2 Peteli 1 - ULufingwi uLupwa

Umulaamu

¹ Ukalaata uno nsimvile neene ne Peeteli, ne muvhomvi, havhili ne mutumwa uwa Yeesu Chilisiti. Nkuvhasimbila imwe mwe muposheleeye ulwitiho luula ulwa nsavho, lwe niiswe tuluposheleeye. Muluposheleeye ulwitiho ulwo kwi idala ilya vhugolosu uvhwa Mulungu wiitu uMuposhi uYeesu Chilisiti.

² UMulungu ayonjezye kuvhafwila uvhwila nu kuuvhapa uvhutehamu kwi idala ilya kumumanya uweene nu Yeesu uMwene wiitu.

Mwisiitwe nu kusaavhulwa nu Mulungu

³ UMulungu ku maha gaakwe atupiiye ivintu vwonti vwe tukuvwanza mu vhulanzi vhwitu, nu kuvha nu lujendo ulwinza pilongolela lyakwe. UMulungu atupiiye vwonti ivwo kwi idala ilya kumumanya uweene we atwisite ku vhushindamu na ku vhwinza vhwakwe wuuyo.

⁴ Kwi idala ilyo, uMulungu afinzile kuutupa ivintu ivipiti havhili ivwa nsavho, inga tuvhe nu vhuliilani nu Mulungu mu lujendo lwakwe. Kwe kuuti tukupokwa mu vhunanjisu vhwe vhukufumiilana ni mpapilo izya mu nsi.

⁵ Kuli izyo, mukanyilaje nkaani mu lwitiho lwinyu kuvhomba inyinza. Mutavhombaje vhwe vhwinza vhweka vhweleele, mulondolaje nkaani nu vhumanyi uvhwa lukasamo ulwa Mulungu.

⁶ Havhili mu vhumanyi vhwinyu muyikonzyaje, kwope kuyikonzya, kuvhalilanaje nu vhujimbiilizu. Vhwope uvhujimbiilizu uvhwo, vhuvhalilanaje nu kuvha nu lujendo ulwinza pilongolela ilya Mulungu.

⁷ Kuvha nu lujendo ulwinza pilongolela ilya Mulungu, kuvhalilanaje ni shikunzi ku vhamwinyu inza avhanine vwe vhakukundana. Ishikunzi isho, mutavhakundaje vhe vhamwinyu vhweleele, nkandi na vhantu vhonti.

⁸ Inga vwonti ivwo vwonjela kukula mu mooyo giinyu, vikuvhaavwa kumumanya uMwene wiitu uYeesu Chilisiti nu kuvhomba inyinza mu vhulanzi vhwinyu.

⁹ Ileelo umuntu we atali ni vintu ivwo wu ntonko. Atakulola, havhili aluviilwe kuuti uMulungu amuzelufwizye uvhutalamalandu vhwakwe uvhwa hali.

¹⁰ Pe ishi vhamwitu, muyikungulaje nkaani nu kuhomeshezya kuuti uMulungu ávhiisite nu kuvhasaavhula, mwe pe inga mukuvhomba vhwevhulo te muhaagwe naalumo.

¹¹ Kuli izyo, uMulungu alivhaposheela ahinza, inga mwinjile mu vhumwene uvhwa shiima uvhwa Mwene wiitu, uMuposhi uYeesu Chilisiti.

¹² Pe ishi, kwe njendeelele kuvhakumbusya zyonti izyo shiima, poosye she mumanyile nu kusimpa mu vhwanalyoli vhwe mwáposheleeye.

¹³ Nkulola kuuti zya vhugolosu kuvhakumbusya zyonti izyo, lwe nshiili nkulandila mu nsi umu.

¹⁴ Nkuyanga vhwevhulo, mwe pe uvhulanzi vhwane vhupalamiiye kusila, inza vwe uMwene wiitu uYeesu Chilisiti andolesiizye.

¹⁵ Kuli izyo, kwe nkanyile kuvhavhuuzya zyonti izyo, kuuti inga lwe uvhulanzi vhwane vhwasila muhazikumbuhaje ahavhaliilizyo honti.

Avhahoome avha vhushindamu uvhwa Chilisiti

¹⁶ Ahavhaliilizyo he tuhavhasambilizyaga izya maha aga Mwene wiitu uYeesu Chilisiti ni zya kwinza kwakwe, tutahasuvhilaga ivwili ivwa ilenga vwe avhantu vhásimvile ku njeele zyavho, nkandi iswe sweneeswe twávhwenyi uvhushindamu vhwakwe.

¹⁷ Nkuyanga vhwevhulo, mwe pe iswe twáli pooka nu Chilisiti pi igamba ilya Mulungu lwe uMulungu uTaata wiitu akuumupa umushinzi nu vhushindamu. Pe tuhiivwa izwi likuti, “Uno Mwana waane unkundwa, we nkuhondezelwa nawo.”

¹⁸ Iswe sweneeswe twívuuye izwi ilyo lye lyívwisile kufuma ku mwanya, ahavhaliilizyo he twáli nawo kwi igamba liila ifinjile.

¹⁹ Havhili amazwi aga vhakuvhwi gakuhomeshezya inongwa izyo, niimwe mukuvhomba ahinza inga mukugalema. Amazwi igo gali inza inyaale ye yikuhozya mu shiisi, kufishila lwe kwasha. Kwe kuuti uChilisiti akuvhahozya mu mooyo giinyu inza uluzota ulwa nzanshi.

²⁰ Ileelo ipiti kuli izyo, mukumbushe kuuti vhutaliipo uvhukuvhwi mu Vhusimbe uVhufinjile vhwe avhakuvhwi vhávhulondovhooye kufumiilana ni nsiivho zyavho vhuuvho.

²¹ Nkuyanga vhwevhulo, mwe pe uvhukuvhwi vhutínzile kufumiilana nu lukasamo ulwa muntu. Lwe avhantu vhahakuvhwaga, vhahalongolwaga nu Mupepo uMufinjile.