1 Yohani 2 - ULufingwi uLupwa

UChilisiti we akutulaavhila

¹ Mwe vhaana vhaane, nkuvhasimbila inongwa izi, inga mutavhombaje uvhutalamalandu. Ileelo poosye inga umuntu wonti muli imwe avhomba uvhutalamalandu, tuli nawo we akutulaavhila kwa Taata uMulungu, uyo wu Yeesu Chilisiti. Uweene mugolosu.

² UYeesu we mpuutile iya kuvhoolwa, kwi idala ilyo, áyefwizye uvhutalamalandu vhwitu nu kutukundanya nu Mulungu. Havhili te kuuti áyefwizye vhwe vhutalamalandu vhwitu vhweka vhweleele, nkandi nu vhwa vhantu vhonti.

³ Inga tukuzishindiha indajizyo izya Mulungu, pe tukuvha nu vhwanalyoli kuuti tumumanyile.

⁴ Umuntu we akuti amumanyile uMulungu, ileelo atakuzishindiha indajizyo zyakwe, ali ni ilenga, havhili atali nu vhwanalyoli mu mwoyo waakwe.

⁵ Ileelo umuntu wonti we akulishindiha izwi ilya Mulungu, uyo nalyoli akumukunda uMulungu. Idala ilya kumanya kuuti tuli nu vhuliilani nu Mulungu, lye lino:

⁶ Umuntu we akuti ali nu vhuliilani nu Mulungu, akwanzilwa kuuti alandilaje inza vwe uYeesu ahalandilaga.

Ululajizyo ulwa Yeesu ulwa kukundana

⁷ Mwe vhankundwa, ululajizyo ulu lwe nkuvhasimbila te lujeni, lulajizyo lweluula ulwa hali lwe mwámile nalwo kufuma pe mwámwitisile uYeesu. Ululajizyo ulwa hali ulwo, lizwi liila ilya kukundana lye mwályivuuye.

⁸ Ku luvhazu ulwamwavho, ululajizyo ulu lwe nkuvhasimbila, lujeni. Uvhwanalyoli vhwakwe vhukuloleha mu vhulanzi uvhwa Yeesu, na mu vhulanzi vhwinyu vhweleele, mwe pe ukulola ishiisi shikuteezya amaha, nu vhuzelu uvhwa nalyoli vhukutaliha kulama.

⁹ Umuntu we akuyanga kuuti akulandila mu vhuzelu, ileelo akumuviitilwa uwamwavho, uyo akujendeelela kulandila mu shiisi poosye ishi.

¹⁰ Umuntu we akumukunda uwamwavho, akulandila mu vhuzelu. Havhili muhati yaakwe shitaliipo naashimo isha kumwazya kuvhomba uvhutalamalandu.

¹¹ Ileelo umuntu we akumuviitilwa uwamwavho, ali mu shiisi. Akujenda mu shiisi, ishisita kumanya kwe akusogola, mwe pe ishiisi shimugubishiiye ku minso.

¹² Nkuvhasimbila imwe mwe vhaana, mwe pe muswililiilwe uvhutalamalandu vhwinyu kutuushila kwa Yeesu Chilisiti.

¹³ Nkuvhasimbila imwe vhataata, mwe pe mumumanyile uYeesu Chilisiti, we áliipo kufuma ku vhwandilo uvhwa vintu vwonti. Nkuvhasimbila imwe vhajaaha, mwe pe mumupoosite uMuvhiivhi ula, uSeetano. Nkuvhasimbila imwe mwe vhaana, mwe pe mumumanyile uTaata uMulungu.

¹⁴ Nkuvhasimbila imwe vhataata, mwe pe mumumanyile uYeesu Chilisiti, we áliipo kufuma ku vhwandilo uvhwa vintu vwonti. Nkuvhasimbila imwe vhajaaha, mwe pe muli na maha, mulilemile izwi ilya Mulungu, havhili mumupoosite uMuvhiivhi ula, uSeetano.

¹⁵ Pe ishi, nkuvhavhuuzya kuuti, mutasungwaje kuvhomba inza avhantu avha mu nsi, poosye kuvisungwa vwonti vwe avheene vhakuvisungwa. Inga umuntu akuzisungwa izya mu nsi, atangamukunda uTaata uMulungu.

¹⁶ Nkuyanga vhwevhulo, mwe pe imbiivhi izya mu nsi umu zye zino: impapilo izya vhuntu uvhwa vhutalamalandu nu mwoyo uwa muntu kunyonywa kuvha navwo vwonti vwe avilola na mabaado ge gakufumiilana ni vwuma. Ivwo vwonti vitakufuma kwa Taata uMulungu, nkandi vikufuma mu nsi munuumu.

¹⁷ Insi pooka ni mpapilo zyakwe imbiivhi, vikutuuha. Ileelo umuntu we akuvhomba zye zikumuhondezya uMulungu, akuvha nu vhulanzi shiima shiima.

Kuvha minso na vhalugu avha Chilisiti

¹⁸ Mwe vhaana vhaane, ahavhaliilizyo aha kumpeleela hafisile! Mwivuuye kuuti umulugu uwa Chilisiti akwinza, niishi avhalugu avhinji avha Chilisiti vhinzile. Ilyo lye likutuvhiiha kumanya kuuti, tuli mu havhaliilizyo aha kumpeleela.

¹⁹ Avhalugu ivho vhafumile kuli iswe, ileelo vhataamile nu vhuliilani uvhwa nalyoli niiswe. Mwe pe inga vhavhanje nu vhuliilani uvhwa nalyoli niiswe, nkandi vhasyaye kuli iswe. Ishi vheefile, inga yiloleshe apazelu kuuti vhataamile nu vhuliilani uvhwa nalyoli niiswe.

²⁰ Ileelo imwe uMulungu avhapiiye uMupepo uMufinjile, ye nongwa mwenti muvhumanyile uvhwanalyoli.

²¹ Nkuvhasimbila ukalaata uno, te kuuti, mwe pe mutavhumanyile uvhwanalyoli, nkandi, mwe pe muvhumanyile, havhili, mwe pe mumanyile kuuti ilenga lyonti litakufuma mu vhwanalyoli.

²² Umuntu uwa ilenga wu naanu? Umuntu uwa ilenga we wula we akuti uYeesu te wu Chilisiti. Umuntu inza uyo, we mulugu wa Chilisiti, akumuhaana uTaata uMulungu nu Mwana.

²³ Wonti we akumuhaana uMwana, akumuhaana nu Taata uMulungu. Ileelo wonti we akumwitiha uMwana pilongolela lya vhantu, ali nu vhuliilani nu Taata uMulungu vhweleele.

²⁴ Ishi, amazwi gaala ge mwágivuuye kufuma ku vhwandilo uvhwa lwitiho lwinyu, mujendeelele kugalema mu mooyo giinyu. Inga mukujendeelela kuvhomba isho, pe niimwe kwe mujendeelele kuvha nu vhuliilani nu Mwana nu Taata uMulungu.

²⁵ Mwe pe tuli nu vhuliilani uvhwo, tuli nu lufingwi ulwa vhulanzi uvhwa shiima shiima, vhwe uChilisiti áfinzile kuuti, aliitupa.

²⁶ Nkuvhasimbila izi, kuvhasoha kuzya vhantu vhaala vhe vhakwanza kuvhapuvwa.

²⁷ Yeenya, imwe, uChilisiti avhapiiye uMupepo uMufinjile, we akutendama muhati yiinyu. Uyo we akuvhasambiilizya zyonti, havhili insambiilizyo zyakwe zya nalyoli, te zya ilenga. Pe ishi, yitakwanzilwa kuuti umuntu uwunji avhasambiilizye. Inza vwe uMupepo avhasambiliziizye, ishi mujendeelele kuvha nu vhuliilani nu Chilisiti.

²⁸ Pe ishi, vhaana vhaane, mujendeelele kuvha nu vhuliilani nu Chilisiti, inga ahavhaliilizyo he aligaluha havhili, tuhaavhe nu vhudandamazu, tutahaalole insoni pi isiku ilya kwinza kwakwe.

²⁹ Mwe pe mumanyile kuuti uChilisiti mugolosu, pe mumanye kuuti wonti we akuvhomba ingolosu, we mwana wa Mulungu.