1 Yohani 5 - ULufingwi uLupwa

Ulwitiho ulwa kuzipoota imbiivhi

¹ Umuntu wonti we akwitiha kuuti uYeesu wu Chilisiti, uyo we mwana wa Mulungu. Havhili umuntu wonti we akumukunda uyise, akumukunda nu mwana waakwe.

² Vwe zili niiswe, tumanyile kuuti tuvhakunzite avhaana avha Mulungu, kwi idala ilya kumukunda uMulungu, nu kuzishindiha indajizyo zyakwe.

³ Kumukunda uMulungu, kwe kushindiha indajizyo zyakwe, zyope te ngomu kuzishindiha.

⁴ Nkuti te ngomu, mwe pe wonti we mwana wa Mulungu, akuzipoota imbiivhi izya mu nsi. Ishintu she shikutwavwa kuzipoota imbiivhi izya mu nsi, lwitiho lwitu kwa Yeesu Chilisiti.

⁵ Vhuli! Wu naanu we angazipoota imbiivhi izya mu nsi? We wula we akwitiha kuuti uYeesu Mwana wa Mulungu.

Uvhwahoome kuzya Yeesu Chilisiti

⁶ UYeesu Chilisiti álolesile kuuti Mwana wa Mulungu kwi idala ilya lwozyo ulwa minzi ni lya mavhanda aga kufwa kwakwe. Atálolesile ku minzi vhweleele, nkandi ku minzi na ku mavhanda.

⁷ Woope uMupepo uMufinjile akuhomeshezya kuuti izyo zya nalyoli, mwe pe uMupepo uMufinjile wa nalyoli.

⁸ Kuli vhatatu vhe vhakuhomeshezya inongwa izya Yeesu ku mwanya: uTaata nu Izwi nu Mupepo uMufinjile. Vhatatu ivho vhali ishintu shooka.

⁹ Havhili kuli avhahoome vhatatu mu nsi: uMupepo na minzi na mavhanda. Avhahoome vhatatu ivho, vhakutuhomeshezya iswe uvhwanalyoli vhwevhuula. Inga tukuvhwitiha uvhwahoome uvhwa vhantu, tukwanzilwa kuvhwitiha uvhwahoome uvhwa Mulungu vhwe vhupiti nkaani. Nkuti vhupiti, mwe pe wu Mulungu wuuyo avhufumwizye, havhili avhufumwizye kuzya Mwana waakwe.

¹⁰ Umuntu we akumwitiha uMwana wa Mulungu, ayitisile kuuti uvhwahoome uvhwo vhwa nalyoli. Ileelo we atakumwitiha uMulungu, akumuvhiiha uMulungu kuuti ali ni ilenga, mwe pe atavhwitisile uvhwahoome vhwe uMulungu avhufumwizye kuzya Mwana waakwe.

¹¹ Uvhwahoome uvhwo vhwe vhuno: UMulungu atupiiye uvhulanzi uvhwa shiima shiima, uvhulanzi uvhwo tukuvhwaga kwa Mwana waakwe.

¹² Umuntu we ali nu vhuliilani nu Mwana wa Mulungu, ali nu vhulanzi uvhwo. Ileelo we atali nu vhuliilani nu Mwana wa Mulungu, atali nu vhulanzi uvhwo.

Amazwi aga kumaliilizya

¹³ Nkuvhasimbila amazwi iga, imwe mwe mukulyitiha izina ilya Mwana wa Mulungu, inga mumanye kuuti muli nu vhulanzi uvhwa shiima shiima.

¹⁴ Uvhwahoome uvhwa vhudandamazu vhwitu pilongolela ilya Mulungu vhwe vhuno: Tumanyile kuuti akutwivwa, inga twamulaavha ishintu shonti ku lukasamo lwakwe.

¹⁵ Havhili, mwe pe tumanyile kuuti akutwivwa inga twamulaavha ishintu shonti, tumanyile kuuti akuutupa vwonti vwe tukumulaavha.

¹⁶ Kuli uvhutalamalandu vhwe vhutakumuvhiiha umuntu ukutali nu Mulungu shiima shiima. Inga wumo muli imwe akumulola uwamwavho akuvhomba uvhutalamalandu inza uvhwo, amulavhilaje kwa Mulungu, woope uMulungu aliimupa uvhulanzi. Yikuvha vhwevhulo, ku vhaala vhe vhakuvhomba uvhutalamalandu inza uvhwo. Ileelo kuli uvhutalamalandu vhwe vhukumuvhiiha umuntu ukutali nu Mulungu shiima shiima. Ine ntakuti amulavhilaje kwa Mulungu ku vhutalamalandu inza uvhwo.

¹⁷ Kuvhomba lyonti lye te ligolosu pilongolela ilya Mulungu, kwe kuvhomba uvhutalamalandu. Ileelo pooka niizyo, vhuliipo uvhutalamalandu vhwe vhutakumuvhiiha umuntu ukutali nu Mulungu shiima shiima.

¹⁸ Tumanyile kuuti umuntu wonti we mwana wa Mulungu, atakuvheelela kuvhomba uvhutalamalandu, mwe pe uMwana wa Mulungu akumuguulila. UMuvhiivhi ula uSeetano atangamuvhomba naashimo.

¹⁹ Tumanyile kuuti, iswe swe vhaana vha Mulungu, nu kuuti, avhantu avhanji vhonti, vhe vhatakumushindiha uMulungu, uMuvhiivhi ula akuvhakonzya.

²⁰ Havhili tumanyile kuuti uMwana wa Mulungu ayinzile, atupiiye uvhumanyi, inga tumumanye uMulungu uwa nalyoli. Tuli nu vhuliilani nu Mulungu uwa nalyoli, kwi idala ilya kuvha nu vhuliilani nu Mwana waakwe uYeesu Chilisiti. Uno we wu Mulungu uwa nalyoli, havhili we vhulanzi uvhwa shiima shiima.

²¹ Mwe vhaana vhaane, muvhe minso, mutapuutaje avhalungu.