1 Yohani 3 - ULufingwi uLupwa

Kulandila inza avhaana avha Mulungu

¹ Yeenyi vwe uTaata uMulungu atukunzite nkaani. Akutwita kuuti swe vhaana vhaakwe! Mwe muumwo, nalyoli vwe tuli. Ileelo avhantu vhe vhatakumushindiha uMulungu, vhatatumanyile, mwe pe vhatamumanyile uweene.

² Mwe vhankundwa, ishi iswe swe vhaana vha Mulungu, ileelo yitamanyisile apazelu vwe tuliivha. Tumanyile kuuti ahavhaliilizyo he uChilisiti aligaluha havhili, tuliholana nawo, mwe pe tulimulola vwe ali.

³ Wonti we akusuuvhila kuuti aliholana nu Chilisiti, akuyizelufwa inga avhe muzelu, inza vwe uweene uChilisiti muzelu.

⁴ Wonti we akuvhomba uvhutalamalandu, akuvhomba uvhusambusu kwa Mulungu, mwe pe kuvhomba uvhutalamalandu, kwe kuvhomba uvhusambusu.

⁵ Mumanyile kuuti uChilisiti áyinzile kwefwa uvhutalamalandu vhwitu. Havhili uweene atakuvhomba uvhutalamalandu naavhumo.

⁶ Pe ishi, wonti we akujendeelela kuvha nu vhuliilani nu Chilisiti, atakuvheelela kuvhomba uvhutalamalandu. We akuvheelela kuvhomba uvhutalamalandu, atamanyinsiinye kuuti uChilisiti wu naanu, havhili atamumanyile uweene.

⁷ Ishi vhaana vhaane, mutahiitishe kuuti umuntu wonti avhateezye. Umuntu we akuvhomba ingolosu, we mugolosu, inza uChilisiti vwe mugolosu.

⁸ Ileelo umuntu we avheleleeye kuvhomba uvhutalamalandu, we mwana wa Mukwalanzi. Nkuyanga vhwevhulo, mwe pe uMukwalanzi avheleleeye kuvhomba uvhutalamalandu kufuma ku vhwandilo uvhwa vintu vwonti. Ye nongwa uMwana wa Mulungu ahinza mu nsi, kuzinanganya imbombo izya Mukwalanzi.

⁹ Umuntu wonti we mwana wa Mulungu, atakuvheelela kuvhomba uvhutalamalandu, mwe pe ishiholanyo isha Mulungu shili muhati yaakwe. Atangavheelela kuvhomba uvhutalamalandu, mwe pe uweene mwana wa Mulungu.

¹⁰ Pe ishi, umuntu we atakuvhomba ingolosu, poosye we atakumukunda uwamwavho, uyo te mwana wa Mulungu. Isho vwe tukumanya uvhusugaano uvhwa vhaana vha Mulungu, na vhaana vha Mukwalanzi.

Kukundana

¹¹ Navhavhuuzya vhwevhulo, mwe pe inongwa zye mwázyivuuye kufuma ku vhwandilo uvhwa lwitiho lwinyu, zya kuuti tukwanzilwa kukundana.

¹² Tutahaavhe inza umuntu ula we vhahatinji uKaayini, we áamile wa Muvhiivhi ula uSeetano, ahamugoga umunine waakwe. Shooni she ámugozile? Ámugozile, mwe pe imbombo zyakwe zyáli mbiivhi, ileelo izya muzuuna waakwe zyáli ngolosu.

¹³ Pe ishi, mwe vhamwitu, mutasukumilaje inga avhantu vhe vhatakumushindiha uMulungu vhakuvhaviitilwa imwe.

¹⁴ Iswe tumanyile kuuti tufumile mu maha aga vhufwe, nu kwinjila mu vhulanzi uvhwa shiima shiima. Tumanyile vhwevhulo, mwe pe tukuvhakunda avhamwitu. Umuntu we atakuvhakunda avhamwavho ali she asyaye mu vhufwe.

¹⁵ Wonti we akumuviitilwa uwamwavho, mugozi. Niimwe mumanyile kuuti ataliipo umugozi we ali nu vhulanzi uvhwa shiima shiima muhati yaakwe.

¹⁶ Iswe tushimanyile ishikunzi, mwe pe uChilisiti ávhufumwizye uvhulanzi vhwakwe ku zyitu. Niiswe vhweleele, inga haafiha ahavhaliilizyo aha kuvhaavwa avhamwitu, tukwanzilwa kuyikungula kuvhaavwa, poosye nu kuvhufumwa uvhulanzi vhwitu ku zyavho.

¹⁷ Umuntu wonti we ali ni vintu, havhili akumulola uwamwavho we asovheliilwe, ileelo atakuvha nu mwoyo uwa vhwila, angayanga vhuli kuuti ali ni shikunzi isha Mulungu?

¹⁸ Mwe vhaana vhaane, tutayangaje pe pi ilomu vhweleele, kuuti tuvhakunzite avhamwitu, nkandi nalyoli tuvhakundaje kwi idala ilya kuvhavhombela inyinza.

¹⁹ Inga tukuvhakunda avhamwitu vhwevhulo, pe nalyoli tukumanya kuuti, tukuvhulandata uvhwanalyoli, havhili amooyo giitu gakutehama pilongolela ilya Mulungu.

²⁰ Poosye inga tukulongwa mu mooyo giitu, tukuvha nu vhutehamu, mwe pe tumanyile kuuti uMulungu amanyile nkaani kuluusya vwe iswe tumanyile mu mooyo giitu, havhili uweene azimanyile zyonti.

²¹ Mwe vhankundwa, inga tutakulongwa mu mooyo giitu, pe tukuvha nu vhudandamazu uvhwa kusejeelela pilongolela ilya Mulungu.

²² Havhili tukuposheela kufuma ku kwakwe shonti she tukumulaavha, mwe pe tukuzishindiha indajizyo zyakwe nu kuvhomba zye zikumuhondezya.

²³ Ululajizyo lwakwe lwe luno, kuuti tulyitishe izina ilya Mwana waakwe uYeesu Chilisiti, nu kukundana, inza vwe átulajiziizye.

²⁴ Umuntu we akuzishindiha indajizyo izya Mulungu, akulandila ku vhuliilani nu weene, woope uMulungu akulandila ku vhuliilani nawo. Tumanyile kuuti uMulungu akulandila ku vhuliilani niiswe kwi idala ilya Mupepo uMufinjile we atupiiye.