1 VaKolinti 16 - ULufingwi uLupwa

Umusangwi uwa kuvhaavwa avhiitisi

¹ Ishi, kuzya musangwi uwa kuvhaavwa avhafinjile, muvhombe inza vwe návhavhuziizye avhiitisi avha mu vivhanza ivwa ku Galaatiya.

² Isiku ilya kwanda ilya mulungu, mwenti musavhulaje ivintu nu kuvivhiiha kulandatana na vwe mulonsile, inga lwe nkwinza kuli imwe, muvhanje muvhunganisile.

³ Lwe naafiha, ndivhasonteelezya nu kalaata avhantu vhe mulivhasaavhula, inga vhatwale umusangwi uwo ku Yelusaleemu.

⁴ Inga yaloleha kuuti niine nkwanzilwa kusogola, pe ndisogola pooka navho.

Imbaatiho izya Paavhuli kusogola ku Kolinto

⁵ Inga naafuma mu shigavho isha nsi isha Makedooniya, nkwinza kuli imwe, mwe pe nkwanza suuti kutuushila ku Makedooniya.

⁶ Ileelo inga ninza, lumo nditendama niimwe ahavhaliilizyo honti aha lupepo, inga munaavwe insogole kwonti kwe ndisogola.

⁷ Ntakwanza kuuti tuhomaane ahavhaliilizyo hansi ngati muntu we akutuuha vhweleele. Inga uMwene asungwa, nkusuuvhila kutendama kuli imwe ahavhaliilizyo hamo.

⁸ Ileelo ishi, nkusyala pa nkaaya ino iya Hefeeso kufishila isiku ilya Pentekoositi.

⁹ Nkuvhomba vhwevhulo, mwe pe uMulungu aniguliiye idala ilya kuvhomba imbombo impiti mu nkaaya ino, ileelo vhaliipo avhantu avhinji vhe vhakundinda.

¹⁰ Inga uTiimoti ayinza kuli imwe, mumuposheele nu kumusunga, inga atendame niimwe ahinza ishisita ilyoga, mwe pe woope akuvhomba imbombo iya Mwene uYeesu inza ine.

¹¹ Ishi, umuntu wonti atahamusuufwe, nkandi mumwavwe ayeepe ukwo ku vhutehamu, inga ayinze kuli ine, mwe pe ine nkumuguliilila pooka na vhamwitu.

¹² Ishi kuzya wamwitu uApoolo, imulambiliziizye nkaani kuuti ayinze kuli imwe pooka na vhiitisi avhanji. Ileelo uweene atakasiime kwinza ishi, aliyinza lwe ahaaga ahavhaliilizyo.

Amazwi aga vhusililishilo nu mulaamu

¹³ Muvhanje minso nu kusimpa mu lwitiho, havhili mutavhanje ni lyoga, nkandi muvhanje mwe vhadandamazu.

¹⁴ Imbombo zyinyu zyonti muvhombaje ku shikunzi.

¹⁵ Vhamwitu, mumanyile kuuti uSiteefani pooka na vhantu avha mu nyumba yaakwe, vhantu vhe vháali vha kwanda kumwitiha uYeesu Chilisiti mu shigavho isha nsi isha Akaaya, havhili vháyifumwizye nkaani kuvhaavwa avhafinjile!

¹⁶ Niimwe muvhashindihaje avhantu inza ivho, na vhanji vhonti vhe vhakuyikungula kuvhomba imbombo ino.

¹⁷ Nkuseshela nkaani kuvhalola avha Siteefani nu Folitunaato nu Akayiiko, vhinzile ipa kufuma kuli imwe, mwe pe ulwavwo lwe mwaamile munavwaje imwe, vhakunaavwa vhuuvho.

¹⁸ Vhansansamusiizye umwoyo waane, havhili vhasansamusiizye na mooyo giinyu. Ishi muvhashindihaje avhantu inza ivha.

¹⁹ Avhantu vhe vhali mu vivhanza ivwa mu shigavho isha nsi isha Aasiya, vhakuvhalamuha. UAakila nu Puliisila, pooka ni shivhanza she shikuvhungaana mu nyumba yaavho, vhakuvhalamuha kwi izina ilya Mwene uYeesu.

²⁰ Avhamwitu vhonti vhe vhali ipa, vhakuvhalamuha. Mulamunkane ku lwofwanyo ulwa shikunzi.

²¹ Ine ne Paavhuli, nkuvhasimbila izi izya kuvhalamuha ni nyoovhe yaane neneene.

²² Umuntu wonti we atakumukunda uMwene uYeesu, atipwaje. Malanaasa, kwe kuuti we Mwene uyinze!

²³ UMwene wiitu uYeesu avhafwilaje uvhwila.

²⁴ Mbakunzite imwe mwenti, imwe mwe mukumwitiha uChilisiti uYeesu.