1 VaKolinti 8 - ULufingwi uLupwa

Ishaakulya she vhafumwizye ku viholanyo

¹ Ishi, naakuyanjila inongwa ziila zye mwaambuziliziizye izya shaakulya she vhafumwizye ku viholanyo. Mukuyanga mukuti, “Iswe swenti tuli nu vhumanyi.” Ileelo uvhumanyi uvhwo, vhukuvhavhiiha avhantu kuuti vhayitumvwaje. Nkandi ishikunzi she shikuvhazenga avhantu mu lwitiho.

² Inga umuntu akuyilola kuuti azimanyile zimo, uyo atazimanyile inza vwe yikwanzilwa kuzimanya.

³ Ileelo umuntu we akumukunda uMulungu, uyo we akumanyiha nu Mulungu wuuyo.

⁴ Ishi izya kulya ishaakulya she vhafumwizye ku viholanyo, tumanyile kuuti iviholanyo ivwo vitali ni mbombo naayimo mu nsi umu. Havhili tumanyile kuuti aliipo uMulungu wooka vhweleele.

⁵ Poosye inga viliipo ivintu vwe vhakuti avhalungu, yivhe ku mwanya, poosye mu nsi umu, poosye inga vhaliipo avhalungu avhinji na vhamwene avhinji,

⁶ ileelo kuli iswe, aliipo uMulungu wooka vhweleele, we wu Taata, we ahapela ivintu vwonti. Iswe tukulandila ku lukasamo lwakwe. Havhili aliipo uMwene wooka vhweleele, we wu Yeesu Chilisiti, kufumiilana nu weene ivintu vwonti vihapelwa, havhili niiswe tuli nu vhulanzi.

⁷ Ileelo te vhiitisi vhonti vhe vhazimanyile inongwa izi. Vhaliipo vhamo vhe vhávheleleeye kupuuta iviholanyo. Ivho lwe vhakulya ishaakulya isho she vhafumwizye ku viholanyo, vhakuyilola ngati vhakulya ishaakulya she mwiho, mwe pe vhafumwizye ku viholanyo. Pe mwe vhayeyevhazu mu mooyo gaavho, vhakuyilola kuuti vhahombela.

⁸ Ileelo ishaakulya shitakutuvhiiha kuvha papiipi nu Mulungu. Tutakusovhelwa ishintu naashimo inga tutakulya, havhili poosye inga tukulya, tutakwonjezelwa ishintu naashimo.

⁹ Ishi muvhe minso, uvhumanyi vhwinyu vhutahaavhe lipunulo ku vhayeyevhazu.

¹⁰ Nkuyanga vhwevhulo, mwe pe umuntu we atagomile mu lwitiho, angaalola iwe we uli nu vhumanyi uli mu nyumba iya kupuutila iviholanyo, ukulya ishaakulya. Vhuli, mu mwoyo waakwe atangasiivha kuuti woope ahondeeye kulya ishaakulya she vhafumwizye ku viholanyo?

¹¹ Kwi idala ilyo, uwamwinyu we atagomile mu lwitiho, we uChilisiti ahamufwila, akuteega kufumiilana nu vhumanyi vhwaho.

¹² Kuli izyo, lwe mukuvhavhombela uvhutalamalandu avhamwinyu vhe vhatagomile mu lwitiho nu kuvhavwalazya amooyo gaavho, mukupela mukumuvhombela uvhutalamalandu uChilisiti wuuyo.

¹³ Ishi, inga ishaakulya she nkulya, shikumupelela uwamwitu kuvhomba uvhutalamalandu, ipo pe te nkaalye inyama naalumo, inga uwamwitu atahinze ayinjile mu vhutalamalandu.