1 VaKolinti 6 - ULufingwi uLupwa

Kulongana ukwa vhiitisi

¹ Inga wumo muli imwe ali na malandu nu wamwavho, shooni she akutwala amalandu gaakwe ku vhe te vhiitisi? Ishi, atakwanzilwa kutwala ku vhafinjile avhamwavho, inga vhamulonje?

² Mutamanyile kuuti, avhafinjile vhe vhaliyilonga insi ino? Ishi, inga imwe mwe muliyilonga insi ino, shooni she mukupootwa kulonga amalandu, poosye amansi pahati yiinyu?

³ Vhuli, mutamanyile kuuti tulivhalonga poosye na vhahavhizya? Ishi inga vwe zili vhwevhulo, vhuli, imwe mutakwanzilwa kulonga inongwa inyinsi zye zikufumila mu vhulanzi vhwinyu?

⁴ Ishi, inga mwapuvhana kuzya vhulanzi vhwinyu, shooni she mukutwala amalandu giinyu ku vhantu vhe vhatakushindikwa mu mpuga iya vhiitisi?

⁵ Nkuyanga vhwevhulo, inga mulole insoni. Ishi pahati yiinyu ataliipo wumo we ali nu vhushindamu uvhwa njeele, we angalonzya amalandu aga vhamwavho?

⁶ Ileelo imwe vhamwitu, mukulongana mweneemwe pilongolela pi ilonjelwi ku vhe te vhiitisi!

⁷ Kulongana ukwo kukulolesya kuuti muposiitwe nziila. Vhuli, te kwashi kumuleha umuntu avhavhombele havhiivhi nu kuvhafwula ivwuma vwinyu?

⁸ Ileelo ishi imwe, mwe mukuvhomba havhiivhi kufwula ivintu, havhili mukuvhomba izyo na ku vhamwinyu!

⁹ Mutamanyile kuuti avhavhiivhi te vhahinjile mu vhumwene uvhwa Mulungu? Mutahayihopenkanye! Avhalugusu na vhantu vhe vhakupuuta iviholanyo na vhavhembu, poosye vhe vhakuvhembuha avhanaavuli vhuuvho vheeka,

¹⁰ na vhiivha na vha lupapamilo na vhashimwela na vha musaamu na vhapumula vintu, ivho vhonti te vhahinjile mu vhumwene uvhwa Mulungu.

¹¹ Vhamo muli imwe vháali inza vhwevhulo. Ileelo ishi, uMulungu avhazelufwizye nu kuvhavhiiha kuvha mwe vhantu vhaakwe, nu kuvhavhaazya kuuti mwe vhagolosu pilongolela lyakwe, kwi izina ilya Mwene wiitu uYeesu Chilisiti na ku maha aga Mupepo uwa Mulungu wiitu.

Kuleha uvhulugusu

¹² Vhamo muli imwe vhakuti, “Twitishiliilwe kuvhomba ivintu vwonti vwe tukwanza.” Mwe muumwo, ileelo te kuuti ivintu vwonti vili ni ilonka kuli iswe. Poosye inga mukuti, “Twitishiliilwe kuvhomba ivintu vwonti vwe tukwanza,” ileelo ine ntakuvha ne muzya uwa shintu shonti.

¹³ Havhili vhamo muli imwe vhakuti, “Lwe tuli ni nzala tukwanzilwa kulya, mwe pe amavhili gakwanza ishaakulya.” Vwe zili, ileelo hakwinza ahavhaliilizyo he uMulungu aligagalulanya amavhili giitu, te gahanze ishaakulya. Ileelo ishi muleshe kuuti tuhondeeye kuvhomba uvhulugusu, inza vwe yikwanzilwa kulya lwe tuli ni nzala. UMulungu atágapezile amavhili giitu kuzya vhulugusu, nkandi kuzya kumuvhombela uMwene uYeesu, woope uMwene akugakonzya amavhili.

¹⁴ Inza vwe uMulungu ámuzyusiizye uMwene uYeesu, vhwevhulo ku maha gaakwe, alituzyusya niiswe.

¹⁵ Mutamanyile kuuti amavhili giinyu vipelwa ivwa muvhili uwa Chilisiti? Ishi ungavinyatula ivipelwa ivwa muvhili uwa Chilisiti nu kuvisopenkanya nu muvhili uwa mulugusu? Ndaali, te muumwo inga hansi!

¹⁶ Mutamanyile kuuti umuntu wonti we akuvhomba uvhulugusu akuvha umuvhili wooka nu mulugusu? Yeenya, yisimviilwe mu Vhusimbe uVhufinjile kuuti, “Vhavhili ivho vhaliivha umuvhili wooka.”

¹⁷ Ileelo umuntu wonti we akusopenkana nu Mwene, akuvha wooka nawo mwa Mupepo uMufinjile.

¹⁸ Kuli izyo, mutantamaje ku vhulugusu. Imwe mukuti, “Uvhutalamalandu vhwonti vhwe umuntu akuvhomba, vhuli kunzi mu muvhili waakwe,” ileelo we akuvhomba uvhulugusu, akuvhuvhombela uvhutalamalandu umuvhili waakwe wuuyo.

¹⁹ Mutamanyile kuuti, amavhili giinyu Nyumba iMfinjile iya Mupepo uMufinjile we uMulungu ávhapiiye? Ishi amavhili igo te vwuma vwinyu,

²⁰ mwe pe mwátavhuliilwe ku nsavho impiti. Ishi mumutiimaje uMulungu mu mavhili giinyu.