1 VaTesaloniki 2 - ULufingwi uLupwa

Imbombo iya Paavhuli na vhamwavho ku Tesaloniiki

¹ Mwe vhamwitu, imwe mweneemwe mumanyile kuuti iswe kwinza kuli imwe, yitáali vhweleele.

² Havhili mumanyile kuuti lwe twáshiili kufiha kuli imwe, twáyimvile nu kuligwa mu nkaaya yiila iya Fiilipi. Pooka nu kuuti kuli imwe kwáliipo kudindanjizya nkaani, ileelo uMulungu átupiiye uvhudandamazu uvhwa kulumbiilila Izwi lyakwe iLyinza.

³ Mwe pe ku nongwa zye tukuhomeelezya kuli imwe, tutakusivhiilila kuvhahopenkanya, poosye kuvhahandamania, poosye kuyanga imbiivhi.

⁴ Ileelo tukulumbiilila, mwe pe uMulungu átuvhwenyi kuuti tuhondeeye, ahaatupa imbombo iya kulumbiilila Izwi iLyinza. Tutakusuuvhila kuvhahondezya avhantu, tukwanza kumuhondezya uMulungu, we akwenyeelezya zyonti zye zili muhati mu mooyo giitu.

⁵ Mumanyile kuuti tutahayangaga amazwi, inga mutusungwe, poosye kuyanga amazwi ge te ga nalyoli inga tulyaje ilonka. UMulungu wu hoome!

⁶ Havhili tutahanzaga kuuti avhantu vhatutiime, poosye imwe, havhili poosye avhanji vhonti. Mwe pe iswe twe vhatumwa avha Chilisiti, twáweziizye kwanza ivintu vimo kuli imwe, ileelo tutahavhomba vhwevhulo.

⁷ Twámile twe vhatonsu kuli imwe, inza umwantanda lwe akusunga avhaana vhaakwe.

⁸ Twávhakunzite imwe nkaani. Kuli izyo, twásesheeye te kwe kuvhavhuuzya Izwi iLyinza ilya Mulungu vhweleele, nkandi havhili nu kuyifumwa kuvhomba zyonti zye zihondeeye kuvhaavwa, mwe pe nalyoli mwe vhankundwa vhiitu.

⁹ Vhamwitu, mukukumbuha umute wiitu na mayimba giitu, tuhavhombaga uvhusiku nu musanya. Tuhavhombaga isho, kuuti inga lwe tukukumusya Izwi iLyinza ilya Mulungu tutahinze tumutamwe umuntu wonti kuli imwe.

¹⁰ Imwe mwe vhahoome nu Mulungu woope wu hoome, kuuti ulujendo lwitu kuli imwe mwe mumwitisile uMulungu lwámile lugolosu havhili lwa nalyoli ishisita ulukwinkwino.

¹¹ Havhili mumanyile kuuti lwe twáli kuli imwe, tuhavhavhombelaga mwenti, inza vwe utaata akuvhavhombela avhaana vhaakwe. Tuhavhagomwaga amooyo nu kuvhasuvhaalizya nu kuvhalambiilizya,

¹² kuuti mulandataje zye uMulungu akwanza. UMulungu we akuvhiita kuuti, mwinjile mu vhumwene na mu vhushindamu vhwakwe.

¹³ Havhili tukumusalifwa uMulungu ishisita kulita, mwe pe lwe mwalitejeelezya izwi lyakwe kufuma kuli iswe, mutáliposheleeye ngati lizwi lya muntu, nkandi ngati lizwi kufuma kwa Mulungu, nalyoli vwe zili. Izwi ilyo likuvhomba imbombo muhati mu mooyo giinyu imwe mwe mumwitisile.

¹⁴ Vhamwitu, ziila zye zyávhaazile avhantu mu vivhanza ivwa Mulungu mu shigavho isha nsi isha Yudeeya, vhe vhamwitisile uChilisiti uYeesu, zye niimwe zivhaazile. Avhantu vhiinyu vhavhayimvwizye, inza avheene, vwe aVhayuuda avhamwavho vhávhayimvwizye.

¹⁵ AVhayuuda ivho, vhe vhámugozile uMwene uYeesu na vhakuvhwi avha hali. Havhili vhe vhatuyimvwizye niiswe. Avhantu ivho, vhakumuviisya uMulungu, havhili vhe vhalugu vha vhantu vhonti,

¹⁶ mwe pe vhakutuhaana kuvhalumbiilila avhantu vhe te Vhayuuda Izwi iLyinza. Vhakwanza kuuti avhantu vhatahaapokwe. Shiniisho vwe vhakujendeelela kulunjisya uvhutalamalandu vhwonti vhwe vhakuvhomba amanda gonti. Ileelo ishi uvhuhalazu vhwa Mulungu vhwavhafishila!

UPaavhuli na vhamwavho vhakusamba kuhomaana na Vhatesaloniiki

¹⁷ Mwe vhamwitu, kulehaana kwitu niimwe kwámile kwa havhaliilizyo hansi vhweleele, havhili kulehaana ukwo kwámile kwa muvhili, te kwa mooyo haa. Mwe pe ku havhaliilizyo honti iho, twínzile twasamba kuuti tuvhalole havhili.

¹⁸ Pe tuhanzaga twinze kuli imwe, inkaani ine ne Paavhuli ulwinji nkanzaga kwinza, ileelo uSeetano ahatudinda.

¹⁹ Ishi vhe vha naanu vhe vhwandilo uvhwa lusuuvhilo lwitu? Havhili vhe vha naanu vhe vhwandilo uvhwa luseshelo ni shipambwi shiitu isha vhupooti, lwe uMwene uYeesu ayinza? Te mwemwe?

²⁰ Nalyoli, imwe mwe mukutuvhiiha kuvha nu vhushindamu nu luseshelo.