1 Yohani 1 - ULufingwi uLupwa

Izwi ilya Vhulanzi

¹ Tukuvhakumusizya inongwa izya ula we wu Izwi ilya Vhulanzi, we áliipo kufuma ku vhwandilo. Iswe twámwivuuye nu kumulola na minso giitu sweneeswe, tuhamwenyaaga nu kumupalamansya ni nyoovhe zyitu.

² Uwa vhulanzi uyo álolesile, niiswe tuhamulola. Ishi tukuvhahomeshezya nu kuvhakumusizya inongwa izya uyo we akuutupa uvhulanzi uvhwa shiima shiima, we áamile kwa Taata uMulungu, havhili ahaloleha kuli iswe.

³ Tukuvhakumusizya inongwa izya Yeesu uyo, we twámuvhwenyi nu kumwivwa, inga muvhe nu vhuliilani pooka niiswe. Mu vhuliilani uvhwo tuli pooka nu Taata uMulungu, nu Mwana waakwe uYeesu Chilisiti.

⁴ Tukuvhasimbila izi, inga uluseshelo lwitu luvhe lupiti.

Kulandila mu vhuzelu

⁵ Intumi ye twáyivuuye kwa Yeesu, ye tukuvhakumusizya imwe, kuuti uMulungu mwinza inza uvhuzelu, atali ni shiisi naashimo muhati yaakwe.

⁶ Ishi, inga tukuyanga kuuti tuli nu vhuliilani nu Mulungu, ileelo uku tukujendeelela kulandila mu shiisi, tukuluma ilenga, havhili tutakuvhomba izya nalyoli.

⁷ Ileelo inga tukulandila mu vhuzelu, inza vwe uMulungu ali mu vhuzelu, pe tukuvha nu vhuliilani sweneeswe. Havhili amavhanda aga Mwana waakwe uYeesu gakutuzelufwa uvhutalamalandu vhwitu vhwonti.

⁸ Inga tukuti tutali nu vhutalamalandu, tukuyihopenkanya sweneeswe, havhili tutali nu vhwanalyoli mu mooyo giitu.

⁹ Ileelo inga tukupemula kuuti tuvhomvile uvhutalamalandu, uMulungu akutuswila nu kutuzelufwa uvhuvhiivhi vhwonti, mwe pe uweene mutungamu havhili mugolosu.

¹⁰ Inga tukuti tutavhomvile uvhutalamalandu, tukumuvhiiha uMulungu kuuti ali ni ilenga, havhili tukuvha tulihaanile izwi lyakwe.