1 VaTesaloniki 5 - ULufingwi uLupwa

Kuyisengaanya kwi isiku ilya kwinza uMwene uYeesu

¹ Mwe vhamwitu, tukulola kuuti tutahavhasimbile kuzya manda na havhaliilizyo aha kwinza uMwene uYeesu.

² Twavhomba vhwevhulo, mwe pe imwe mweneemwe mumanyile kuuti isiku ilya kwinza uMwene, liliivha lya kwitushizya inza umwivha vwe akwinza uvhusiku.

³ Avhantu lwe vhakuti, “Tuli nu vhutehamu, havhili tutehiime,” ipo pe uvhunanjisu vhulivhinzila. Uvhunanjisu uvhwo vhulivhitushizya, inza uvhuvhaavi uvhwa kupaapa vwe vhukumwinzila umwantanda we ali pa vhumwamu. Kuli izyo, te vhahaapokwe inga hansi.

⁴ Ileelo imwe vhamwitu, isiku ilyo te lihavhitushizye inza umwivha, mwe pe mutali mu shiisi inza avhantu vhe vhakumusuufwa uMulungu.

⁵ Imwe mwenti mwe vhaana avha vhuzelu, havhili mwe vha musanya. Iswe te twe vhaana avha vhusiku poosye avha ku shiisi.

⁶ Ishi tuleshe kuvha inza avhanji vhe vhakukaata utulo, nkandi tuvhe minso, havhili tuyikonzyaje.

⁷ Mwe pe vhe vhakukaata utulo, vhakukaata vhusiku. Havhili vhe vhakuholwa, vhakuholwa uvhusiku.

⁸ Ileelo iswe, mwe pe tuli mu vhuzelu uvhwa musanya, tuyikonzyaje. Tuvhanje nu lwitiho ni shikunzi, ivwo vikuvha ngati mpinjiho ku shifuvha. Havhili tumusuvhilaje uMulungu kutupoha, pe tukuvha ngati tuzwaye inkwela kwi itwe.

⁹ Mwe pe uMulungu atátusavhuuye iswe inga atulovwe ku vhuhalazu vhwakwe, nkandi átusavhuuye inga tuvhwaje uvhuposhi kwi idala ilya Mwene wiitu uYeesu Chilisiti.

¹⁰ Uyo we ahafwa ku zyitu, inga tuvhanje pooka nawo, lwe twe vhapuuma, poosye lwe tufuuye.

¹¹ Ishi, suvhalizanyaaji nu kugomanya amooyo inza vwe mukuvhomba.

Ulujendo lwe lukwanzilwa ku vhe vhamwitisile uChilisiti

¹² Ishi vhamwitu, tukuvhalaavha muvhashindihaje vhe vhakuvhaavwa imwe, nu kuvhalongozya ku maha aga Mwene uYeesu, nu kuvhasambiilizya ulujendo ulwa Shichilisiti.

¹³ Muvhashindihaje nkaani nu kuvhakunda kulandatana ni mbombo yaavho. Havhili mutendamaje ku vhutehamu.

¹⁴ Vhamwitu, tukuvhalambiilizya kuuti muvhasohaje avhahata nu kuvhagomwa vhe vhavunzisile amooyo. Havhili muvhagomwaje vhe vhatali na maha nu kuvhajimbiilila avhantu vhonti.

¹⁵ Yeenyi, umuntu wonti atamulanduzyaje uwamwavho ku mbiivhi. Amanda gonti muvhombelanaje inyinza mweneemwe nu kuvhavhombela avhantu vhonti.

¹⁶ Muvhanje nu luseshelo amanda gonti,

¹⁷ havhili mulaavhaje amanda gonti.

¹⁸ Mumusalifwaje uMulungu mu zyonti, mwe pe izyo zye uweene akwanza muzivhombaje inza vwe uChilisiti uYeesu atulolesiizye.

¹⁹ Mutamudindaje uMupepo uMufinjile.

²⁰ Havhili mutavhusufwaje uvhukuvhwi,

²¹ ileelo muvhulingaje vhwonti nu kuvhulandata vhwe vhwinza.

²² Muyefwaje mu mbiivhi zyonti.

²³ UMulungu wuuyo we akuutupa uvhutehamu, avhazelufwe imwe ku zyonti. Kwe kuuti ayenyelezyaje amooyo giinyu nu vhulanzi vhwinyu na mavhili giinyu, inga muvhe ishisita kukwinkwinwa kufishila lwe akwinza uMwene wiitu uYeesu Chilisiti.

²⁴ UMulungu uweene we akuvhiita, alivhavhombela izyo, mwe pe wa nalyoli.

Amazwi aga kulagana

²⁵ Vhamwitu, niiswe mutulavhilaje kwa Mulungu.

²⁶ Muvhalamushe avhamwitu vhonti ku lwofwanyo ulwa shikunzi.

²⁷ Nkuvhalajizya ku maha aga Mwene uYeesu kuuti, ukalaata uno muvhavhaziizye avhamwitu vhonti.

²⁸ UMwene wiitu uYeesu Chilisiti avhafwilaje uvhwila.