, ávhalovwizye nu mwoto, ávhapezile kuvha shiholanyo isha ziila zye zilivhaaga avhantu vhe vhatakumushindiha.

⁷ Mu vhantu ivho ámuposile uLooti, umuntu umugolosu, we ahayimvilwaga nkaani mu mwoyo waakwe kuzya vhutalamalandu uvhwa vhumalaaya vhwe avhantu vhahavhombaga mu nkaaya izyo.

⁸ Umuntu uyo ahatendamaga pooka na vhatalamalandu, ku nsiku inyinji ahaswimililwaga nkaani lwe akwivwa nu kulola imbombo zyavho izya vhutalamalandu.

⁹ Kuli izyo, uMWENE uMulungu amanyile kuvhapoha avhantu vhe vhakumushindiha kufuma mu ndingo zyavho. Havhili amanyile vwe aliivhapa isunde avhavhiivhi isiku liila ilya kuvhalonga.

¹⁰ Alivhalonga vhaala vhe vhakuzilandata impapilo izya vhuntu vhwavho uvhwa vhutalamalandu nu kugasuufwa amaha aga Mulungu. Avhantu ivho vhali nu lukaani, havhili vhakuyitumvwa, vhakuvisaamula ivipelwa ivishindamu ivwa ku mwanya.

¹¹ Poosye she avhahavhizya vhali na maha nkaani kuluusya avhasambiilizi ivho, vhatakuvilonjeelela, poosye kuvisaamula pilongolela ilya MWENE uMulungu.

¹² Avhantu ivho vhali inza ivihanu vwe vitali ni njeele vwe vikupaapwa, inga avhantu vhavilemaje nu kuvivhoola. Vhakuvisaamula ivintu vwe vhatavimanyile. Vhoope uMulungu alivhalovwa inza ivihanu ivwo kuzya vhutalamalandu vhwavho.

¹³ Avhantu ivho vhaliyimvilwa kuzya mayimba ge vhahavhavhombelaga avhanji. Avheene vhakuseshela kuvhomba izya vhupafu apazelu. Havhili lwe muli pooka navho pa mulyo uwa shikunzi, vhakuvhapezya insoni imwe, kuzya mbombo zyavho imbiivhi zye zili inza amabada mu mwenda umuzelu.

¹⁴ Ahavhaliilizyo honti vhakusiivha kuvhomba uvhuvhembu, vhatakuleha kuvhomba uvhutalamalandu. Vhakuvhahopenkanya avhantu vhe vhayeyevhazu mu lwitiho. Amooyo gaavho gavheleleeye kupapila ivwuma. Avhantu ivho vhatifiilwe.

¹⁵ Vhalilesile idala igolosu, vhateezile nu kulilandata idala ilya mukuvhwi uBaalamu, uMwana wa Beyooli. Uweene ásungwilwe amalipilo aga vhuvhiivhi.

¹⁶ Ileelo ahapililwa kuzya vhutalamalandu vhwakwe. Indogomi ye yitakuyanga, yihayanga inza umuntu, kuvhudinda uvhwalangani uvhwa mukuvhwi uyo.

¹⁷ Avhantu ivho vhali ngati vifula ivwa minzi vwe vwumile. Havhili vhali ngati mavhingo ge avhantu vhasuvhiiye imvula kuuti kwe yitoonye, ileelo inkungu iya maha yinza, nu kugapempenusya genego, ni mvula yitatoonya. Kuli izyo, vhavhishiliilwe ishiisi ishipiti kuvha vhwe vhutendamo vhwavho.

¹⁸ Avheene vhakuyanga amazwi aga kuyitumvwa ge gatakwavwa naashimo. Havhili ku mpapilo izya vhumalaaya zye zikufumiilana nu vhuntu vhwavho uvhwa vhutalamalandu, vhakuvhahopenkanya avhiitisi vhe vhatagomile mu lwitiho, vhe vhalesile kuvhomba zye avhatalamalandu vhakuvhomba.

¹⁹ Vhakufinga kuuti kwe vhaavhape uvhusatushe avhiitisi avhayeyevhazu ivho, she avheene vhazya avha vhutalamalandu. Nkuyanga vhwevhulo, mwe pe umuntu akuvha muzya uwa shiila she shikumukonzya.

²⁰ Avhantu vhe vhavhushimbiiye uvhutalamalandu uvhwa mu nsi kwi idala ilya kumumanya uMwene nu Muposhi wiitu uYeesu Chilisiti, inga vhagalushila havhili kuvhomba uvhutalamalandu, uvhulanzi uvhwa kumpeleela uvhwa vhantu ivho vhuliivha vhuvhiivhi nkaani, kuluusya ku vhwandilo.

²¹ Yaamile kwashi ku vhantu ivho inga vhataalimanyile idala igolosu, kuluusya kulimanya idala ilyo nu kuzileha indajizyo imfinjile zye vhaposheleeye.

²² Zye vhakuvhomba avhantu ivho zikulolesya uvhwanalyoli uvhwa miivhi ge gakuti, “Imbwa yagalushila amatapisi gaakwe,” na gamwavho ge gakuti, “Inguluvhe ye vhayoziizye, yikugalagaata havhili mu mahata!”