1 VaKolinti 5 - ULufingwi uLupwa

Uvhulugusu vhutakwanzilwa mu mpuga iya vhiitisi

¹ Nalyoli nivuuye inongwa kufuma kuli imwe kuuti kuli uvhulugusu pahati yiinyu vhwe vhutalolesile naalumo poosye ku vhantu vhe vhatamwitisile uMulungu. Nivuuye kuuti umuntu wumo akujenda nu mushi uwa yise.

² Shooni she imwe mukuyitumvwa? Mulesile kuswimiililwa nu kumwefwa umuntu we akuvhomba izyo pahati yiinyu!

³ Poosye she ine indi ukutali niimwe, umwoyo waane wuli pooka niimwe, havhili imulonzile umuntu we akuvhomba izyo. Ilyo lye nkandi mbomvile inga mbanje ukwo.

⁴ Lwe mukuhomaana kwi izina ilya Mwene wiitu uYeesu, niine umwoyo waane kwe wuvhe pooka niimwe, na maha aga Mwene wiitu uYeesu kwe gavhe pooka niimwe.

⁵ Ipo umuntu uyo mumwefwe pahati yiinyu nu kumuvhiiha mu nyoovhe izya Seetano, inga uvhuntu vhwakwe uvhwa vhutalamalandu vhusundwe nu kunanjiha, ileelo umwoyo waakwe wupokwe isiku ilya kwinza uMwene Yeesu.

⁶ Kuyitumvwa kwinyu te kwinza. Vhuli, mutamanyile kuuti umulembo uwa kuluzizya vhunsi vhweleele, vhukuluzya umunya wonti?

⁷ Kuli izyo, muyizelufwe, kwi idala ilya kumwefwa umuntu umuvhiivhi pahati yiinyu, inza kwefwa umulembo uwa kuluzizya uwa hali, inga muvhe inza umunya umupwa we wutali nu mulembo uwa kuluzizya, vhwevhulo vwe muli. Vwe muli, mwe pe uMulungu amufumwizye uChilisiti kuvha mpuutile inza aHagonzi aha shikulukuulu isha Pasaaka, inga atuposhe.

⁸ Ishi tuleshe kuvhomba ishikulukuulu isha Pasaaka nu mulembo uwa kuluzizya uwa hali, kwe kuuti uvhuvhiivhi nu vhutalamalandu, nkandi tuvhombaje na makaati ge gatali nu mulembo uwa kuluzizya, kwe kuuti umwoyo umuzelu nu vhwanalyoli.

⁹ Mwa kalaata we naavhasimbiiye, naavhavhuziizye kuuti muleshe kuvha nu vhuliilani na vhalugusu.

¹⁰ Ntakuti muleshe kuvha nu vhuliilani na vhe te vhiitisi avhalugusu na vha lupapamilo na vhapumula vintu, poosye na vhe vhakupuuta iviholanyo, mwe pe kuvhomba vhwevhulo, mukwanzilwa kwepa mu nsi umu.

¹¹ Ileelo naavhasimbiiye kuuti muleshe kuvha nu vhuliilani nu muntu we akwitwa wamwitu inza imwe, she mulugusu, poosye wa lupapamilo, poosye wa kupuuta iviholanyo, poosye wa musaamu, poosye wu shimwela, poosye mupumula vintu. Umuntu inza uyo, muleshe poosye nu kulya nawo.

^12-13 Ishi te mbombo yaane kuvhalonga vhe te vhiitisi, uMulungu wuuyo we alivhalonga. Ileelo imwe mukwanzilwa kuvhalonga avhiitisi, inza vwe yisimviilwe mu Vhusimbe uVhufinjile kuuti, “Umuntu umuvhiivhi pahati yiinyu mumushimbizye.”