1 VaKolinti 2 - ULufingwi uLupwa

Kukumusya intumi iya Yeesu Chilisiti

¹ Vhamwitu, lwe nínzile kuli imwe ntahakumusyaga intumi iya Mulungu ye yáali ya vhuzigizigi, inga ndoleshe kuuti ine indi na hayanjile ahinza, poosye kuyilolesya kuuti indi nu vhushindamu uvhwa njeele.

² Lwe náali kuli imwe námuuye mu mwoyo waane kuuti ntahayanje ishinji naashimo, nkandi zye nongwa izya Yeesu Chilisiti, inkaani kufwa kwakwe pa shihovhenkanyo.

³ Ahavhaliilizyo iho, náali ne muyeyevhazu, náali ni lyoga, havhili nkatetemaga nkaani.

⁴ Lwe nkasambilizyaga na lwe nkakumusyaga izwi kuli imwe, ntahavhombaga vhwevhulo kwi idala ilya vhushindamu vhwane uvhwa njeele, inga mwitishe, nkandi mwítisile, mwe pe mwágavhwenyi amaha aga Mupepo uMufinjile.

⁵ Nkavhombaga izyo, inga ulwitiho lwinyu lutasuvhilaje uvhushindamu uvhwa njeele uvhwa vhantu, nkandi lusuvhilaje amaha aga Mulungu.

Uvhushindamu uvhwa njeele vhwe vhukufuma kwa Mulungu

⁶ Ileelo zye tukuyanga zye zya vhushindamu uvhwa njeele ku vhantu vhe vhagomile mu lwitiho. Uvhushindamu uvhwa njeele uvhwo te vhwa pa nsi ipa, havhili te vhwa vhapiti avha pa nsi ipa, vhe kukonzya kwavho kukusila.

⁷ Nkandi uvhushindamu uvhwa njeele uvhu, vhukufuma kwa Mulungu, havhili vhwáli vhwa vhuzigizigi, kwe kuuti vhutávhisiilwe apazelu ku vhantu. UMulungu ávhuvhatisile uvhushindamu uvhwo lwe insi yishiili kupelwa, inga niiswe tuvhe nu vhuliilani nawo mu vhushindamu vhwakwe.

⁸ Havhili ataliipo inga wooka mu vhapiti avha mu nsi umu we avhumanyile uvhushindamu uvhwa njeele uvhwo, mwe pe inga vhavhumanyaje, nkandi vhatámuhomeleeye pa shihovhenkanyo uMwene uwa Vhushindamu.

⁹ Izyo zili inza vwe yisimviilwe mu Vhusimbe uVhufinjile kuuti, “Zye uMulungu avhasenganiziinye vhe vhakumukunda, ataliipo umuntu we azivhwenyi lumo, poosye kuzyivwa, havhili ataliipo umuntu we azivhiisile lumo mu mwoyo waakwe.”

¹⁰ Ileelo iswe uMulungu átulolesiizye zyenezyo kutuushila kwa Mupepo uMufinjile. Yeenya, uMupepo uMufinjile we akupenza zyonti, poosye izya kukwilu izya Mulungu.

¹¹ Ataliipo umuntu we angaamanya zye akusiivha umuntu uwunji, nkandi wewuula we akusiivha. Vwe zili, zye uMulungu akusiivha ataliipo uwunji we akuzimanya, nkandi we Mupepo uwa Mulungu.

¹² Niiswe, tutaposheleeye impepo izya mu nsi umu, nkandi uMupepo we akufuma kwa Mulungu, inga tuzimanyaje zye tupeliilwe nu Mulungu.

¹³ Inongwa zye tukuyanga, te vhantu vhe vhali nu vhushindamu uvhwa njeele vhe vhatusambiliziizye, nkandi wu Mupepo uwa Mulungu we atusambiliziizye. Tukulondovhola inongwa izya Mupepo uwa Mulungu ku vhantu vhe vhali nu Mupepo uyo.

¹⁴ Ileelo umuntu we atali nu Mupepo uwa Mulungu, atangaposheela zye zikufuma kwa Mupepo uwa Mulungu. Umuntu uyo ku kwakwe izyo zya vhwalangani, havhili atangazimanya, mwe pe umuntu akuzimanya izyo ku lwavwo ulwa Mupepo uwa Mulungu weeka.

¹⁵ Umuntu we akulongolwa nu Mupepo uwa Mulungu, akuzimanya zyonti, ileelo avhantu avhanji vhatangamumanya.

¹⁶ “Ataliipo umuntu we angazimanya zye uMWENE uMulungu akusiivha, havhili naawumo uwa kumwavwa insiivho.” Ileelo iswe twe vhiitisi tuli ni nsiivho zye zikufuma kwa Chilisiti.