1 VaKolinti 15 - ULufingwi uLupwa

Kuzyuha ukwa Chilisiti

¹ Ishi vhamwitu, nkuvhakumbusya Izwi iLyinza lye nálumbiliiye kuli imwe, niimwe muhaliposheela. Ilyo lye likuvhavhiiha kuuti musimpe mu lwitiho lwe muli nalwo.

² Inga mukulilema izwi lye nálumbiliiye kuli imwe, mukuvhwaga uvhuposhi. Ileelo inga mutakulilema, ulwitiho lwinyu lutaliivha ni ilonka naalimo.

³ Ine návhasambiliziizye insambiilizyo imwamu zye náposheleeye, inza vwe yisimviilwe mu Vhusimbe uVhufinjile, kuuti uChilisiti áfuuye kuzya vhutalamalandu vhwitu.

⁴ Havhili kuuti ásyiliilwe, isiku ilya vhutatu ahazyuha inza vwe yisimviilwe mu Vhusimbe uVhufinjile.

⁵ Ahamuloleshela uKeefa, pisinda ahavhaloleshela avhatumwa vhaakwe 12.

⁶ Pisinda, ahavhaloleshela avhamwitu 500 vhe vháali pooka. Avhinji muli ivho niishi vhalanzi, vhamo vhafuuye.

⁷ Havhili ahamuloleshela uYaakobu, pisinda ahavhaloleshela avhatumwa vhonti.

⁸ Lwe avhaloleshela avhatumwa vhonti, pe ahandoleshela niine ne indi inza umuntu we ápafwilwe lwe ahavhaliilizyo hashiili kufiha.

⁹ Ine ne munsi mu vhatumwa, ntahondeeye poosye nu kwitwa kuuti ne mutumwa, mwe pe náshiyimvwizye ishivhanza isha Mulungu.

¹⁰ Ileelo uvhwila uvhwa Mulungu vhwe vhumbiisile kuvha ne mutumwa. Havhili uvhwila vhwakwe kuli ine vhutáali vhwa vhweleele, mwe pe kutuushila uvhwila uvhwo, mbomvile imbombo kuluusya avhatumwa vhonti. Ntavhomvile izyo ku maha gaane, ileelo uMulungu ku vhwila vhwakwe we ali pooka niine.

¹¹ Kuli izyo, imbe neene nkukumusya, poosye vhavhe vhatumwa avhanji ivho, swenti tukukumusya inongwa zyeziila, havhili zye muzyitisile.

Kuzyuha ukwa vhafwe

¹² Ishi inga uChilisiti akukumuha kuuti ázyusile, zili vhuli vhamo muli imwe vhakuti kutaliipo kuzyuha?

¹³ Inga kutaliipo kuzyuha, pe woope uChilisiti atázyusile.

¹⁴ Inga uChilisiti atázyusile, pe kukumusya kwitu izwi kutali ni ilonka, poosye ulwitiho lwinyu lutali ni ilonka.

¹⁵ Havhili iswe tukuloleha ngati twe vhahoome avha ilenga ku nongwa izya Mulungu, mwe pe tukuhomeshezya kuuti, uMulungu ámuzyusiizye uChilisiti, fwandi atámuzyusiizye, inga avhafwe vhatakuzyuha.

¹⁶ Nkuyanga vhwevhulo, mwe pe inga avhafwe vhatakuzyuha, woope uChilisiti atázyusile.

¹⁷ Inga uChilisiti atázyusile, pe ulwitiho lwinyu lutali ni ilonka naalimo, niimwe muli she muli mu vhutalamalandu vhwinyu.

¹⁸ Vhoope vhe vhafuuye she vhamwitisile uChilisiti, vhateezile nziila.

¹⁹ Inga ulusuuvhilo lwitu kwa Chilisiti lwa mu vhulanzi vhunuuvhu vhweka, ipo pe lwe twe vhakufwilwa uvhwila kuluusya avhantu vhonti.

²⁰ Ileelo ishi, uvhwanalyoli kwe kuuti, uChilisiti ázyusile, uweene mutanzi kuzyuha ku vhe vhafuuye.

²¹ Inza vwe uvhufwe vhwínzile mu nsi umu kufumiilana nu muntu wooka, kwope kuzyuha kwinzile kufumiilana nu muntu wooka.

²² Nkuyanga vhwevhulo, mwe pe inza vwe avhantu vhonti vhakufwa kufumiilana nu Aadamu, vwe avhantu vhonti vhalizyuha kufumiilana nu Chilisiti.

²³ Ileelo avhantu vhonti vhalizyuha ku havhaliilizyo he uMulungu ahavhiisile. UChilisiti we álongoleeye kuzyuha, pisinda vhalizyuha avhantu vhaakwe lwe ayinza.

²⁴ Ipo pe vhuliyinza uvhusililishilo uvhwa vwonti, ahavhaliilizyo he uChilisiti aliimupa uTaata uMulungu uvhumwene vhwakwe, lwe uChilisiti aalovwa uvhulongozi vhwonti na maha gonti nu vhupiti vhwonti.

²⁵ UChilisiti akwanzilwa akonzye kufishila pe uMulungu alivhavhiiha avhalugu vhaakwe vhonti pansi pa vinama vwakwe.

²⁶ Umulugu uwa vhusililishilo kumulovwa, aliivha vhufwe.

²⁷ UVhusimbe uVhufinjile vhukuyanga vhukuti, “Alimuvhiiha kuuti avikonzyaje ivintu vwonti.” Lwe uVhusimbe uVhufinjile vhukuti, “ivintu vwonti,” te kuuti alimukonzyaga nu Mulungu woope, mwe pe uweene we amuvhiisile uChilisiti kuuti avikonzyaje ivintu vwonti ivwo.

²⁸ Havhili lwe avivhiiha ivintu vwonti mu maha aga Mwana waakwe, woope uMwana aliyivhiiha mu maha aga Taata waakwe uMulungu, we avivhiisile ivintu vwonti mu maha aga Mwana waakwe, inga uMulungu avhe Mupiti uwa vwonti.

²⁹ Ishi avhantu vhe vhakwozelwa kuzya vhafwe vhakusuuvhila shintu vhuli? Inga avhafwe te vhahazyushe naalumo, shooni she avhantu ivho vhakwozelwa kuzya vhafwe?

³⁰ Niiswe shooni she tukuyivhiiha mu mayimba insiku zyonti?

³¹ Vhamwitu, insiku zyonti indi mu mayimba aga vhufwe. Kuyitumvwa kwane ku zyinyu, kwe kuli mwa Chilisiti uYeesu uMwene wiitu, kwe kumbiisile kuyanga amazwi iga.

³² Inga kutaliipo kuzyuha, náali na lilonka vhuli kulwa na vhaala avha ku Hefeeso, vhe vhali inza ivihanu ivihali? Inga kutaliipo kuzyuha, pe “tulyanje nu kumwela, mwe pe indaavhi tukufwa.”

³³ Mutahopelwaje na vhantu vhe vhakuyanga kuuti avhafwe te vhahazyushe, mwe pe, “Avhamanyani avhavhiivhi, vhakunanganya ulujendo ulwinza.”

³⁴ Muvhanje ni njeele inza vwe yikwanzilwa, havhili musiivhaje ahinza, muleshe kuvhomba uvhutalamalandu, mwe pe vhamo muli imwe, vhatamumanyile uMulungu. Nkuyanga vhwevhulo, inga mbasuupizye.

Vwe wuliivha umuvhili isiku ilya kuzyuha

³⁵ Ileelo umuntu angavhuziilizya angati, “Avhafwe vhalizyuha inza vhuli? Lwe vhakuzyuha, vhaliivha na mavhili vhuli?”

³⁶ Izyo nsiivho zya shipukupuuku! Inga wavhwala imbeyu, yitangaamela ishisita kufwa.

³⁷ Imbeyu ye mukuvhwala, yivhe ya ngana, poosye mbeyu iyinji, yitakuholana ni ihonti lyakwe.

³⁸ Ileelo uMulungu akuuyipa imbeyu iyo, ihonti inza vwe akasiime wuuyo. Imbeyu zyonti akuuzipa amavhili gaavho.

³⁹ Ivipelwa vwonti vili na mavhili, ileelo amavhili igo gataholiine. Amavhili aga vhantu gali ishinji, aga vihanu gali ishinji, aga nyunyi gali ishinji, goope aga nswi gali ishinji.

⁴⁰ Havhili galiipo amavhili aga vintu ivwa ku mwanya na mavhili aga vintu ivwa mu nsi umu. Uvhwinza uvhwa mavhili aga ku mwanya vhuli ishinji, nu vhwinza uvhwa mavhili aga mu nsi umu vhuli ishinji.

⁴¹ Uvhwinza uvhwa izuvha vhuli ishinji nu vhwinza uvhwa mwezi vhuli ishinji. Vhwope uvhwinza uvhwa nzota vhuli ishinji, ni nzota zyonti zili nu vhwinza vhwakwe.

⁴² Vwe ziliivha lwe avhafwe vhakuzyuha. Wukusyilwa umuvhili we wukuvhola, ileelo uMulungu aliwuzyusya umuvhili uwa vhulanzi uvhwa shiima.

⁴³ Umuvhili lwe wukusyilwa wutakuvha nu vhushindamu, ileelo lwe uMulungu akuwuzyusya wukuvha nu vhushindamu. Lwe wukusyilwa wukuvha muyeyevhazu, ileelo lwe uMulungu akuwuzyusya wukuvha na maha.

⁴⁴ Umuvhili we wukusyilwa, muvhili wa pa nsi ipa, ileelo umuvhili we uMulungu akuwuzyusya wukuvha muvhili umupwa we tukupeelwa nu Mupepo uMufinjile. Inga wuliipo umuvhili uwa pa nsi ipa, pe umuvhili umupwa wuliipo we uMupepo uMufinjile akuutupa.

⁴⁵ Mu Vhusimbe uVhufinjile yisimviilwe kuuti, “Umuntu uwa kwanda uAadamu, ápeziilwe, ahavha mulanzi.” Ileelo uAadamu uwa vhusililishilo uChilisiti, wu Mupepo we akuuvhapa avhantu uvhulanzi.

⁴⁶ Umuvhili we wukulongolela kupelwa, muvhili uwa pa nsi ipa, pisinda wukwinza umuvhili umupwa we tukupeelwa nu Mupepo uMufinjile.

⁴⁷ Umuntu uwa kwanda, uAadamu áfumile mu nsi, ápeziilwe kufuma mu ntope. Umuntu uwa vhuvhili, uChilisiti áfumile ku mwanya.

⁴⁸ Kuli izyo, avhantu vhonti avha mu nsi umu vhali na mavhili aga ntope inza uAadamu. Vhoope avhantu vhonti vhe vhaliivha ku mwanya vhaliivha na mavhili aga ku mwanya inza uChilisiti.

⁴⁹ Inza vwe tuholiine nu Aadamu we ápeziilwe kufuma mu ntope, vwe tuliholana nu Chilisiti we ali nu muvhili uwa ku mwanya.

⁵⁰ Vhamwitu, nkuyanga nkuti amavhili giitu aga pa nsi ipa, gatanginjila mu vhumwene uvhwa Mulungu. She shikufwa nu kuvhola, shitangavha nu vhulanzi uvhwa shiima.

⁵¹ Tejeelezyi, ishi nkuvhavhuuzya izya vhuzigizigi. Iswe tutaliifwa swenti, ileelo swenti tuligalunkana

⁵² ku havhaliilizyo hansi vhweleele inza ahavhaliilizyo aha muntu kukapizya. Izyo zilifumila lwe isaji ilya kumpeleela lyakuuta. Ahavhaliilizyo iho avhafwe vhalizyuha nu kuvha na mavhili ge gataliivhola havhili naalumo, niiswe tuligalunkana.

⁵³ Yiliivha vhwevhulo, mwe pe umuvhili uno we wukuvhola wukwanzilwa wugalunkane nu kuvha muvhili umupwa we wutakunanjiha, umuvhili we wukufwa, wukwanzilwa wugalunkane kuvha muvhili umupwa we wutakufwa.

⁵⁴ Lwe umuvhili uno we wukuvhola wagalunkana kuvha muvhili uwa vhulanzi uvhwa shiima, umuvhili we wukufwa wagalunkana kuvha muvhili we wutakufwa, pe lililunjiha izwi lye lisimviilwe mu Vhusimbe uVhufinjile kuuti, “UMulungu avhupoota uvhufwe, vhwope vhwapootwa nziila!”

⁵⁵ “We vhufwe, uvhupooti vhwaho vhuli kwoshi? Gali kwoshi amaha gaaho aga kuleeta uvhuvhaavi?”

⁵⁶ Yeenya, uvhutalamalandu vhwe vhukuleeta uvhuvhaavi uvhwa vhufwe, havhili uvhutalamalandu vhukuloleha kuuti vhutalamalandu kufumiilana ni ndajizyo.

⁵⁷ Ileelo tukumusalifwa uMulungu we akuutupa kupoota uvhutalamalandu nu vhufwe kwi idala ilya Mwene wiitu uYeesu Chilisiti.

⁵⁸ Ishi vhamwitu vhankundwa, musimpaje, mutavunzihaje umwoyo mu lwitiho. Insiku zyonti, mukanyilaje kuvhomba imbombo iya Mwene uYeesu, mwe pe mumanyile kuuti, imbombo ye mukuvhomba mwa Mwene, mutakuyimba vhweleele.