1 VaKolinti 3 - ULufingwi uLupwa

Uvhuliilani mu mbombo iya Mulungu

¹ Vhamwitu, lwe náali kuli imwe ntahayangaga niimwe fwe nkuyanga na vhantu vhe vhakulongolwa nu Mupepo uMufinjile, nkandi fwe nkuyanga na vhantu vhe vhakulongolwa nu vhuntu uvhwa vhutalamalandu, havhili fwe nkuyanga na vhaana avhacheeche kumwitiha uChilisiti.

² Nkavhapanga lye lizivha vhweleele, ntahavhapanga ishaakulya ishigomu, mwe pe mwáshiili kugoma, poosye ishi muli she mushiili.

³ Nkuyanga vhwevhulo, mwe pe poosye ishi mukulongolwa nu vhuntu uvhwa vhutalamalandu. Pahati yiinyu muli nu mwone ni ivho. Vhuli, izyo zitakulolesya kuuti muli she mukulongolwa nu vhuntu uvhwa vhutalamalandu nu kulandila inza avhantu avha mu nsi umu?

⁴ Ishi inga umuntu wumo akuyanga akuti, “Ine ne wa Paavhuli,” uwamwavho akuti, “Ine ne wa Apoolo,” vhuli, izyo zitakulolesya kuuti muli she mukuvhomba izya vhantu avha pa nsi ipa?

⁵ Ishi uApoolo wu naanu? Niine ne Paavhuli ne naanu? Iswe twe vhavhomvi vhweleele vhe uMulungu átusonteleziizye kuvhaavwa imwe kumwitiha uYeesu Chilisiti. Iswe swenti tuvhomvile inza vwe uMwene uYeesu átupiiye.

⁶ Ine návhwaye imbeyu, uApoolo áyitiliziizye aminzi, ileelo uMulungu we ámeziizye nu kukuzya.

⁷ Ishi uMulungu we akukuzya we wa kusuuvhilwa, te we akuvhwala, poosye we akwitiilizya.

⁸ We akuvhwala na we akwitiilizya vhonti vhali ni nsiivho yooka. UMulungu aliivhapa vhonti amalipilo gaavho, kulandatana ni mbombo zyavho.

⁹ Yeenya, imbombo ye tukuvhomba ine nu Apoolo, ya Mulungu. Imwe muli ngati mwe mugunda uwa Mulungu, havhili muli ngati mwe nyumba yaakwe.

¹⁰ Kulandatana nu vhwila uvhwa Mulungu vhwe ampiiye, ine inza umupiti uwa vhazenzi we ali nu vhushindamu uvhwa njeele, názenzile ulwalo lwe ishi avhazenzi avhanji vhakuzenga pamwanya yaakwe. Ileelo avhantu vhonti vhavhanje minso, lwe vhakuzenga pa lwalo ulwo.

¹¹ Nkuyanga vhwevhulo, mwe pe ulwalo lwe luzengwilwe wu Yeesu Chilisiti wuuyo. Ataliipo umuntu we angazenga ulwalo ulunji.

¹² Ileelo pamwanya pa lwalo ulwo, umuntu uwunji angazenjela isahaabu, poosye impiiya, poosye amavhwe aga nsavho impiti. Uwamwavho angazenjela amakwi, poosye amatundu, poosye isole.

¹³ Imbombo izya vhantu vhonti zililoleha vwe zili. Isiku liila ilya vhulonzi imbombo zyonti ziliivha apazelu, mwe pe imbombo izya vhantu vhonti zililingwa pa mwoto uwa vhulonzi.

¹⁴ Umuntu we imbombo yaakwe yaapona, aliposheela amalipilo.

¹⁵ Ileelo umuntu we imbombo yaakwe yalungulila, aliteezya vwonti, ileelo uweene aliipokwa, aliivha inza umuntu we aapokwa mu mwoto.

¹⁶ Vhuli, mutamanyile kuuti imwe mwe Nyumba iMfinjile iya Mulungu? Mutamanyile kuuti uMupepo uwa Mulungu akutendama pahati yiinyu?

¹⁷ Inga umuntu ayinanganya iNyumba iMfinjile iya Mulungu, uMulungu alimunanganya umuntu uyo, mwe pe iNyumba iya Mulungu Mfinjile, havhili imwe mwe mwe Nyumba iyo.

¹⁸ Umuntu wonti muli imwe atahayihopenkanye kuuti ali nu vhushindamu uvhwa njeele. Umuntu inga akuyilola kuuti ali nu vhushindamu uvhwa njeele mu nsi umu, ayivhiishe mwalangani, inga avhwaje uvhushindamu uvhwa njeele uvhwa nalyoli.

¹⁹ Yeenya, uvhushindamu uvhwa njeele uvhwa mu nsi umu, vhwalangani pilongolela ilya Mulungu. Izyo zili inza vwe yisimviilwe mu Vhusimbe uVhufinjile kuuti, “UMulungu akuvhalema vhe vhali nu vhushindamu uvhwa njeele mu vhushevu vhwavho.”

²⁰ Havhili yisimviilwe mu Vhusimbe uVhufinjile kuuti, “UMWENE uMulungu azimanyile insiivho izya vhe vhali nu vhushindamu uvhwa njeele kuuti zitali ni ilonka naalimo.”

²¹ Ishi umuntu wonti atayitumvwaje kuuti mulandati wa mulongozi wumo, mwe pe ivintu vwonti vwinyu,

²² avhe wu Paavhuli, poosye wu Apoolo, poosye wu Keefa. Havhili uMulungu avhapiiye ivintu vwonti kuvhaavwa imwe, vivhe vwa mu nsi, poosye uvhulanzi, poosye uvhufwe, poosye vwe viliipo ishi, poosye vwe viliivha, vwonti vwinyu.

²³ Havhili niimwe mwe vhantu vha Chilisiti, woope uChilisiti wa Mulungu.