1 Yohani 4 - ULufingwi uLupwa

Kumanya insambiilizyo izya ilenga ni zya nalyoli

¹ Mwe vhankundwa, mutavhitihaje avhantu vhonti vhe vhakuti vhali nu Mupepo uwa Mulungu, mwe pe avhakuvhwi avha ilenga avhinji vhafumiiye mu nsi. Mwenyelezyaje ahinza, kumanya inga umuntu akulongolwa nu Mupepo uwa Mulungu pamo haa.

² Idala ilya kumanya kuuti umuntu akulongolwa nu Mupepo uwa Mulungu lye lino: Wonti we akupemula kuuti uYeesu Chilisiti áyinzile mu nsi, ahavha nu muvhili inza avhantu avhanji, uyo we akulongolwa nu Mupepo uwa Mulungu.

³ Ileelo umuntu wonti we atakupemula inza isho, atakulongolwa nu Mupepo uwa Mulungu. Umuntu uyo akulongolwa ni mpepo iya mulugu uwa Chilisiti. Niimwe, mwivuuye kuuti impepo iyo yikwinza, ishi yinzile mu nsi.

⁴ Ileelo imwe vhaana vhaane, mwe vhantu vha Mulungu, muvhapoosite avhakuvhwi ivho avha ilenga, mwe pe uMupepo uwa Mulungu ali muhati yiinyu. Uweene ali na maha kuluusya impepo ye yikuvhalongola avhantu avha mu nsi umu.

⁵ Avhakuvhwi ivho avha ilenga vhe vha mu nsi, vhakuyanga izya mu nsi. Vhoope avhantu avha mu nsi vhe vhatakumushindiha uMulungu, vhakuvhatejeelezya.

⁶ Ileelo iswe swe vhantu vha Mulungu. Umuntu we amumanyile uMulungu, akututejeelezya, ileelo umuntu we te wa Mulungu, atakututejeelezya. Vhwevhulo, vwe tukumanya uvhusugaano uvhwa vhantu vhe vhakulongolwa nu Mupepo uwa nalyoli, na vhaala vhe vhakulongolwa ni mpepo iya ilenga.

Ishikunzi isha Mulungu

⁷ Mwe vhankundwa, tukundanaje, mwe pe ishikunzi shikufuma kwa Mulungu. Umuntu wonti we akuvhakunda avhamwavho, mwana wa Mulungu, havhili amumanyile uMulungu.

⁸ Ileelo umuntu we atakuvhakunda avhamwavho, atamumanyile uMulungu, mwe pe uMulungu shikunzi.

⁹ UMulungu wuuyo átulolesiizye ishikunzi shaakwe kwi idala ilya kumusonteelezya uMwana waakwe imozi, mu nsi umu, inga tuvhwaje uvhulanzi kutuushila ku kwakwe.

¹⁰ Ishi she shikunzi, kuuti te sweswe twámukunzite uMulungu, nkandi uweene we átukunzite iswe. Ahamusonteelezya uMwana waakwe, avhe mpuutile iya kuvhoolwa, inga ayeefwe uvhutalamalandu vhwitu, nu kutukundanya nu Mulungu.

¹¹ Mwe vhankundwa, mwe pe uMulungu atukunzite iswe inza ishi, yikwanzilwa kuuti niiswe tukundanaje.

¹² Ataliipo umuntu wonti we amuvhwenyi uMulungu lumo. Ileelo inga tukukundana, uMulungu akulandila ku vhuliilani niiswe, havhili ishikunzi shaakwe shikulunjiha muli iswe.

¹³ Tumanyile kuuti tukulandila ku vhuliilani nu Mulungu, woope uMulungu akulandila ku vhuliilani niiswe. Tumanyile vhwevhulo, mwe pe atupiiye uMupepo waakwe.

¹⁴ Iswe tuvhwenyi nu kuvhahomeshezya avhanji kuuti uTaata uMulungu ámusonteleziizye uMwana waakwe mu nsi, kuuti avhe Muposhi wa vhantu.

¹⁵ Umuntu wonti we akupemula kuuti uYeesu Mwana wa Mulungu, uMulungu akulandila ku vhuliilani nawo, woope akulandila ku vhuliilani nu Mulungu.

¹⁶ Ishi, iswe tumanyile nu kwitiha kuuti uMulungu atukunzite. UMulungu shikunzi. Wonti we akulandila ku shikunzi, we akulandila ku vhuliilani nu Mulungu, woope uMulungu akulandila ku vhuliilani nu weene.

¹⁷ Kwi idala ilyo, uMulungu alunjisiizye ishikunzi shaakwe muhati yiitu, inga tuvhe nu vhudandamazu pi isiku ilya kulongwa. Tuliivha nu vhudandamazu, mwe pe uvhulanzi vhwitu mu nsi umu, vhuholiine na vwe uYeesu ahalandilaga.

¹⁸ Pe pali ishikunzi patali ilyoga, mwe pe ishikunzi isha nalyoli shikwefwa ilyoga lyonti. Uvhulonzi vhwe vhukuvhavhiiha avhantu kuuti vhavhanje ni lyoga. Umuntu wonti we ali ni lyoga, ishikunzi isha Mulungu shitalunjisile muhati yaakwe.

¹⁹ Iswe tuli ni shikunzi, mwe pe uweene we átalisile kutukunda.

²⁰ Inga umuntu akuyanga kuuti amukunzite uMulungu, uku akumuviitilwa uwamwavho, ali ni ilenga. Tukumanya kuuti ali ni ilenga, mwe pe umuntu we atakumukunda uwamwavho we akumulola, atangamukunda uMulungu we atakumulola.

²¹ UMulungu atupiiye ululajizyo kuuti, wonti we akumukunda uMulungu, akwanzilwa kuuti amukunde nu wamwavho.