1 VaTesaloniki 4 - ULufingwi uLupwa

Ulujendo lwe uMulungu akulusungwa

¹ Ishi vhamwitu, musambiliiye kufuma kuli iswe vwe yikwanzilwa kulandila, inga kumuhondezya uMulungu. Mwe muumwo vwe mukuvhomba vhwevhulo. Ishi, tukuvhalambiilizya ku maha aga Mwene uYeesu kuuti muvhombaje vhwevhulo nu kuluusya.

² Mwe pe mumanyile ahinza indajizyo zye twávhalajiziizye ku maha aga izina ilya Mwene uYeesu.

³ UMulungu akwanza muvhe mwe vhafinjile, kwe kuuti mutavhombaje uvhulugusu.

⁴ Imwe mwenti mugakonzyaje amavhili giinyu, mu vhufinjile nu kuyishindiha.

⁵ Mutahiime ni mpapilo imbiivhi inza avhantu avha kunzi vhe vhatamumanyile uMulungu.

⁶ Muli izyo, umuntu wonti atahamunanjile uwamwavho, poosye kumuhopenkanya. Inza vwe twávhavhuziizye nu kuvhasoha kuuti, vhonti vhe vhakuvhomba izyo, uMwene uYeesu aliivhapa isunde.

⁷ UMulungu atahatwita kuvhomba uvhuvhembu, nkandi kuuti tutendamaje mu vhufinjile.

⁸ Pe umuntu wonti we akuhaana insambiilizyo izi, atakumuhaana muntu, akumuhaana wu Mulungu, we akuuvhapa imwe uMupepo waakwe uMufinjile.

⁹ Ishi, yitakwanzilwa kuuti tuvhasimbile imwe inongwa izya kukundana, mwe pe uMulungu wuuyo avhasambiliziizye vwe yikwanzilwa kukundana.

¹⁰ Nalyoli vwe mukuvhavhombela vhwevhulo avhamwinyu vhonti vhe vhamwitisile uChilisiti avha mu shigavho isha nsi isha Makedooniya. Ishi tukuvhalambiilizya kuuti mukundanaje vhwevhulo nu kuluusya.

¹¹ Muvhanje nu mwoyo uwa vhutehamu. Umuntu wonti atayisanganyaaje mu zya vhanji, avhombaje imbombo zyakwe wuuyo, inza vwe twávhalajiziizye.

¹² Ipo mukuvha mwalolesya ulujendo ulwinza pilongolela ilya vhe vhatamwitisile uMulungu, havhili mutakuvha mwe vha kusuuvhila ivwa vhanji.

Kwinza kwa Mwene uYeesu

¹³ Mwe vhamwitu, tukwanza mumanye zye zilifumila ku vhe vhámwitisile uMulungu vhe vhafuuye, inga muleshe kuvha nu vhuswimiilizu inza avhantu avhanji vhe vhatali nu lusuuvhilo.

¹⁴ Iswe, tumanyile kuuti uYeesu áfuuye, havhili ahazyuha. Kuli izyo, tukusuuvhila kuuti uMulungu alivhavhiiha pooka nu Yeesu avhantu vhonti vhe vháfuuye mu lwitiho.

¹⁵ Izi zye tukuvhavhuuzya, nsambiilizyo izya Mwene uYeesu, kuuti iswe twe tuliivha twe vhapuuma lwe uweene akugaluha, te tuhavhalesheelele vhe vhafuuye.

¹⁶ Nkuyanga vhwevhulo, mwe pe uMwene wuuyo aliyiiha kufuma ku mwanya. Aliyanga kwi izwi ilya maha, pooka ni izwi ilya havhizya umupiti ni izwi ilya isaji ilya Mulungu. Pe vhaala vhe vháfuuye she vhamwitisile uChilisiti, vhalizyuha suuti.

¹⁷ Pe iswe swe vhapuuma, twe tusyaye, tulisompolwa pooka navho mu mavhingo, inga tumuposheele uMwene uYeesu kumwanya. Pe tulitendama pooka nawo shiima shiima.

¹⁸ Ishi suvhalizanyaaji ku mazwi ganaago.