1 VaKolinti 4 - ULufingwi uLupwa

Imbombo iya vhatumwa

¹ Avhantu vhatumanyaje iswe kuuti, twe vhavhomvi avha Chilisiti, havhili twe vhimiilizi avha ntumi iya Mulungu iya vhuzigizigi.

² Ishi she shikwanzilwa kwa muntu we apeliilwe imbombo iya kwimililila, kwe kuvha nu vhutungamu.

³ Ileelo ine ntakusaajila naashimo, poosye indongwe niimwe, poosye indongwe na vhalonzi avha pa lukuvhato. Havhili poosye neneene ntakuyilonga,

⁴ mwe pe ntakulongwa naashimo mu mwoyo waane. Ileelo ilyo litakumbiiha kuuti ntahaavhe nu vhunanzi, uMwene uYeesu we akundonga.

⁵ Ishi mutavhalongaje avhantu she ahavhaliilizyo aha vhulonzi hashiili kufiha, muguliilile kufishila isiku lye uMwene uYeesu aliyinza. Uweene we alizivhiiha apazelu zyonti zye zizyihiime mu shiisi, nu kuzilolesya zye zili mu mooyo aga vhantu. Ahavhaliilizyo iho, uMulungu alivhatiima vhonti vhe vhakwanzilwa kutiimwa.

⁶ Vhamwitu, nayanga amazwi gonti igo, ku zyane nu Apoolo, inga tuvhe twe shiholanyo kuli imwe. Kwi idala ilyo, nkwanza imwe muzimanye zye zikuyangwa mu halumbe he hakuti, “Muzilandataje zye zisimviilwe mu Vhusimbe uVhufinjile.” Inga mukuzilandata, te muvhe mwe vhantu vhe vhakuyitumvwa kuzya musambiilizi wumo nu kumusuufwa uwamwavho.

⁷ Vhuli, wu naanu, we akuvhiisile uyilole kuuti, uhondeeye nkaani kuluusya avhanji? Shintu vhuli she uli nasho she uMulungu atakupiiye? Ileelo inga akupiiye, shooni she ukuyitumvwa ngati atakupiiye?

⁸ Ishi mukuyilola mwikuusi! Havhili mukuyilola mwe vhadumbwe! Havhili mukuyilola mwe vhamwene, mutakwanza kuuti iswe tuvhaavwe! Kwashi muvhanje mwe vhamwene nalyoli, inga iswe tukonzyaje pooka niimwe!

⁹ Ileelo iswe twe vhatumwa, uMulungu atuvhiisile kuvha twe vhantu avha kutusuufwa kuluusya avhanji vhonti. Tuli inza avhantu vhe vhalonziilwe kuvhagoga pilongolela ilya vhantu avhinji. Tuvhisiilwe kuvha twe vhakusesya mu nsi yonti, ku vhahavhizya na ku vhantu vhonti.

¹⁰ Avhantu vhakutulola iswe twe vhalangani, mwe pe tukumuvhombela uChilisiti, ileelo imwe mukuyilola muli nu vhushindamu uvhwa njeele mwa Chilisiti. Iswe tukuloleha twe vhayeyevhazu, ileelo imwe mukuloleha muli na maha. Iswe vhakutusuufwa, ileelo imwe vhakuvhashindiha.

¹¹ Poosye ahavhaliilizyo iha, tuli ni nzala ni shinyooto, havhili tuli ni nzwalo. Tukutamilwa havhili tutali nu vhuyo.

¹² Tukukanyila kuvhomba imbombo ni nyoovhe zyitu sweneeswe. Inga avhantu vhakututipa, tukuvhaloota, inga vhakutuyimvwa, tukujimbiilila,

¹³ inga vhakutuyanga havhiivhi, tukuvhaamula ahinza. Poosye ishi, tukuloleha fwe twe nswaswa izya mu nsi umu, havhili fwe twe makooko.

¹⁴ Ntakuvhasimbila amazwi iga, inga mbasuupizye, nkandi inga mbasoshe fwe mwe vhaana vhaane avhankundwa.

¹⁵ Yeenya, poosye she muli na vhasambiilizi 10,000 mwa Chilisiti, ileelo utaata wiinyu ali wooka. Ine ne ne taata wiinyu mwa Chilisiti uYeesu, mwe pe ne náali ne mutanzi kulumbiilila Izwi iLyinza kuli imwe.

¹⁶ Ishi, nkuvhalambiilizya kuuti muvhombaje inza vwe ine nkuvhomba.

¹⁷ Ilyo lye limbiisile kumusonteelezya uTiimoti, umwana waane unkundwa, havhili umutungamu mu mbombo iya Mwene uYeesu. Uweene kwe avhakumbusye ulujendo lwane mwa Chilisiti, inza vwe nkusambiilizya mu vivhanza mwonti.

¹⁸ Ishi vhamo muli imwe vhakuyitumvwa, mwe pe vhakusiivha kuuti, te nkinze havhili kuli imwe.

¹⁹ Inga uMwene uYeesu akasama, nkusuuvhila naluvhiilo kwinza. Ipo pe ndiimanya amazwi ge vhakuyanga ivho vhe vhakuyitumvwa, te kumanya ge mazwi vhweleele, nkandi poosye na maha gaavho aga lwitiho.

²⁰ Nkuyanga vhwevhulo, mwe pe uvhumwene uvhwa Mulungu, vhutakuloleha mu mazwi, nkandi mu maha.

²¹ Ishi mukwanza imbombe ishooni? Vhuli, imbinzile ni ndiisa? Pamo imbinzile ni shikunzi nu mwoyo uwa vhutonsu?